Yoshua Apoyntys avel Ledyer

1Lemmyn wosa mernans Moyses gwas an Arloedh, an Arloedh a gewsis dhe Yoshua mab Nun, menyster Moyses, ow leverel, 2‘Marow yw Moyses ow gwas. Sav lemmyn ha ke dres an Yordan ma, ty hag oll an bobel ma, dhe'n tir a rov dhedha, dhe'n Ysraelysi. 3Pub tyller may trett godhen agas troes warnodho, my re'n ros dhywgh, kepar ha dell gewsis vy dhe Moyses. 4A'n gwylvos ha'n Lebanon ma bys y'n avon vras, an avon Ewfrates, oll tir an Hyttysi bys y'n mor bras y'n howlsedhes a vydh agas tiredh. 5Ny sev gour vyth er dha bynn oll dydhyow dha vewnans. Kepar dell en vy gans Moyses, my a vydh genes jy; ny wrav dha eskasa na'th forsakya. 6Bydh krev ha bydh kolonnek; rag ty re wrug dhe'n bobel ma erita an tir a des dh'aga thasow y ri dhedha. 7Mes bydh krev ha bydh pur golonnek, ow kwaytyas gul war-lergh oll an lagha a erghis Moyses ow gwas dhis; na dreyl dhiworti dhe'n barth dhyghow na dhe'n barth kledh, rag bos sewena dhis plepynag yth edh. 8Ny dhiberth an lyver ma a'n lagha dhiworth dha anow, mes ty a ombreder warnodho dydh ha nos, rag may hwaytti gul war-lergh pup-tra yw skrifys ynno. Rag ena ty a wra dhe'th fordh spedya, hag ena y fydh dhis sewena. 9A ny erghis dhis? Bydh krev ha bydh kolonnek; na borth own ha na vydh dyegrys, rag bos an Arloedh dha Dhuw genes plepynag yth edh.’

10Ytho Yoshua a erghis dhe soedhogyon an bobel, 11‘Tremenewgh der an kamp, hag erghewgh dhe'n bobel: “Pareusewgh agas boes; rag kyns penn tri dydh hwi a vydh ow treusi an Yordan ma, rag dos dhe erita an tir usi an Arloedh agas Duw ow ri dhywgh dh'y bewa.” ’

12Dhe'n Rewbenysi, ha dhe'n Gadysi, ha dhe'n hanter-loeth Manasse, Yoshua a gewsis, ow leverel, 13‘Perthewgh kov a'n pyth a worhemmynnis Moyses gwas an Arloedh dhywgh, ow leverel, “Yma an Arloedh agas Duw ow ri powesva dhywgh, hag ev a re dhywgh an pow ma.” 14Agas benynes, agas re vyghan, ha'gas gwarthek a yll gortos y'n tir a ros Moyses dhywgh dres an Yordan. Mes hwi a dreus arayys rag kas kyns agas breder, oll an gasoryon, ha hwi a's gweres, 15bys pan re an Arloedh powes dh'agas breder kepar ha hwi, hag i ynwedh a erit an tir usi an Arloedh agas Duw ow ri dhedha. Hwi a dhehwel dhe dir agas eretons ha'y gemmeres yn perghennogeth, an tir a ros Moyses gwas an Arloedh dhywgh dres an Yordan troha'n howldrehevel.’

16I a worthybis dhe Yoshua, ow leverel: ‘Pup-tra a worhemmynnsys dhyn, ni a'n gwra, hag yth en ni plepynag y'gan dannvenydh. 17Par dell glewsyn pup-tra gans Moyses, yndella ni a glew genes. Lemen re bo an Arloedh dha Dhuw genes, par dell o gans Moyses! 18Piwpynag a vo diwostydh dhe'th arghadow ha neb na woslow orth dha lavarow, pup-tra a worhemmynnydh dhodho, a vydh gorrys dhe'n mernans. Mes bydh krev ha bydh kolonnek.’