Pysadow Yesu

1Wosa kewsel an taklow ma, Yesu a dhrehevis y dhewlagas dhe nev ha leverel, ‘Tas, re dheuth an eur; ro glori dhe'th Vab, rag may hwrello dha Vab ri glori dhiso jy, 2kepar dell resys dhodho galloes dres oll kig, may rollo bewnans heb diwedh dhe vyns re resys dhodho. 3Ha hemm yw bewnans heb diwedh: ma'th aswonnons ty, an unn gwir Dhuw, ha Yesu Krist neb re dhannvensys. 4My re'th glorifiis war an norvys, ow kowlwul an ober a resys dhymm dhe wul. 5Ha lemmyn gwra ow glorifia, A Das, y'th wolok dha honan, gans an glori a'm beu genes kyns bos an bys.

6‘My re dhiskwedhas dha hanow dhe'n dus a resys dhymm yn-mes a'n bys. Dhiso jy yth ens, ha ty a's ros dhymm, hag i re withas dha er. 7Lemmyn i a woer, pup-tra re resys dhymm dhe vos ahanas jy. 8Rag my re ros dhedha an geryow a resys dhymm, hag i a's degemmeras hag a gonvedhas yn gwirder my dhe dhos ahanas, hag i a grysis ty dhe'm dannvon. 9Ragdha i y pysav, ny bysav rag an bys mes rag an re a resys dhymm, rag dhiso jy yth yns, 10ha dhiso jy yw pup-tra a'm beus, ha glorifiys ov ynna i. 11Ha lemmyn nyns esov vy y'n bys namoy, mes an re ma ymons y'n bys, ha my a dheu dhis. A Das sans, gwra aga gwitha y'th hanow jy hag a resys dhymm, may fons i onan kepar dell on nyni. 12Pan esen gansa,17:12 gansa: War-lergh re a'n dornskrifow gansa y'n bys. my a's synsis y'th hanow jy hag a resys dhymm, ha my a's gwithas, ha ny veu denvyth anedha kellys, marnas an mab a dhiswrians, may fe kollenwys an skryptor. 13Mes lemmyn y tov dhis, ha'n taklow ma a gowsav y'n bys, rag ma's teffo ow lowender kowlwrys ynna aga honan. 14My a ros dhedha dha er, ha'n bys a's kasas, rag nyns esons i a'n bys, kepar dell nag esov vy a'n bys. 15Ny wovynnav ty dh'aga hemmeres yn-mes a'n bys, mes ty dh'aga gwitha rag an tebel el. 16Nyns yns i a'n bys, kepar dell nag ov vy a'n bys. 17Gwra aga sakra y'n gwirder; dha er yw gwirder. 18Kepar dell wrussys ow dannvon vy y'n bys, yndella my ynwedh re's dannvonas i y'n bys. 19Hag a-barth dhedha i omsakra a wrav ow honan, rag may fons i ynwedh sakrys y'n gwirder.

20‘Ny wrav vy pysi rag an re ma yn unnsel, mes rag an re a grys ynnov der aga ger, 21rag may fons i oll onan, kepar ha ty, A Das, ynnov vy ha my ynnos jy, rag may fons i ynwedh onan17:21 ynwedh onan ynnon ni: War-lergh re a'n dornskrifow ynwedh ynnon ni. ynnon ni, may krysso an bys ty dhe'm dannvon. 22Ha'n glori a resys dhymm, my re'n ros dhedha i, may fons i onan kepar dell on ni onan, 23my ynna i, ha ty ynnov vy, may fons i gwrys perfydh yn onan, may hwodhvo an bys ty dhe'm dannvon, ha'ga hara i kepar dell wrussys ow hara vy. 24A Das, my a vynn an re a resys dhymm i ynwedh dhe vos genev vy le mayth esov, rag may hwellons ow glori a resys dhymm, rag ty a'm karas kyns gwrians an bys.

25‘A Das gwiryon, ny wra an bys dha aswonn, mes my a'th aswonn, ha'n re ma a woer ty dhe'm aswonn. 26My a dherivas dhedha dha hanow, ha my a wra y dherivas, may fo ynna i an gerensa dredhi may hwrussys ow hara vy, ha my ynna i.’