Sorr Yona, Keredh Duw

1Mes pur dhisplesys o Yona, hag ev a sorras yn fras. 2Hag ev a bysis dhe'n Arloedh ow leverel, ‘My a'th pys, A Arloedh, a nyns yw henna an keth tra a leveris vy pan esen hwath y'm pow? Rakhenna my a fias y'n dalleth dhe Tarshish; rag my a wodhva ty dhe vos Duw grassyes ha truedhek, lent ow serri, ha leun a dregeredh, ow kemmeres edrek a'n drog. 3Ytho lemmyn, A Arloedh, kemmer ow bewnans dhiworthiv, my a'th pys, rag gwell dhymm yw mernans es bewnans.’ 4Mes an Arloedh a leveris, ‘Yw da, ty dhe vos serrys?’ 5Ytho Yona eth yn-mes a'n sita, hag esedha a'n barth est dhe'n sita, ha gul krow ena ragdho, hag esedha yn-danno y'n goskes, dhe weles pandr'a vedha ow hwarvos y'n sita.

6Ha'n Arloedh Duw a dharbaris risinenn,4:6 risinenn: Po war-lergh an Septuagint pompyon. hag i a devis yn-bann dres Yona, may fe skeus war y benn, dh'y dhifres a'y anken. Ha pur lowen o Yona drefenn an risinenn. 7Mes ternos pan dheuth an bora Duw a dhannvonas pryv, hag ev a weskis an risinenn, ha hi a wedhras. 8Ha pan dhrehevis an howl, Duw a dhannvonas gwyns toemm dhiworth an howldrevel, ha'n howl a weskis war benn Yona, may klamderas. Hag ev a bysis may farwa, ow leverel, ‘Gwell dhymm yw merwel es bewa.’

9Ha Dhuw a leveris dhe Yona, ‘Yw da, ty dhe vos serrys a-dro dhe'n risinenn?’ Yn-medh ev, ‘Da yw my dhe vos serrys, bys y'n mernans.’ 10Ha'n Arloedh a leveris, ‘Ty a gemmeras truedh a'n risinenn, ma na wrussys naneyl lavurya rygdhi, na gul dhedhi tevi. Yn unn nos y tevis, hag yn unn nos y ferwis. 11Ytho a ny gemmerav vy truedh a Nineve, an sita vras, mayth eus ynni moy es hwegh-ugens mil dhen na wodhons dissernya ynter aga leuv dhyghow ha'ga leuv gledh, ha myns meur a warthek?’