Diskryjyans Breder Yesu

1Wosa hemma, yth esa Yesu ow kerdhes yn Galile; rag ny vynna kerdhes yn Yudi, rag an Yedhewon a hwila y ladha. 2Mes ogas veu goel an Yedhewon, an skovvaow; 3ytho y vreder a leveris dhodho, ‘Voyd alemma, ha ke yn Yudi, rag may hwello dha dhyskyblon, i ynwedh, an oberow a wredh. 4Rag ny ober denvyth yn-dann gel neb a hwila bos aswonnys apert. Mar kwredh an taklow ma, diskwa dha honan dhe'n bys.’ 5Rag ny grysi ynno y vreder hogen. 6Ytho Yesu a leveris dhedha, ‘Nyns yw devedhys ow eur vy na hwath; mes agas eur hwi yw parys pup-prys. 7Ny yll an bys agas kasa, mes ev a'm kas, rag my a dheg dustuni anodho, y wriansow dhe vos drog. 8Kewgh hwi yn-bann dhe'n goel; my ny av yn-bann7:8 ny av yn-bann: War-lergh re a'n dornskrifow ny av yn-bann na hwath. dhe'n goel ma; rag nyns yw kowlwrys ow eur na hwath.’ 9Wosa leverel an taklow ma,7:9 an taklow ma: War-lergh re a'n dornskrifow an taklow ma dhedha. ev a wortas yn Galile.

Yesu orth Goel an Skovvaow

10Mes wosa y vreder dhe vos yn-bann dhe'n goel, ena ev ynwedh eth yn-bann; ny'n gwrug yn apert, mes kepar dell via yn-dann gel. 11Ytho an Yedhewon a'n hwilas y'n goel hag a leveris, ‘Ple'ma'n den na?’ 12Hag yth esa krodhvol meur y'n routh yn y gever; rag re a leveri, ‘Dremas yw’, mes re erell a leveri, ‘Nag yw, mes ev a doell an routh.’ 13Byttegyns ny gewsi denvyth yn apert yn y gever, rag own a'n Yedhewon.

14Lemmyn yn kres an goel, Yesu eth yn-bann dhe'n tempel hag yth esa ow tyski. 15Marth a's teva an Yedhewon, ow leverel, ‘Fatell yll ev bos lettrys, pan na studhyas bythkweth?’ 16Ytho Yesu a worthybis dhedha ha leverel, ‘Nyns yw ow dyskas dhymm ow honan, mes dhe neb a'm dannvonas. 17Mar mynn nebonan gul y volonjedh, ev a woer a-dro dhe'n dyskas, pyneyl y vos a Dhuw, po my dhe gewsel a'm awtorita ow honan.7:17 a'm awtorita ow honan: Greka ahanav ow honan. 18Neb a gews a'y awtorita y honan7:18 a'y awtorita y honan: Greka anodho y honan. a hwila y enor y honan; mes neb a hwila an enor anodho ev neb a'n dannvonas, hemma yw gwir, ha nyns eus ynno anwiryonedh.

19‘A ny ros Moyses an lagha dhywgh? Mes denvyth ahanowgh ny with an lagha. Prag y hwilowgh ow ladha?’ 20An routh a worthybis, ‘Yma dyowl dhis; piw a hwila dha ladha?’ 21Yesu a worthybis ha leverel dhedha, ‘Unn ober re wrugavy, ha hwi oll a'gas beus marth. 22Rakhenna Moyses a ros dhywgh an trodreghyans (nyns yw, henna dhe vos dhiworth Moyses, mes dhiworth an tasow); ha hwi a drodregh den y'n sabot. 23Mar tegemmer den trodreghyans y'n sabot rag na vo lagha Moyses terrys, owgh hwi serrys orthiv rag my dhe yaghhe den yn tien y'n sabot? 24Na vreusewgh herwydh an semlans, mes breusewgh gans breus gwiryon.’

25Ena re a dus Yerusalem a leveris, ‘A nyns yw hemma ev neb a hwilons y ladha? 26Hag otta, ev a gews yn apert, ha ny leverons dhodho travyth. A aswonnis an rewloryon hemma dhe vos yn hwir an Krist? 27Mes ni a aswonn an den ma, a by le'ma; ha pan dheu an Krist, ny woer denvyth a by le'ma.’ 28Ytho Yesu a grias y'n tempel, hag ev ow tyski, hag a leveris, ‘Hwi a'm aswonn, ha hwi a woer a-ble ov7:28 a-ble ov: Gwel MC144.. Ha nyns ov vy devedhys ahanav ow honan, mes gwir yw ev neb a'm dannvonas, neb na aswonnowgh. 29My a'n aswonn, rag yth esov vy dhiworto, hag ev a'm dannvonas.’ 30Rakhenna i a hwilas y dhalghenna, mes ny settyas denvyth dorn ynno, rag nyns o devedhys y eur ev. 31Ha lies a'n routh a grysis ynno ha leverel, ‘Pan dheu an Krist, a wra ev toknys moy es dell wra an den ma?’

32An Fariseow a glewas an routh ow krodhvolas yndella a-dro dhodho, ha'n bennoferysi ha'n Fariseow a dhannvonas gwesyon dh'y dhalghenna. 33Ytho Yesu a leveris, ‘Pols byghan yth esov vy hwath genowgh, hag ena yth av dhe neb a'm dannvonas. 34Hwi a'm hwila ha ny'm kevowgh; ha le mayth esov vy, dhi ny yllowgh hwi dos.’ 35Ena an Yedhewon a leveris an eyl dh'y gila, ‘Ple'th a an den ma, ma na yllyn y gavoes? A vynn ev mos dhe'n re skattrys yn mysk an Grekys, ha dyski dhe'n Grekys? 36Pyth yw an lavar a gewsis an den ma, “Hwi a'm hwila ha ny'm kevowgh”, ha “Le mayth esov vy, dhi ny yllowgh hwi dos”?’

37Y'n jydh diwettha, dydh meur an goel, Yesu a sevis ha kria, ow leverel, ‘Den mara'n jeves syghes, des ev dhymmo vy, hag eva. 38Neb a grys ynnov vy, dell lever an skryptor, “Yn-mes a'y dorr, resek a wra avonyow a dhowr bew.” ’ 39Ev a gewsis hemma a-dro dhe'n Spyrys, a vedha degemmerys gans an re a grys7:39 a grys: War-lergh re a'n dornskrifow a gryssa. ynno ev; rag ny via an Spyrys7:39 an Spyrys: War-lergh re a'n dornskrifow an Spyrys Sans. res na hwath, drefenn na veu Yesu glorifiys na hwath. 40Re yn mysk an routh pan glewsons an geryow ma a leveri, ‘Hemm yw yn hwir an profoes.’ 41Re erell a leveri, ‘Hemm yw an Krist’; mes re a leveri, ‘A dheu Krist a Alile? 42A ny lever an skryptor, Krist dhe dhos a has Davydh, hag a Bethlehem, an dre mayth esa Davydh?’ 43Ytho yth esa fols y'n routh a-dro dhodho. 44Ha re anedha a vynna y dhalghenna, mes denvyth ny settyas diwla warnodho.

45Ytho an wesyon a dheuth dhe'n bennoferysi ha'n Fariseow; hag i a leveris dhedha, ‘Prag na wrussowgh y dhri?’

46An wesyon a worthybis, ‘Ny wrug denvyth bythkweth kewsel yndella, dell wra an den ma.’7:46 dell wra an den ma: War-lergh re a'n dornskrifow nyns usi omma an geryow ma. 47Ytho an Fariseow a worthybis dhedha, ‘Owgh hwi ynwedh toellys? 48A wrug denvyth a'n rewloryon krysi ynno, po a'n Fariseow? 49Mes an routh ma, neb na woer an lagha, yw milliges.’ 50Yn-medh Nikodemus dhedha (ev neb a dheuth dhodho kyns,7:50 neb a dheuth dhodho kyns: War-lergh re a'n dornskrifow neb a dheuth yn nos dhodho. hag ev onan anedha), 51‘A wra agan lagha breusi den heb goslowes orto kyns, ha godhvos pandr'a wra?’ 52I a worthybis ha leverel dhodho, ‘Osta jy ynwedh a Alile? Hwila ha gwel, na sev profoes dhiworth Galile.’ 53Ha pubonan eth dh'y ji y honan.