An Lokustes a Dheu yn-rag avel Lu

1Hwythewgh an hirgorn yn Sion,

ha gelwewgh dhe'n gas y'm menydh sans;

krenes oll annedhysi an norvys:

rag dydh an Arloedh a dheu; pur ogas yw,

2dydh tewlder ha tewlyjyon,

dydh kommol ha tewolgow tew.

Dell les an bora war an menydhyow

y teu pobel vras ha krev;

nyns esa bythkweth aga far,

na ny vydh namoy a'y wosa,

bys vlydhynyow henedhow ha henedhow.

3Tan a dhevor a-dheragdha,

hag a-dryv dhedha flamm a lesk.

An tir yw avel lowarth Eden a-dheragdha,

hag a-dryv dhedha gwylvos difeyth;

vri, ny vydh diank anedha.

4Aga semlans yw avel semlans mergh;

ha kepar ha kasvergh y hwrons i poenya.

5Kepar ha gans tros charettow,

lemmel a wrons war bennow an menydhyow,

avel tros flamm tan

ow tevorya an sowl,

avel pobel grev

arayys rag kas.

6A-ragdha poblow a gren:

oll an fasow a gyll aga liw.

7Poenya a wrons avel tus krev;

i a yskynn an fos avel kasoryon;

i a geskerdh yn-rag, pubonan didro yn y fordh y honan,

ha ny dreylyons mes a'ga hynsyow.

8Ny wrons i gwaska an eyl erbynn y gila;

pubonan a gerdh yn y hyns y honan:

stevya a wrons yn mysk kowas a sethow,

heb treylya a-denewen.

9Assaltya an sita a wrons;

ha poenya war an fos;

krambla a wrons war an chiow,

hag entra der an fenestri avel lader.

10An dor a wra krysya a-dheragdha;

an nevow a gren:

an howl ha'n loer a dewlha,

an ster a skon a derlentri.

11Ha'n Arloedh a wra dyllo y lev

a-dherag y lu,

rag y gaslys yw pur vras,

ha krev yw ev neb a gollenow y er.

Rag meur yw dydh an Arloedh

ha pur euthyk; ha piw a yll y berthi?

Duw a Elow rag Edrega

12Lemmyn ytho, yn-medh an Arloedh,

treylyewgh dhymm gans oll agas kolonn,

ha gans penys, ha gans oelva, ha gans kynvann.

13Skwardyewgh agas kolonn, a-der agas dillas,

ha treylyewgh arta dhe'n Arloedh agas Duw,

rag grassyes ha truedhek yw,

lent ow serri, ha meur y dregeredh,

hag ev a gemmer edrek a'n drog.

14Piw a woer mar kwra ev dehweles ha kemmeres edrek,

ha gasa bennath a-dryv dhodho,

offrynn greun hag offrynn diwes

dhe'n Arloedh agas Duw?

15Hwythewgh an hirgorn yn Sion,

sakrewgh penys,

gelwewgh kuntelles solem.

16Kuntellewgh an bobel,

sakrewgh an kuntelles,

gelwewgh an dus hen war-barth,

kuntellewgh an fleghes

ha'n re ow tena an vronn:

gases an gour pries y stevell,

ha'n venyn bries hy chambour.

17Gwres an oferysi, menystrys an Arloedh,

oela ynter an porth ha'n alter,

ha leverens, ‘Spar, A Arloedh, dha bobel,

ha na ro dha ertach yn disenor,

ensampel dhe'n kenedhlow.

Prag y leverons yn mysk an poblow,

“Ple'ma aga Duw?” ’

Gorthyp Duw ha'y Ambos

18Ena y hwra an Arloedh perthi avi orth y dir,

ha kemmeres pita a'y dus.

19An Arloedh a worthybis ha leverel dh'y bobel,

Awotta, my a dhannvon dhywgh ys ha gwin hag oyl,

ha lenwys vydhowgh gansa:

ha nevra namoy ny rov dhywgh

disenor yn mysk an kenedhlow.

20Ha my a bellha dhiworthowgh lu an kledhbarth,

ha'y fesya yn syghtir ha difeyth,

gans y fas troha mor an est,

ha'y dhelergh troha mor an howlsedhes;

ha'y fler a wra drehevel, ha'y flerynsi a dheu yn-bann.

Rag ev re wrug taklow bras.

21Na borth own, a dir;

bydh heudhik ha lowenha:

rag an Arloedh re wrug taklow bras.

22Na berthewgh own, hwi vestes an gwel:

rag peurvaow an gwylvos yw gwyrdh;

an wydhenn a dheg hy frut,

an figbrenn ha'n gwinbrenn a re aga nerth.

23Ytho bedhewgh heudhik, hwi vebyon Sion,

ha lowenhewgh y'n Arloedh agas Duw:

rag ev re ros dhywgh an glaw a-varr rag ewnder,

hag ev re dhros glaw yn-nans ragowgh:

glaw a-varr ha glaw diwedhes kepar hag y'n dalleth.

24An leuryow-drushya a vydh leun a ys,

ha'n gwinwaskow a fenn a win hag oyl.

25My a astiver dhywgh an blydhynyow

a wrug hes an lokustes aga dybri,

an lokust diaskell, an lokust distruel, ha'n lokust yowynk,

ow lu bras a dhannvenis yn agas mysk.

26Hwi a dheber ha bos lenwys,

ha gormel hanow an Arloedh agas Duw,

neb re'gas dyghtyas marthys da,

ha ny wra ow fobel perthi meth bynitha.

27Hwi a wodhvydh my dhe vos yn mysk Ysrael,

ha my dhe vos an Arloedh agas Duw, ha nyns eus nahen.

Ha ny wra ow fobel

perthi meth bynitha.

Spyrys Duw Dinewys Mes

28Ha wosa hemma

my a dhinwa ow spyrys war gig oll,

ha'gas mebyon ha'gas myrghes a wra profoesa,

ha'gas tus koth a hunros hunrosow

ha'gas gwer yowynk a wel gwelesigethow.2:28 2:28-32 yw niverys 3:1-5 y'n tekst ebrow ha'n Septuagint.

29Ynwedh war an wesyon ha'n maghtethyon,

y'n dydhyow na, y hwrav vy dinewi ow Spyrys.

30My a dhiskwa marthusyon y'n nevow hag y'n norvys, goes ha tan ha kolovenyow a vog. 31An howl a vydh treylys dhe dewlder, ha'n loer dhe woes, kyns dos dydh an Arloedh, bras hag euthyk. 32Ena y fydh sawys pubonan neb a elow war hanow an Arloedh; rag yn menydh Sion y fydh remenant dell leveris an Arloedh, hag yn Yerusalem an re a dhienk, neb a wra an Arloedh aga gelwel.