Yesu an Fordh dhe'n Tas

1‘Na vedhes troblys agas kolonn; hwi a grys yn Duw, krysewgh ynwedh ynnov vy. 2Yn chi ow Thas yma lies trigva. Mar ny ve, a wrussen vy leverel dhywgh my dhe vos dhe bareusi tyller ragowgh?14:2 a wrussen vy leverel dhywgh my dhe vos dhe bareusi tyller ragowgh: War-lergh re a'n dornskrifow my a wrussa leverel dhywgh; yth av dhe bareusi tyller ragowgh. 3Ha mar kwrav vy mos ha pareusi tyller ragowgh, my a dhehwel arta ha'gas kemmeres dhymm ow honan, may fowgh hwi ynwedh y'n tyller mayth esov vy. 4Ha dhe'n tyller mayth av, hwi a woer an fordh.’14:4 Ha dhe'n tyller mayth av, hwi a woer an fordh: War-lergh re a'n dornskrifow Ha hwi a woer ple'th av, ha hwi a woer an fordh. 5Tommas a leveris dhodho, ‘Arloedh, ny wodhon ple'th edh; fatell yllyn godhvos an fordh?’ 6Yn-medh Yesu dhodho, ‘My yw an fordh, ha'n gwir, ha'n bewnans. Ny dheu denvyth dhe'n Tas saw dredhov vy. 7Mar kwrussewgh ow aswonn vy, hwi a wrussa aswonn ow Thas vy ynwedh.14:7 Mar kwrussewgh ow aswonn vy, hwi a wrussa aswonn ow Thas vy ynwedh: War-lergh re a'n dornskrifow Mar kwrewgh ow aswonn vy, hwi a aswonn ow Thas vy ynwedh. Hag alemma rag hwi a'n aswonn, ha hwi re'n gwelas.’

8Felip a leveris dhodho, ‘Arloedh, diskwa dhyn an Tas, ha lowr vydh dhyn.’ 9Yn-medh Yesu dhodho, ‘Esen vy genowgh termyn mar hir, ha ny'm aswonnsys, Felip? Neb re'm gwelas vy re welas an Tas; ha fatell leverydh, “Diskwa dhyn an Tas”? 10A ny grysydh my dhe vos y'n Tas, ha'n Tas dhe vos ynnov vy? An geryow a gowsav dhywgh, ny's kowsav ahanav vy ow honan, mes an Tas neb a drig ynnov a wra y oberow.14:10 ynnov a wra y oberow: War-lergh re a'n dornskrifow ynnov, ev a wra an oberow. 11Krysewgh dhymm, my dhe vos y'n Tas ha'n Tas ynnov vy; poken krysewgh drefenn an oberow aga honan. 12Yn hwir, yn hwir y lavarav dhywgh, ev neb a grys ynnov vy, ev ynwedh a wra an oberow a wrav vy, hag oberow brassa agessa a wra, rag yth esov vy ow mos dhe'n Tas. 13Ha pypynag a wovynnowgh y'm hanow vy, henna a wrav, may fo glorifiys an Tas y'n Mab. 14Mar kovynnowgh tra y'm hanow vy, my a'n gwra.

Dedhewadyow an Spyrys

15‘Mara'm kerowgh, hwi a with14:15 hwi a with: War-lergh re a'n dornskrifow gwithewgh. ow gorhemmynnow. 16Ha my a vynn govynn orth an Tas, hag ev a re dhywgh konforter arall, may hwrello gortos genowgh rag nevra, 17an Spyrys a wiryonedh, neb na yll an bys y dhegemmeres, rag ny'n gwel na ny'n aswonn. Mes hwi a'n aswonn, rag ev a drig genowgh hag ev a vydh ynnowgh.

18‘Ny'gas gasav omdhivas; dos a wrav dhywgh. 19Hwath pols byghan ha'n bys ny'm gwel namoy; mes hwi a'm gwel, rag my a vew, ha hwi ynwedh a vew. 20Y'n jydh na hwi a wodhvydh my dhe vos y'm Tas, ha hwi ynnov vy, ha my ynnowgh hwi. 21Neb a'n jeves ow gorhemmynnow ha'ga gwitha, ev yw neb a'm kar; ha neb a'm kar a vydh kerys gans ow Thas, ha my a'n karvydh, ha diskwedhes ow honan dhodho.’ 22Yn-medh Yudas dhodho (nag o Skaryoth), ‘Arloedh, fatell yw, ty dhe vynnes omdhiskwedhes dha honan dhyn ni, a-der dhe'n bys?’ 23Yesu a worthybis ha leverel dhodho, ‘Piwpynag a'm karro a with ow geryow, ha'm Tas a'n karvydh, ha ni a dheu dhodho ha gul agan trigva ynno. 24Ev neb na'm kar ny with ow geryow; ha'n ger a glewowgh nyns yw ahanav vy, mes a'n Tas neb a'm dannvonas.

25‘My re gewsis hemma dhywgh, ha my hwath genowgh. 26Mes an Konforter, an Spyrys Sans neb a wra an Tas y dhannvon y'm hanow vy, ev a dhysk dhywgh pup-tra ha'gas kovha a bup-tra a leveris dhywgh. 27Kres a asav dhywgh, ow kres a rov dhywgh; ny rov dhywgh kepar dell re an bys. Na vedhes dha golonn troblys, ha na berthes own. 28Hwi re glewas my dhe leverel dhywgh, yth av dhe-ves, ha my a dhehwel dhywgh. Mara'm karrewgh, lowenhe a wrussewgh, my dhe vos dhe'n Tas, rag ow Thas yw brassa agesov vy. 29Ha lemmyn my re'n leveris dhywgh kyns ev dhe hwarvos, rag may kryssowgh pan hwer. 30Ny wrav vy kewsel meur genowgh na fella, rag pryns an bys a dheu; ha ny'n jeves galloes warnav. 31Mes rag may hwodhvo an bys my dhe gara an Tas, ha kepar dell worhemmynnis dhymm an Tas, yndella y hwrav. Sevewgh, deun ni alemma.