Kynsa Areth Bildad

1Ena Bildad an Shuhyas a worthybis:

2‘Pes termyn y gewsydh an taklow ma,

hag y fydh geryow dha anow gwyns krev?

3A gammdreyl Duw gwirvreus?

Po a gammdreyl an Ollgalloesek an gwir?

4Mar peghas dha fleghes er y bynn,

ev a's delivras yn galloes aga hammweythres.

5Mar mynnydh hwilas Duw

ha pysi war an Ollgalloesek mersi,

6mars os pur hag ewnhynsek,

lemmyn ev a dhifun ragos

ha'th restorya dhe'th annedh gwiw.

7Kyn feu dha dhalleth byghan,

dha dhiwedh a vydh moghhes yn feur.

8‘Rag govynn, my a'th pys, orth an henedh tremenys,

ha dysmyk an taklow hwithrys gans an tasow;

9rag dhiworth de on ni, ha ny wodhon travyth;

skeus yw agan dydhyow war an norvys.

10A ny wrons dha dhyski, ha leverel dhis,

ha dyllo geryow dhiworth aga holonn?

11‘A yll papyrus tevi le ma nag eus gwern?

A yll kors glasa le ma nag eus dowr?

12Hag i ow pleujyowa hwath, ha heb bos treghys,

i a wedher kyns pub plans arall.

13Yndella yw hynsyow kemmys a ankev Duw;

govenek an den didhuw a dhe goll.

14Y fydhyans yw neus munys an hav,8:14 neus munys an hav: Styr an Ebrow yw pur ansertan.

ha gwias kevnisenn yw y fydh.

15Ev a boes erbynn y ji mes ny sev;

ev a'n dalghenn mes ny dhur.

16Ev a sewen a-dherag an howl,

ha'y eginyow a les yn-mes der y lowarth.

17Y wreydh yw plethys a-dro dhe'n karnedh;

hag i a hwila tyller yn mysk an karregi.

18Mars yw ev distruys dhiworth y dyller,

y dyller a wra y nagha, ow leverel, “Ny'th welis bythkweth.”

19Otta, hemm yw heudh y hyns,

ha dhiworth an dor re erell a egin.

20‘Otta, ny skon Duw den divlam,

na ny dhalghenn leuv drogoberoryon.

21Ev a lenow hwath dha anow gans hwarth,

ha dha dhiwweus gans garma.

22An re a'th kas a vydh gwiskys yn bismer,

ha tylda an dhebelwesyon a vydh gyllys dhe goll.’