Omdhiskwedhyans Yesu dhe Seyth Dyskybel

1Wosa hemma, Yesu a omdhiskwedhas y honan arta orth mor Tiberias; hag yndella yth omdhiskwedhas. 2Yth esa ena war-barth Simon Peder, ha Tommas henwys Didymus, ha Nathanael a Kana yn Galile, ha mebyon Zebede, ha dew arall a'y dhyskyblon. 3Simon Peder a leveris dhedha, ‘My a dhe byskessa.’ Yn-medhons i dhodho, ‘Ni ynwedh a dheu genes.’ I eth yn-mes ha mos dihwans y'n gorhel; hag y'n nos na ny gavsons travyth. 4Mes devedhys an bora, Yesu a veu sevys war an lann, byttegyns ny gonvedhsens an dhyskyblon y vos Yesu. 5Ena yn-medh Yesu dhedha, ‘Fleghes, a nyns eus genowgh boes?’ I a worthybis dhodho, ‘Nag eus.’ 6Yn-medh ev dhedha, ‘Tewlewgh an roes dhe du dyghow an gorhel ha hwi a gyv.’ Ytho i a dewlis, ha lemmyn ny allsons hy thenna drefenn myns an puskes. 7Ytho an dyskybel na a wre Yesu y gara a leveris dhe Peder, ‘An Arloedh yw.’ Simon Peder ytho, pan glewas y vos an Arloedh, a wrogysas y bows a-dro dhodho, rag noeth o, ha lamma y'n mor. 8Ha'n dhyskyblon erell a dheuth y'n skath vyghan, (rag nyns esens pell a'n tir, mes a-dro dhe dhew kans kevelin), ow tenna an roes gans an puskes.

9Kettell dirsons dhe'n lann, i a welas ena tan glowbrenn, ha pysk warnodho, ha bara. 10Yn-medh Yesu dhedha, ‘Drewgh re a'n puskes a gevsowgh nammnygen.’ 11Simon Peder eth yn-bann ha tenna dhe'n lann an roes leun a buskes bras, kans, trydhek ha dew-ugens. Ha kynth esa kemmys, ny veu terrys an roes. 12Yn-medh Yesu dhedha, ‘Dewgh, dybrewgh.’ Mes ny vedhas denvyth a'n dhyskyblon govynn orto, ‘Piw os?’ rag i a wodhya y vos an Arloedh. 13Yesu a dheuth ha kemmeres an bara ha'y ri dhedha, hag y'n keth vaner an pysk. 14Hemm o lemmyn an tressa gweyth yth omdhiskwedhas Yesu dhe'n dhyskyblon, wosa ev dhe bos drehevys a'n re varow.

Yesu ha Peder

15Ytho wosa i dhe dhybri, yn-medh Yesu dhe Simon Peder, ‘Simon mab Yowann,21:15 Yowann: War-lergh re a'n dornskrifow Yona. es'ta jy orth ow hara vy moy es an re ma?’ Yn-medh ev dhodho, ‘Ya, Arloedh, ty a woer my dhe'th kara.’ Yn-medh ev dhodho, ‘Gwith war ow eyn.’ 16Yn-medh ev dhodho arta, nessa gweyth, ‘Simon mab Yowann, es'ta jy orth ow hara vy?’ Yn-medh ev dhodho, ‘Ya, Arloedh, ty a woer my dhe'th kara.’ Yn-medh ev dhodho, ‘Gwra bugelya ow deves.’ 17Y'n tressa treveth yn-medh ev dhodho, ‘Simon mab Yowann, es'ta jy orth ow hara vy?’ Peder a gemmeras duwon, rag ev dhe leverel dhodho y'n tressa treveth, ‘Es'ta jy orth ow hara vy?’ Yn-medh ev dhodho, ‘Arloedh, ty a woer pup-tra, ty a woer my dhe'th kara.’ Yn-medh ev dhodho, ‘Mag ow deves. 18Yn hwir, yn hwir y lavarav dhis, pan es yowynk omwrogysa a wres ha kerdhes plepynag y fynnes; mes pan vydhydh koth, ty a ystynn dha dhiwleuv, ha den arall a wra dha wrogysa ha dha dhoen dhe dyller na vynnydh.’ 19Hemma a leveris, ow sygnyfia gans py par mernans y hwre ev glorifia Duw. Ha wosa leverel hemma, yn-medh ev dhodho, ‘Gwra ow siwya.’

Yesu ha'n Dyskybel Karadow

20Peder a dreylyas, ha gweles an dyskybel a wre Yesu y gara ow siwya, neb re boessa war-dhelergh orth y vronn y'n soper ha leverel, ‘Arloedh, piw a wra dha drayta?’ 21Ena pan wrug Peder y weles, yn-medh ev dhe Yesu, ‘Arloedh, pandra a-dro dhe hemma?’ 22Yn-medh Yesu dhodho, ‘Mar mynnav ev dhe wortos bys pan dhov, pyth yw henna dhis? Ty gwra ow siwya.’ 23Ytho an lavar ma a lesas yn mysk an vreder, na vedha an dyskybel na ow merwel. Mes ny leveris Yesu dhodho na vedha ow merwel, mes ‘Mar mynnav ev dhe wortos bys pan dhov, pyth yw henna dhis?’

24Hemm yw an dyskybel a dheg dustuni a'n taklow ma, ha neb re's skrifas; ha ni a woer y dhustuni dhe vos gwir. 25Hag yma ynwedh lies tra arall a wrug Yesu. Mar pe pubonan anedha skrifys, ny grysav an bys dhe alloes synsi an lyvrow a via skrifys.21:25 War-lergh re a'n dornskrifow yma omma Amen.