1Ger an Arloedh hag a dheuth dhe Yoel mab Pethuel.

Kynvann war an Tir Difeythys gans Lokustes

2Klewewgh hemma, hwi henavogyon,

ha rewgh skovarn, oll hwi annedhysi an tir.

A hwarva tra a'n par ma yn agas dydhyow,

po yn dydhyow agas tasow?

3Derivewgh hemma orth agas fleghes,

ha'ga fleghes orth aga fleghes i,

ha'ga fleghes dhe henedh arall.

4An pyth a asas an lokust yowynk

an hes a lokustes re'n dybris;

ha'n pyth a asas an hes,

an lokust diaskell re'n dybris;

ha'n pyth a asas an lokust diaskell

an lokust distruel re'n dybris.

5Difunewgh, hwi bennow-medhow, hag oelewgh;

oulyewgh, oll hwi dhiwessoryon gwin,

drefenn an gwin nowydh,

drefenn y vos treghys dhe-ves a-dhiworth agas ganow.

6Rag kenedhel re yskynnas war ow thir,

krev ha diniver;

hy dyns yw dyns lew,

hag yma dhedhi diwen lewes.

7Hi re dhifeythyas ow gwinbrenn,

ha terri ow figbrenn;

hi re'n diruskas glan ha'y dewlel dhe-ves;

y skorrennow yw gwrys gwynn.

8Gwra kyni avel gwyrghes grogysys gans yskar

rag gour hy yowynkneth.

9Treghys dhe-ves yw offrynn greun hag offrynn diwes

a-dhiworth chi an Arloedh;

an oferysi a gyn,

menystrys an Arloedh.

10Gwastys yw an gwel,

an tir a dhesygh;

drefenn bos gwastys an ys;

desyghys yw an gwin nowydh,

an oyl a fyll.

11Kemmerewgh meth, hwi diogyon;

oulyewgh, a hwi wonedhysi gwinlannow,

rag an gwaneth ha rag an heydh,

drefenn bos diswrys trevas an gwel.

12Desyghys yw an gwinbrenn,

ha'n figbrenn a wannha;

an reunavalwydhenn, an balmwydhenn ynwedh, ha'n avalwydhenn,

devri oll gwydh an gwel: yw gwedhrys;

rag gwedhrys yw lowena

a-dhiworth mebyon den.

Galow dhe Edrega ha Pysadow

13Omwrogysewgh ha kyni, hwi oferysi;

oulyewgh, hwi venystrys an alter:

dewgh, spenewgh an nos yn yskar,

hwi venystrys ow Duw:

rag an offrynn greun ha'n offrynn diwes

yw kemmerys dhe-ves dhiworth chi agas Duw.

14Sakrewgh penys,

gelwewgh kuntelles solem,

kuntellewgh an dus hen,

oll annedhysi an tir,

yn chi an Arloedh agas Duw,

ha kriewgh war an Arloedh.

15Ellas rag an jydh!

rag ogas yw dydh an Arloedh,

hag avel terroes dhiworth an Ollgalloesek y teu.

16A nyns yw treghys dhe-ves an boes

a-rag agan lagasow,

lowena ha heudhder

dhiworth chi agan Duw?

17Gwedhrys yw an hasennow yn-dann aga figellow,1:17 figellow: Styr an Ebrow yw ansertan; martesen pigellow rag igeri an dowrheans.

forsakys yw an skiberyow,

terrys yn-nans yw an greunjiow,

rag gwedhrys yw an ys.

18Assa wra an gwarthek hanasa!

Penndegys yw an oghen,

drefenn nag eus peur dhedha;

devri, gwrys yn ahwer yw greow an deves.

19Dhiso ji. A Arloedh, y kriav:

rag tan re dhevoryas

peurvaow an gwylvos;

ha flamm re gowlloskas oll gwydh an gwel.

20Bestes an gwel a gri warnas ynwedh:

rag bos desyghys goverow an dowr,

ha tan re dhevoryas

peurvaow an gwylvos.