Gorthyp Job dhe Bildad

1Ena Job a worthybis:

2‘Dhe wir y hwonn y vos yndella;

mes fatell yll den bos ewn a-dherag Duw?

3Mar mynnir dadhla ganso,

ev a yll govynn mil wovynn, na allsa denvyth gorthybi dhedha.

4Fur yw ev y'n golonn, ha galloesek yn nerth.

Piw re settyas y honan er y bynn ha seweni?

5Ev a remov menydhyow, ha ny'n godhons,

ha'ga domhwel yn y sorr.

6Ev a shak an norvys yn-mes a'y le,

ha'y golovenyow a gren.

7Ev a worhemmynn dhe'n howl, ha ny dhrehav;

ha gorra sel war an ster.

8Ev y honan a ystynn an nevow,

ha stankya war vordonnow an mor.

9Ev yw Gwrier an Ors hag Orion,

an Pleyades, ha chambouryow an Soth.

10Ev a wra taklow meur dres hwithra,

ha taklow marthys heb niver.

11Otta, ev a dremen rybov, ha ny'n gwelav;

ev a yn-rag, mes ny'n aswonnav.

12Awotta, ev a gib dhe-ves; piw a yll y lettya?

Piw a yll leverel dhodho, “Pandr'a wredh?”

13‘Ny wra Duw kildenna y sorr;

yn-danno yth ombleg gweresoryon Rahab.

14Fatell allav ytho dadhla ganso,

ow tewis ow geryow ganso?

15Mar pen ankablus, ny allsen y worthybi;

res yw dhymm kria rag mersi dhe'm breusyas.

16Mara'n galwen, ha mar korthyppa ev dhymm,

ny gryssen y vos ow koslowes orth ow lev.

17Rag ev a'm skwatt gans tewedh,

ha lieshe ow goliow heb acheson.

18Ny'm gas dhe gavoes ow anall,

mes ev a'm lenow gans hwerowder.

19Mars yw mater a grevder, mir ha galloesek yw ev!

Mars yw mater a wirvreus, piw a yll settya termyn rag ow goslowva?

20Mar pen vy ankablus, ow ganow ow honan a'm dampensa;

mar pen divlam ev a brovsa ow bos gorth.

21Kynth ov divlam, ny wrav vri a'm honan;

my a nagh ow bewnans.

22Yth yw an keth tra; rakhenna y lavarav,

ev dhe dhistrui ha'n den divlam, ha'n tebelwas.

23Pan wra an skorja ladha a-dhistowgh,

ev a skorn desper an re wiryon.

24Res yn leuv an debeles yw an norvys;

ev a gudh fas y vreusysi.

Mar nyns yw ev, piw yw ytho?

25‘Uskissa ages poenyer yw ow dydhyow;

i a fi dhe-ves, ny welons dader mann.

26I a dremen kepar ha skathow a gors,

kepar hag er ow fistena dhe'n preydh.

27Mar lavarav, “My a ankev ow krodhvol;

my a forsak ow fisment trist, ha bos yn cher da”,

28my a berth own a'm duwon oll,

rag my a woer na wredh ow synsi ankablus.

29My a vydh dampnys;

prag y lavurav yn euver ytho?

30Mar omwolghav gans dowr erghek,

ha glanhe ow diwleuv gans lisiw,

31hwath ty a'm trogh yn pytt loubek,

ha'm dillas ow honan a'm kas.

32Rag nyns yw ev gour, dell ov vy, may hylliv y worthybi,

may hyllyn dos war-barth erbynn y gila y'n breuslys.

33Unnweyth a pe breusyas yntredhon,

neb a alla settya y leuv warnan agan dew!

34Kemmeres ev y lorgh dhe-ves a-dhiworthiv,

ha na as agha anodho ow euthega.

35Ena my a gowssa heb own anodho.

Mes lemmyn nyns yw yndella genev.