Dasserghyans Yesu

Mat 28:1-10; Mark 16:1-8; Luk 24:1-12

1Y'n kynsa dydh a'n seythun, Maria Magdalena a dheuth dhe'n bedh a-varr myttin, pan o hwath tewl, ha hi a welas an men kemmerys dhiworth an bedh. 2Ytho hi eth yn unn boenya dhe Simon Peder ha dhe'n dyskybel arall a wre Yesu y gara, hag yn-medh hi dhedha, ‘I re gemmeras an Arloedh yn-mes a'n bedh, ha ny wodhon ple'n gorrsons.’ 3Ytho Peder eth yn-mes, ha'n dyskybel arall, ow mos dhe'n bedh. 4Ytho i a boenyas aga dew war-barth; ha'n dyskybel arall a boenyas yn-rag skaffa es Peder, hag ev a dheuth yn kynsa dhe'n bedh. 5Ev a ynklinyas ha gweles an lystennow ow krowedha ena, byttegyns nyns eth ev a-bervedh. 6Ena Peder a dheuth, orth y siwya, hag eth a-bervedh y'n bedh, hag ev a welas an lystennow ow krowedha, 7ha'n gweth, re bia a-dro dh'y benn; nyns esa ow krowedha gans an lystennow, mes maylys war-barth yn tyller arall. 8Ena an dyskybel arall ynwedh, neb a dhothya yn kynsa dhe'n bedh, eth a-bervedh, hag ev a welas, hag a grysis. 9Rag ny gonvedhsens na hwath an skryptor, y koedhva dhodho dasserghi dhiworth an re varow. 10Ena an dhyskyblon eth dhe-ves arta dh'aga threvow aga honan.

An Omdhiskwedhyans dhe Varia Magdalena

Mark 16:9-11

11Mes Maria a sevi a-ves dhe'n bedh, owth oela. Ha hi owth oela, hi a ynklinyas dhe vires y'n bedh, 12ha gweles dew el gwiskys yn gwynn, esedhys onan dhe'n penn hag onan dhe'n treys, le may fia korf Yesu ow krowedha. 13Hag i a leveris dhedha, ‘A venyn, prag yth oelydh?’ Yn-medh hi dhedha, ‘I re gemmeras ow Arloedh dhe-ves, ha ny wonn ple'n gorrsons.’ 14Ha wosa leverel hemma, hi a dreylyas war-dhelergh ha gweles Yesu ow sevel; mes ny wodhya y vos Yesu. 15Yn-medh Yesu dhedhi, ‘A venyn, prag yth oelydh? Piw a hwilydh?’ Hi, ow tybi y vos an lowarther, a leveris dhodho, ‘Syrra, mar kwrussys y dhoen dhe-ves, lavar dhymm le ma'n gorrsys, ha my a'n kemmer.’ 16Yn-medh Yesu dhedha, ‘Maria!’ Hi a dreylyas ha leverel dhodho yn Ebrow, ‘Rabboni’, (henna a styr, Mester). 17Yn-medh Yesu dhedhi, ‘Na wra ow thochya, rag nyns ov vy yskynnys na hwath dhe'n Tas; mes ke dhe'm breder ha lavar dhedha, “My a yskynn dhe'm Tas vy ha dh'agas Tas hwi, dhe'm Duw vy ha dh'agas Duw hwi”.’ 18Maria Magdalena eth ha derivas dhe'n dhyskyblon hi dhe weles an Arloedh, hag ev dhe gewsel an taklow ma dhedhi.

Omdhiskwedhyans Yesu dhe'n Dhyskyblon

Mat 28:16-20; Mark 16:14-18; Luk 24:36-49

19Ena yn gorthugher an keth jydh ma, an kynsa dydh a'n seythun, ha'n darasow deges le mayth esa an dhyskyblon20:19 an dhyskyblon: War-lergh re a'n dornskrifow an dhyskyblon kuntellys. rag own a'n Yedhewon, Yesu a dheuth ha sevel yn aga mysk, ha leverel dhedha, ‘Kres dhywgh.’ 20Ha wosa leverel hemma, ev a dhiskwedhas dhedha y dhiwleuv ha'y denewen. Ytho an dhyskyblon a lowenhas, ow kweles an Arloedh. 21Ena yn-medh Yesu dhedha arta, ‘Kres dhywgh. Kepar dell wrug ow Thas ow dannvon vy, yndella my a's dannvon hwi.’ 22Ha wosa leverel hemma, ev a anellas warnedha ha leverel dhedha, ‘Degemmerewgh an Spyrys Sans. 23Dhe biwpynag y hwryllowgh gava aga feghosow, gevys yns dhedha, ha dhe biwpynag y's gwithowgh, gwithys yns.’

Yesu ha Tommas

24Mes Tommas, onan a'n dewdhek, henwys Didymus, nyns esa gansa pan dheuth Yesu. 25Ytho an dhyskyblon erell a leveris dhodho, ‘Ni re welas an Arloedh.’ Mes yn-medh ev dhedha, ‘Marnas my a wel yn y dhiwleuv merk an kentrow, ha dri ow bys yn merk an kentrow ha dri ow leuv yn y denewen, ny wrav vy krysi.’

26Ha dhe benn eth dydh, yth esa y dhyskyblon a-bervedh arta, ha Tommas gansa. Yesu a dheuth, ha'n darasow deges, ha sevel y'n kres ha leverel, ‘Kres dhywgh.’ 27Ena yn-medh ev dhe Tommas, ‘Doro dha vys omma ha gwel ow diwleuv; ha doro dha leuv ha'y gorra y'm tenewen, ha na vydh diskryjyk, mes kryjyk.’ 28Tommas a worthybis, ha leverel dhodho, ‘Ow Arloedh, ha'm Duw!’ 29Yn-medh Yesu dhodho, ‘Rag ty dhe'm gweles ty re gryssys; gwynnvys kemmys na'm gwelas, mes i a grys.’

Porpos an Lyver

30Yesu a wrug lies tokyn arall yn golok y dhyskyblon, nag yw skrifys y'n lyver ma. 31Mes an re ma yw skrifys rag may kryssowgh Yesu dhe vos an Krist, Mab Duw, hag ow krysi may fo dhywgh bewnans yn y hanow ev.