Treylyans Nineve

1Ger an Arloedh a dheuth dhe Yona nessa treveth, ow leverel, 2‘Sav, ke dhe Nineve, an sita vras, ha pregoth dhedhi an messaj a lavarav dhis.’

3Ytho Yona a sevis, ha mos dhe Nineve, herwydh ger an Arloedh. Lemmyn sita vras dres musur veu Nineve, kerdh a dri dydh hy les. 4Yona a dhallathas mos y'n sita, kerdh a unn jydh, hag ev a grias ha leverel, ‘Hwath dew-ugens dydh, ha Nineve a vydh domhwelys.’ 5Ytho tus Nineve a grysis dhe Dhuw, hag ordena penys, hag omgwetha gans yskar, bras ha byghan.

6Pan dheuth an ger dhe vyghtern Nineve, ev a sevis a'y se ha diwiska y bows ryel, hag omgwetha gans yskar, hag esedha yn lusu. 7Hag ev a dhellos gwarnyans yn Nineve:

‘Dre arghadow an myghtern ha'y wahalyethow: Na wres den na best, gwarthek na deves, tastya travyth, na peuri, nag eva dowr; 8mes bedhes den ha best kudhys gans yskar, ha kriens yn ter war Dhuw; ha treylya peub dhiworth y fordh dhrog, ha dhiworth an garowder usi yn aga diwla. 9Piw a woer, a wra Duw treylya ha kemmeres edrek, ha treylya dhiworth y sorr fers, ma na wryllyn ni mos dhe goll?’

10Ha Duw a welas aga oberow, i dhe dreylya dhiworth aga fordh dhrog; ha Duw a gemmeras edrek a'n drog a lavarsa ev dhe wul dhedha; ha ny'n gwrug.