Breus Duw war an Kenedhlow

1Rag otta, y'n dydhyow na hag y'n termyn na, pan dhrov vy arta kethyon Yuda ha Yerusalem,3:1 3:1-21 yw niverys 4:1-21 y'n tekst ebrow ha'n Septuagint. 2my a guntell oll an kenedhlow ha'ga hembronk dhe nans Yehoshafat, ha mos yn breus gansa ena, a-barth ow fobel ha'm ertach Ysrael, drefenn i dh'aga skattra yn mysk an kenedhlow ha ranna ow thir. 3I re dewlis prenn rag ow fobel, ha kenwertha mebyon rag horys, ha gwertha mowesi rag gwin, mayth effens. 4Pandra esowgh hwi dhymm, A Tyr ha Sidon, hag oll ranndiryow Filistia? Esowgh hwi owth attyli dhymm? Mars esowgh hwi owth attyli dhymm, yn skav ha toeth men my a dreyl agas pemont arta war agas pennow agas honan. 5Rag hwi re gemmeras ow arghans ha'm owr, ha doen ow thresoryow teg yn agas templow. 6Mebyon Yuda ha mebyon Yerusalem hwi re werthas dhe'n Grekys, orth aga fellhe dhiworth aga oryon aga honan. 7Otta, my a wra dhedha difuna yn-mes a'n tyller ma's gwerthsowgh, ha my a dreyl agas attal arta war agas pennow agas honan. 8Ha my a werth agas mebyon ha'gas myrghes yn diwleuv mebyon Yuda, hag i a wra agas gwertha dhe'n Sabeanys, dhe genedhel pell; rag yndellma an Arloedh re gewsis.

Breus yn Nans Yehoshafat

9Deklaryewgh hemma yn mysk an kenedhlow:

pareusewgh rag bresel sans, gwrewgh dhe'n vreselyoryon difuna.

Des oll an soudoryon yn-rag,

i yn-bann.

10Mortholyewgh agas soghyow yn kledhedhyow,

ha'gas higow-skethra yn guwow;

Gwres an gwann leverel, ‘Kasor ov vy!’

11Dewgh yn uskis,

oll hwi an kenedhlow a-derdro,

omguntellewgh ena.

Dro yn-nans dha vreselyoryon, A Arloedh.

12Gwres an kenedhlow difuna,

ha dos yn-bann dhe nans Yehoshafat;

rag my a esedh rag breusi

oll an kenedhlow a-derdro.

13Kemmerewgh yn-bann an gromman,

rag an drevas yw adhves.

Dewgh, trettyewgh,

rag leun yw an winwask.

An kerynyow a fenn,

rag bras yw aga droktra.

14Routhow, routhow,

yn nans an ervirans!

Rag ogas yw dydh an Arloedh

yn nans an ervirans.

15Tewlhes yw an howl ha'n loer,

ha'n ster a skon a ri aga golow.

16An Arloedh a vedhygel dhiworth Sion,

ha dhiworth Yerusalem ev a ri y lev;

ha'n nevow ha'n norvys a gren,

mes an Arloedh yw skovva rag y bobel

ha kastell rag mebyon Ysrael.

Bennathow y'n Termyn a Dheu

17Yndellma hwi a wodhvydh

my dhe vos an Arloedh agas Duw,

trigys yn Sion, ow menydh sans.

Ha Yerusalem a vydh sans,

ha nevra ny wra estrenyon tremena dredhi namoy.

18Y'n jydh na

an menydhyow a dhever gans sugen grappys,

an breow a dhinwa leth

resek a wra oll goverow Yuda

gans dowr.

Fenten a dheu yn-mes dhiworth chi an Arloedh

ha dowra nans Shittim.

19Ejyp a vydh forsakys,

hag Edom a vydh gwylvos ynyal,

drefenn an freudh gwrys erbynn mebyon Yuda,

rag i re skoellyas goes gwiryon yn aga thir.

20Mes Yuda a vydh annedhys bynitha,

ha Yerusalem dhe henedhow oll.

21My a gemmer dial a'ga goes, ha ny asav denvyth dhe vos heb kessydhyans,

rag an Arloedh a drig yn Sion.