Yesu ha Nikodemus

1Yth esa den a'n Fariseow, Nikodemus y hanow, rewler a'n Yedhewon; 2ev a dheuth dhodho yn nos ha leverel dhodho, ‘Rabbi, ni a woer ty dhe vos dyskador devedhys dhiworth Duw; rag ny yll denvyth gul an toknys ma a wredh tejy marnas Duw a vo ganso.’ 3Yesu a worthybis ha leverel dhodho, ‘Yn hwir, yn hwir y lavarav dhis, marnas den a vo genys arta,3:3 arta: Po a-wartha. ny yll gweles gwlaskor Duw.’ 4Yn-medh Nikodemus dhodho, ‘Fatell yll den bos genys, hag ev den koth? A yll ev entra nessa prys yn torr y vamm ha bos genys?’ 5Yesu a worthybis, ‘Yn hwir, yn hwir y lavarav dhis, marnas den a vo genys a dhowr hag a Spyrys, ny yll ev entra yn gwlaskor Duw. 6An pyth yw genys a'n kig yw kig, ha'n pyth yw genys a'n Spyrys yw spyrys. 7Na vedhes marth dhis my dhe leverel dhis, “Res yw hwi dhe vos genys arta.”3:7 arta: Po a-wartha. 8An gwyns a hwyth le may fynno ha ty a glew y son, mes ny wodhes a-ble teu na ple'th a; yndella yw peub neb yw genys dhiworth an Spyrys.’ 9Nikodemus a worthybis ha leverel dhodho, ‘Fatell yll hemma bos?’ 10Yesu a worthybis ha leverel dhodho, ‘Osta dyskador dhe Ysrael ha ny wodhes an taklow ma?

11‘Yn hwir, yn hwir y lavarav dhis, ni a gews an pyth a wodhon, ha ni a dheg dustuni a'n pyth a welsyn; ha ny dhegemmerowgh agan dustuni. 12Mar terivis dhywgh taklow a'n bys ha ny grysowgh, fatell grysowgh mar terivav dhywgh taklow a nev? 13Ha ny yskynnas denvyth bys yn nev marnas ev neb a dheuth yn-nans, Mab an den.3:13 Mab an den: War-lergh re a'n dornskrifow Mab an den neb usi yn nev. 14Ha kepar dell dhrehevis Moyses an sarf y'n gwylvos, yndella res yw Mab an den dhe vos drehevys, 15may fo bewnans heb diwedh dhe beub a grys ynno.’3:15 War-lergh re a'n dornskrifow ma nag ello dhe goll neb a grys ynno ev, mes may fo dhodho bewnans heb diwedh.

16‘Rag kemmys y karas Duw an bys, may ros ev y unn Vab dineythys, rag nag ella dhe goll neb a grys ynno ev, mes may fe dhodho bewnans heb diwedh.

17‘Rag ny dhannvonas Duw y Vab a-bervedh y'n bys rag breusi an bys, mes may fe an bys selwys dredho. 18Nyns yw breusys neb a grys ynno ev; mes neb na grys yw breusys seulabrys, rag ny grysis yn hanow an unn Vab dineythys a Dhuw. 19Ha hemm yw an vreus: golow re dheuth y'n bys, ha'n dus a garas an tewlder moy es an golow, rag bos drog aga oberow. 20Rag seul a wra drog a gas an golow, ha ny dheu dhe'n golow, ma na vo diskudhys y oberow. 21Mes neb a wra gwirder a dheu dhe'n golow, may fo diskwedhys y oberow, i dhe vos gwrys yn Duw.’

Yesu ha Yowann Besydhyer

22Wosa henna, Yesu ha'y dhyskyblon a dheuth dhe bow Yudi, hag ena ev a wortas gansa, ow pesydhya. 23Hag yth esa Yowann ynwedh ow pesydhya yn Aynon ogas dhe Salim, rag bos meur a dhowr ena; hag yth esa tus ow tos hag ow pos besydhys. 24Rag ny via Yowann hwath tewlys yn prison.

25Ena dadhel a sordyas yntra re a dhyskyblon Yowann ha'n Yedhewon a-dro dhe lanheans. 26Hag i a dheuth dhe Yowann ha leverel dhodho, ‘Rabbi, ev neb a veu genes a'n tu arall dhe'n Yordan, a neb ty re dhug dustuni, otta, yma ev ow pesydhya, hag yma pub den oll ow tos dhodho.’ 27Yowann a worthybis ha leverel, ‘Ny yll den degemmeres travyth, marnas henna a vo res dhodho dhiworth an nevow. 28Hwi agas honan a dheg dustuni ahanav, my dhe leverel nag ov vy an Krist, mes dannvenys ov a-dheragdho. 29Ev neb a gyv an briesvyrgh yw an gour pries; mes koweth an gour pries neb a sev ha goslowes orto a lowenha yn feur drefenn lev an gour pries. Ytho an lowena ma usi dhymmo vy yw kollenwys. 30Res yw ev dhe ynkressya, mes my dhe lehe.’

Neb a Dheu dhiworth Nev

31Ev neb a dheu a wartha yw dres pup-tra; ev neb yw a'n nor yw a'n nor hag ev a gews a'n nor. Ev neb a dheu a nev yw dres pup-tra 32An pyth re welas ha re glewas, ev a dheg dustuni anodho, ha denvyth ny dhegemmer y dhustuni. 33Neb a dhegemmer y dhustuni re worras y sel war hemma: Duw dhe vos lel. 34Rag ev neb re wrug Duw y dhannvon a gews geryow Duw, rag ny re ev an Spyrys orth musur. 35An Tas a gar an Mab hag ev re ros pup-tra yn y dhorn. 36Ev neb a grys y'n Mab a'n jeves bewnans heb diwedh, ha neb na grys y'n Mab ny welvydh bewnans; mes sorr Duw a drig warnodho.