1Ena Pilat a gemmeras Yesu, ha'y skorjya. 2Ha'n soudoryon a blethas kurun a spern ha'y gorra war y benn, hag i a'n kwethas gans mantell a burpur, 3hag yth esens ow tos dhodho ha leverel, ‘Hayl, myghtern an Yedhewon!’ hag ow ri dhodho hwattys. 4Ha Pilat eth yn-mes arta ha leverel dhedha, ‘Otta, my a'n dro yn-mes dhywgh, rag may hwodhvowgh na welav ken vytholl er y bynn.’ 5Ytho Yesu a dheuth yn-mes, ow kwiska an gurun a spern ha'n vantell a burpur, hag yn-medh ev dhedha, ‘Awott an den!’ 6Ytho pan y'n gwelas an bennoferysi ha'n soedhogyon, i a armas, ‘Krowsy e, krowsy e!’ Yn-medh Pilat dhedha, ‘Kemmerewgh e agas honan ha'y growsya; rag ny welav ken er y bynn.’ 7An Yedhewon a worthybis dhodho, ‘Yma dhyn lagha, ha herwydh an lagha na y tal dhodho merwel, rag ev a omwrug Mab Duw.’

8Ytho pan glewas Pilat an lavar ma, ev a borthas own dhe voy, 9hag ev eth a-bervedh y'n lys arta, ha leverel dhe Yesu, ‘A-ble osta?’ Mes ny ros Yesu gorthyp dhodho. 10Ytho yn-medh Pilat dhodho, ‘A ny gewsydh dhymm? A ny wodhes bos dhymm galloes dhe'th telivra, ha bos dhymm galloes dhe'th krowsya?’ 11Yesu a worthybis, ‘Ny via dhis maystri warnav mar ny ve res dhis a wartha; rakhenna yma dhe neb a'm daskorras dhis an brassa pegh.’ 12Alena rag, Pilat a hwila y livra; mes an Yedhewon a armas, ow leverel, ‘Mar livrydh an den ma, nyns osta koweth Sesar.’

13Pilat ytho pan glewas an geryow ma a dhros Yesu yn-mes, hag esedha war an barr yn tyller henwys an Leur a Leghven, hag yn Ebrow Gabbatha. 14Ha dydh darbar an pask o, a-dro dhe'n hweghves eur. Hag yn-medh ev dhe'n Yedhewon, ‘Awotta agas myghtern!’ 15Ytho i a armas, ‘Kemmer e dhe-ves, kemmer e; krowsy e!’ Yn-medh Pilat dhedha, ‘A wrav vy krowsya agas myghtern?’ An bennoferysi a worthybis, ‘Nyns eus dhyn myghtern marnas Sesar.’ 16Ena ev a'n delivras dhedha dhe vos krowsys.

Krowsyans Yesu

Mat 27:32-44; Mark 15:21-32; Luk 23:26-43

Ytho i a gemmeras Yesu, 17hag ev eth yn-rag ow toen y grows y honan bys yn tyller henwys Tyller Krogen, hag yn Ebrow, Golgotha; 18i a'n krowsyas ena ha ganso dew arall, onan a bub tu, ha Yesu y'n kres. 19Ha Pilat a skrifas titel, ha'y worra war an grows; ha skrifys veu: Yesu a Nazareth, Myghtern an Yedhewon. 20Lies a'n Yedhewon a redyas an titel ma, rag bos an tyller may feu Yesu krowsys ogas dhe'n sita; ha skrifys veu yn Ebrow, Greka ha Latin.19:20 Ebrow, Greka ha Latin: War-lergh re a'n dornskrifow Ebrow, Latin ha Greka. 21Ytho yn-medh pennoferysi an Yedhewon dhe Pilat, ‘Na skrif “Myghtern an Yedhewon”, mes ev dhe leverel “My yw myghtern an Yedhewon”.’ 22Pilat a worthybis, ‘An pyth a skrifis, my re'n skrifas.’ 23Ena an soudoryon, pan wrussens krowsya Yesu, a gemmeras y dhillas ha gul peder rann, dhe bub souder rann, hag ynwedh an bows. Mes an bows o heb gwri, gwiys a'n gwartha yn unn darn. 24Yn-medhons ytho an eyl dh'y gila, ‘Na wren hy skwardya, mes gwren ni tewlel prenn rygdhi, piw y fydh dhodho’; may fe kollenwys an skryptor a lever,

‘I a rannas ow dillas yntredha,

ha war ow gwisk i a dewlis prenn.’

Ytho an soudoryon a wrug an taklow ma.

25Ogas dhe grows Yesu yth esa ow sevel y vamm ha hwoer y vamm, Maria gwreg Klopas, ha Maria Magdalena. 26Ytho pan welas Yesu y vamm ha'n dyskybel a gara ow sevel yn ogas, yn-medh ev dh'y vamm, ‘Benyn, awotta dha vab.’ 27Ena yn-medh ev dhe'n dyskybel, ‘Awotta dha vamm.’ Hag alena rag an dyskybel a's kemmeras yn y dre y honan.

Mernans Yesu

Mat 27:45-56; Mark 15:33-41; Luk 23:44-49

28Wosa hemma, Yesu, ow kodhvos pup-tra lemmyn dhe vos kowlwrys, may fe kollenwys an skryptor, a leveris, ‘Yma syghes dhymm.’ 29Yth esa lester re beu gorrys ena, leun a aysel; ytho i a worras spong leun a'n aysel war hyssop19:29 i a worras spong leun a'n aysel war hyssop: War-lergh re a'n dornskrifow i a lenwis spong gans aysel, ha'y worra war hyssop. ha'y brofya dh'y anow. 30Ytho pan wrussa Yesu kemmeres an aysel, ev a leveris, ‘Kowlwrys yw.’ Hag ow poesa y benn war-rag, ev a dhaskorras an enev.

Tenewen Yesu Gwenys gans Guw

31Ytho rag y vos dydh an darbar, rag na worta an korfow war an grows y'n sabot (rag bos dydh an sabot na dy'goel ughel), an Yedhewon a bysis Pilat may fe terrys aga diwarr ha may fens degys dhe-ves. 32Ytho an soudoryon a dheuth ha terri diwarr an kynsa, hag a'n arall a veu krowsys ganso. 33Mes pan dheuthons dhe Yesu ha gweles y vos marow seulabrys, ny dorrsons y dhiwarr. 34Mes onan a'n soudoryon a wanas y denewen gans guw, ha desempis y teuth yn-mes goes ha dowr. 35Hag ev neb a'n gwelas re dhug dustuni, ha'y dhustuni yw gwir; ev a woer ev dhe gewsel gwiryonedh, rag may kryssowgh hwi. 36Ha'n taklow ma a hwarva may fe kollenwys an skryptor, ‘Ny vydh askorn anodho terrys.’ 37Hag arta skryptor arall a lever, ‘I a vir warnodho neb a wansons.’

Ynkleudhyans Yesu

Mat 27:57-61; Mark 15:42-47; Luk 23:50-56

38Wosa hemma, Yosep a Arimathea, onan a dhyskyblon Yesu, mes yn priva rag own a'n Yedhewon, a bysis Pilat may kemmerra korf Yesu. Ha Pilat a ros kummyas. Ytho ev a dheuth ha kemmeres y gorf. 39Nikodemus ynwedh a dheuth, ev neb a dheuth dhodho wostalleth yn nos, ow tri kemmysk a vyrr hag aloes, a-dro dhe gans peuns.19:39 peuns: Greka litra. 40Ytho i a gemmeras korf Yesu ha'y vaylya yn lystennow lien war-lergh us an Yedhewon rag ynkleudhyans. 41Lemmyn y'n tyller may feu Yesu krowsys yth esa lowarth, hag y'n lowarth yth esa bedh nowydh, na via denvyth bythkweth gorrys ynno. 42Ytho, drefenn dydh Darbar an Yedhewon, ha rag bos an bedh ogas, i a worras Yesu ena.