1‘A nyns eus dhe vab-den gonis kales war an norvys,

hag a nyns yw aga dhydhyow kepar ha'n dydhyow a arvethesik?

2Kepar ha kethwas neb a'n jeves hwans a skeus,

ha kepar hag arvethesik a hwila y wober,

3yndella yth yw res dhymm misyow a euveredh,

ha nosow a anken yw kevrennys dhymm.

4Pan wrowedhav my a lever, “P'eur hwrav vy sevel?”

Mes hir yw an nos,

ha leun a dreylyans dibowes bys an bora.

5Gwiskys yw ow hig gans kontron ha kresten a dhoust;

ow kroghen a galesha, ena pedri.

6Skaffa ages gwennel gwiader yw ow dydhyow,

hag i a worfenn heb govenek.

7‘Porth kov ow bewnans dhe vos anall;

ny wra ow dewlagas gweles arta yn ta.

8Ny wra lagas Duw neb a'm aspi ow gweles arta;

dha dhewlagas a vydh warnav, mes gyllys vydhav.

9Kepar dell dhifyk an gommolenn ha mos dhe-ves,

yndella ny dheu neb a dhiyskynn dhe ifarn war-vann arta;

10ny dhehwel ev arta dh'y ji,

na ny'n aswonn y dyller namoy.

11‘Rakhenna ny fronnav ow ganow;

my a gews yn angoes ow spyrys;

my a grodhvol yn hwerowder ow enev.

12Ov vy an mor, po euthvil a'n mor,

may settydh goelyador warnav?

13Pan lavarav, “Ow gweli a wra ow honfortya,

ow growedhva a skavha ow krodhvol”,

14ena ty a worr own ynnov gans hunrosow

ha ty a'm euthyk gans gwelesigethow,

15may tewis ow enev tag

ha mernans kyns es ow horf askornek.

16Kasadow dhymm yw ow bewnans; ny vynnav bewa bys vykken.

Gas vy ow honan, rag bos ow dydhyow anall.

17Pyth yw mab-den, ma'n moghhydh,

ha may settydh dha golonn warnodho,

18may teudh dh'y weles pub myttin,

ha ma'n prevydh pub pols?

19A ny hedhydh nevra mires orthiv,

ha ny'm gesydh ow honan bys may lenkiv ow threw?

20Mar peghav, pandr'a wrav dhis, ty goelyador mab-den?

Prag y'm settsys avel dha gostenn?

Prag yth ov vy begh ragos?

21Prag na evydh ow threuspass

ha kemmeres dhe-ves ow hammweyth?

Rag lemmyn my a wrowedh y'n doust;

ty a'm hwila mes ny vydhav ena.’