An Untyans yn Bethani

Mat 26:6-13; Mark 14:3-9

1Ena, hwegh dydh kyns an pask, Yesu a dheuth dhe Bethani le mayth esa Lazarus12:1 Lazarus neb a wrug ev y dhrehevel dhiworth an re varow: War-lergh re a'n dornskrifow Lazarus neb a via marow. neb a wrug ev y dhrehevel dhiworth an re varow. 2Ytho i a wrug kevewi dhodho ena, hag yth esa Maria ow servya, ha Lazarus a veu onan a'n re esedhys orth an voes ganso. 3Ena Maria a gemmeras peuns12:3 peuns: Greka litra. a unyent, nard pur, meur y bris, hag untya treys Yesu, ha sygha y dreys gans hy gols; ha'n chi a veu lenwys a ethenn an unyent. 4Hag yn-medh Yudas Skaryoth, onan a'y dhyskyblon, neb a vedha orth y drayta, 5‘Prag na veu an unyent ma gwerthys a drihans diner, ha'n mona res dhe'n voghosogyon?’ 6Ny leveris hemma rag bos dhodho bern a-barth an voghosogyon, mes rag ev dhe vos lader, hag ev a witha an pors, ha ladra an pyth o gorrys ynno. 7Ytho Yesu a leveris, ‘Gwra hy gasa yn kres; hi re'n gwithas12:7 hi re'n gwithas: War-lergh re a'n dornskrifow Gwres hi y witha. rag dydh ow ynkleudhyans. 8Rag hwi a gyv an voghosogyon pub eur genowgh, mes my ny'm kevowgh pup-prys.’

An Bras erbynn Lazarus

9Ytho routh veur a'n Yedhewon a glewas ev dhe vos ena, ha ny dheuthons unnsel rag Yesu, mes ynwedh may hwellens Lazarus, neb a wrug ev y dhrehevel dhiworth an re varow. 10Mes an bennoferysi a dewlis towl dhe ladha Lazarus ynwedh, 11rag dredho ev y feu lies a'n Yedhewon ow treylya dhe-ves hag ow krysi yn Yesu.

Devedhyans Yesu dhe Yerusalem yn Trygh

Mat 21:1-11; Mark 11:1-11; Luk 19:28-40

12Ternos an routh veur neb o devedhys dhe'n goel, pan glewsons Yesu dhe dhos dhe Yerusalem, 13a gemmeras skorrennow palm ha mos yn-mes dh'y vetya, hag i a grias,

‘Hosanna!

Benniges yw neb a dheu yn hanow an Arloedh!

Myghtern Ysrael!’

14Ha Yesu a gavas asen yowynk, hag ev a esedhas warnodho, dell yw skrifys,

15‘Na gemmer own, myrgh Sion;

otta, dha vyghtern a dheu,

esedhys war ebel asen.’

16Ny gonvedhas y dhyskyblon hemma wostalleth, mes pan veu Yesu glorifiys, ena i a borthas kov hemma dhe vos skrifys a-dro dhodho, hag i dhe wul hemma ragdho. 17Ytho an routh neb esa ganso pan elwis ev Lazarus dhiworth an bedh, ha'y dhrehevel dhiworth an re varow, a dhug dustuni. 18Rakhenna an routh eth dh'y vetya, rag i a glewsa ev dhe wul an tokyn ma. 19Ytho an Fariseow a leveris an eyl dh'y gila, ‘Hwi a wel, nag eus prow vyth dhywgh. Otta, an bys yw gyllys war y lergh.’

Grekys a Hwila Yesu

20Yth esa Grekys yn mysk an re esa ow tos yn-bann dhe wordhya y'n goel. 21Ytho an re ma a dheuth dhe Felip, neb o a Bethsaida yn Galile, ha govynn orto ow leverel, ‘Syrra, ni a vynn gweles Yesu.’ 22Felip a dheuth ha leverel dhe Androw, hag arta Androw ha Felip a leveris dhe Yesu. 23Yesu a worthybis dhedha ow leverel, ‘Devedhys yw an eur may fo Mab an den glorifiys. 24Yn hwir, yn hwir y lavarav dhywgh, marnas hasenn a ys a goedh dhe'n dor ha merwel, hi a bes hy honan; mes mar merow, hi a dheg meur a frut. 25Neb a gar y vewnans a wra y gelli, ha neb a gas y vewnans y'n bys ma a'n gwith bys yn bewnans heb diwedh. 26Piwpynag a'm serfyo, gwres ev ow siwya; hag y'n tyller mayth esov, ena ynwedh y fydh ow servont. Piwpynag a'm serfyo, an Tas a wra y enora.

Yesu a Dhargan y Vernans

27‘Lemmyn ow enev yw troblys; ha pandr'a lavarav? “A Das, gwra ow selwel dhiworth an eur ma”? Mes rakhemma y teuth vy bys y'n eur ma. 28A Das, gwra glorifia dha hanow.’ Ena lev a dheuth dhiworth nev, ‘My a'n glorifias, ha my a'n glorifi arta.’ 29An routh neb a sevi ena a'n klewas, ha leverel hi dhe wul taran; re erell a leveris, ‘El re gewsis dhodho.’ 30Yesu a worthybis ha leverel, ‘Ny dheuth an lev a'm govis vy mes ragowgh hwi. 31Lemmyn yth yw breus an bys ma, lemmyn y fydh pryns an bys ma tewlys yn-mes. 32Ha my, pan viv drehevys a'n norvys, a denn tus oll dhymmo vy.’ 33Ev a leveris hemma, ow styrya py par mernans a vedha ow merwel dredho. 34Ytho an routh a worthybis dhodho, ‘Ni re glewas y'n lagha, Krist dhe besya bynitha; ha fatell leverowgh y tal Mab an den dhe vos drehevys? Piw yw an “Mab an den” ma?’ 35Ena Yesu a leveris dhedha, ‘Hwath pols byghan yma an golow genowgh. Kerdhewgh hedre vo genowgh an golow, ma na wrello tewlder agas dalghenna. Neb a gerdh y'n tewlder ny woer ple'th a. 36Hedre vo genowgh an golow, trestyewgh y'n golow, rag may fowgh mebyon an golow.’ Yesu a gewsis hemma, hag ev eth dhe-ves hag omgudha ragdha.

Diskryjyans an Yedhewon

37Kyn hwrussa kemmys toknys a-ragdha, hwath ny gryssons ynno, 38may fe kollenwys an lavar a gewsis Ysay an profoes,

‘Arloedh, piw re grysis agan pregoth,

ha piw re beu bregh an Arloedh diskwedhys dhodho?’

39Rakhenna ny allsons krysi, rag arta Ysay a leveris,

40‘Ev re dhallhas aga dewlagas,

hag ev re galeshas aga holonn,

rag na hwrellons gweles gans aga dewlagas,

na konvedhes gans aga holonn, na bos treylys,

may hwrylliv aga sawya.’

41Ysay a leveris hemma rag ev dhe weles12:41 rag ev dhe weles: War-lergh re a'n dornskrifow pan welas ev. y wolewder, hag ev a gewsis anodho ev. 42Byttegyns lies hwath a'n rewloryon a grysis ynno, mes drefenn an Fariseow ny wrussons y gonfessya, ma na vens emskemunys a'n synaga; 43rag i a garas gormel tus moy es gormel Duw.

44Yesu a grias ha leverel, ‘Neb a grys ynnov vy, ny grys ynnov vy mes ynno ev neb a'm dannvonas, 45hag ev neb a'm gwel vy a'n gwel ev neb a'm dannvonas. 46Devedhys ov y'n bys kepar ha golow, rag na wrello piwpynag a grysso ynnov vy triga yn tewlder. 47Ha piwpynag a glywvo ow geryow heb aga gwitha,12:47 heb aga gwitha: War-lergh re a'n dornskrifow heb krysi. ny wrav vy y vreusi, rag nyns ov vy devedhys dhe vreusi an bys mes dhe selwel an bys. 48Ev neb a'm nagh, ha na dhegemmer ow geryow, yma dhodho nebonan a wra y vreusi; an ger a gewsis vy, henna a wra y vreusi dydh fin. 49Rag ny gewsis vy ahanav ow honan, mes an Tas a'm dannvonas, ev a ros dhymm gorhemmynn, pandra dhe leverel ha pandra dhe gewsel. 50Ha my a woer y worhemmynn dhe vos bewnans heb diwedh. Pup-tra a gowsav ytho, kepar dell leveris an Tas dhymm, yndella y kowsav.’