An Howl a Sev Stag yn Gibeon

1Pan glewas Adoni-sedek myghtern Yerusalem, Yoshua dhe gemmeres Ay ha'y sakra dhe dhistruyans, dell wrussa dhe Yeriko ha'y myghtern, ha bos annedhysi Gibeon yn kres gans Ysrael hag yth esens trigys yn aga mysk, 2ev a'n jeva own meur; rag Gibeon o sita vras, kepar hag onan an sitys ryel; hi o brassa ages Ay, hag oll hy gwer o kasoryon alloesek. 3Ytho Adoni-sedek myghtern Yerusalem a dhannvonas messaj dhe Hoham myghtern Hebron, ha dhe Piram myghtern Yarmuth, ha dhe Yafia myghtern Lakish, ha dhe Debir myghtern Eglon, ow leverel, 4‘Dewgh yn-bann dhe'm gweres, ha ni a wesk Gibeon; rag hi re wrug kres gans Yoshua ha gans an Ysraelysi’ 5Ena pymp myghtern an Amorysi – myghtern Yerusalem, myghtern Hebron, myghtern Yarmuth, myghtern Lakish ha myghtern Eglon – a omguntellas war-barth ha dos yn-bann gans oll aga luyow ha kampya erbynn Gibeon, hag omladh er hy fynn.

6Gwer Gibeon a dhannvonas dhe Yoshua dhe'n lu yn Gilgal, ow leverel, ‘Na forsak dha wesyon; deus yn-bann dhyn uskis, ha saw ni, ha gweres ni; rag oll myghternedh an Amorysi yn vro venydhyek re omguntellas er agan pynn.’ 7Ytho Yoshua eth yn-bann dhiworth Gilgal, ev hag oll an soudoryon ganso, hag oll an gasoryon. 8An Arloedh a leveris dhe Yoshua, ‘Na borth own anedha, rag my re's ros y'th leuv; ny sev gour anedha a-dheragos.’ 9Ytho Yoshua a dheuth dhedha distowgh, wosa kerdhes yn-bann oll an nos dhiworth Gilgal. 10An Arloedh a's gorras yn deray a-rag Ysrael, hag i a's gweskis glan orth Gibeon, ha'ga chasya war fordh-yskynna Beth-horon, ha'ga gweskel bys Azeka ha bys Makkeda. 11Pan esens ow fia a-rag Ysrael war an fordh yn-nans dhe Beth-horon, an Arloedh a dewlis keserennow bras warnedha dhiworth nev bys Azeka, hag i a verwis; moy anedha a verwis drefenn an keserennow es dell veu ledhys gans kledhedhyow an Ysraelysi.

12Ena Yoshua a gewsis dhe'n Arloedh y'n jydh pan dhelivras an Arloedh an Amorysi dhe'n Ysraelysi, hag ev a leveris yn golok Ysrael,

‘Howl, sav stag yn Gibeon,

ha ty Loer, yn nans Ayyalon.’

13Ha'n howl a sevis stag, ha'n loer a hedhis,

bys pan gemmersa an genedhel dial war hy eskerens.

A nyns yw skrifys hemma yn Lyver Yashar? An howl a hedhis yn kres an nev ha ny fistenas dhe sedhi a-dro dhe dhydh kowal. 14Ny feu dydh kepar ha henna kyns po a-wosa, pan woslowas an Arloedh orth lev gour; rag an Arloedh a omladhas rag Ysrael.

15Ena Yoshua a dhehwelis, hag oll Ysrael ganso, dhe'n kamp yn Gilgal.

Pymp Myghtern an Amorysi Ledhys

16Mes an pymp myghtern ma a fias hag omgudh yn kav yn Makkeda. 17Ha derivys veu dhe Yoshua, ‘An pymp myghtern re beu kevys, kudhys y'n kav yn Makkeda.’ 18Yn-medh Yoshua, ‘Rolyewgh meyn bras erbynn ganow an kav, ha settya gwer warnodho rag aga gwitha; 19mes hwi, na wortewgh; chasyewgh war-lergh agas eskerens, hag omsettyewgh a-dhelergh dhedha. Na esewgh i dhe entra yn aga sitys, rag an Arloedh agas Duw re's ros yn agas leuv.’ 20Yoshua ha'n Ysraelysi a's gweskis gans ladhva vras, ha'ga distrui glan, mes re anedha a dhienkas, ha mos bys y'n sitys kerys. 21Ena an lu kowal a dhehwelis dhe Yoshua y'n kamp yn Makkeda yn sawder; ny lavasas denvyth kewsel ger erbynn mebyon Ysrael.

22Yoshua a leveris, ‘Igerewgh ganow an kav ha drewgh yn-mes dhymm an pymp myghtern ma dhiworth an kav.’ 23I a wrug yndella, ha dri yn-mes dhodho an pymp myghtern ma dhiworth an kav, myghtern Yerusalem, myghtern Hebron, myghtern Yarmuth, myghtern Lakish ha myghtern Eglon. 24Pan dhrosons yn-mes an vyghternedh ma dhe Yoshua, Yoshua a elwis oll gwer Ysrael ha leverel dhe gaslewydhyon an soudoryon eth ganso, ‘Dewgh nes, gorrewgh agas treys war konnaow an vyghternedh ma.’ I a dheuth nes ha gorra aga threys war aga honnaow. 25Yoshua a leveris dhedha, ‘Na berthewgh own ha na vedhewgh digolonnek. Bedhewgh krev ha hardh; rag an Arloedh a wra yndella dhe oll agas eskerens a omledhowgh er aga fynn.’ 26A'y wosa Yoshua a's gweskis ha'ga ladha, ha'ga kregi dhiworth pymp gwydhenn. Hag yth esens ow kregi dhiworth an gwydh bys y'n gorthugher. 27Yn termyn an howlsedhes Yoshua a worhemmynnis, hag i a's kemmeras yn-nans dhiworth an gwydh hag a's tewlis dhe'n kav le mayth omgudhsens; i a worras meyn bras yn ganow an kav, hag ymons ena poran y'n jydh ma.

28Yoshua a gemmeras Makkeda an jydh na, ha gweskel an sita ha'y myghtern gans min an kledha; ev a's sakras dhe dhistruyans, ha peub esa ynni; ny asas denvyth dhe vos gesys. Hag ev a wrug dhe vyghtern Makkeda dell wrussa dhe vyghtern Yeriko.

29Ena Yoshua a dremenas a Makkeda, hag oll Ysrael ganso, dhe Libna, hag omladh erbynn Libna. 30Ha'n Arloedh a ros an sita na ynwedh ha'y vyghtern yn leuv Ysrael; Yoshua a's gweskis gans vin an kledha, ha peub esa ynni; ny asas dhe vos gesys remenant ynni; hag ev a wrug dh'y myghtern dell wrussa dhe vyghtern Yeriko.

31Ena Yoshua a dremenas dhiworth Libna dhe Lakish, hag oll Ysrael ganso, ha kampya hag omladh er hy fynn. 32An Arloedh a ros Lakish yn leuv Ysrael, hag Yoshua a's kemmeras an nessa dydh, ha'y gweskel gans vin an kledha, ha peub esa ynni, dell wrussa dhe Libna.

33Ena Horam myghtern Gezer a dheuth yn-bann dhe weres Lakish; ha Yoshua a'n gweskis ev ha'y bobel, bys pan na veu gesys dhodho denvyth yn few.

34Dhiworth Lakish Yoshua a dremenas dhe Eglon hag oll Ysrael ganso, ha kampya hag omladh er hy fynn; 35hag i a's kemmeras y'n jydh na, ha'y gweskel a vin an kledha; ha peub esa ynni ev a sakras dhe dhistruyans, dell wrussa dhe Lakish.

36Ena Yoshua eth yn-bann hag oll Ysrael ganso dhiworth Eglon dhe Hebron; hag i a omladhas er hy fynn, 37i a's kemmeras, ha'y gweskel a vin an kledha, ha'y myghtern hag oll hy threvow, ha peub esa ynni. Ny asas dhe vos gesys denvyth, dell wrussa dhe Eglon; ev a's sakras dhe dhistruyans, hi ha peub esa ynni.

38Ena Yoshua a dreylyas a-dro hag oll Ysrael ganso dhe Debir hag omladh er hy fynn. 39Ev a's kemmeras, hi ha'y myghtern hag oll hy threvow; i a's gweskis a vin an kledha, ha sakra dhe dhistruyans peub esa ynni; ny asas dhe vos gesys denvyth; dell wrussa dhe Hebron, yndella ev a wrug dhe Debir ha'y myghtern, ha kepar dell wrussa dhe Libna ha'y myghtern.

40Ytho Yoshua a weskis oll tir an vro venydhyek, an Negeb, an Shefela ha'n ledrow hag oll aga myghternedh; ny asas dhe vos gesys denvyth. Ev sakras dhe dhistruyans pup-tra a anellas, dell worhemmynnis an Arloedh, Duw Ysrael. 41Ytho Yoshua a's gweskis dhiworth Kadesh-barnea dhe Gaza, hag oll tir Goshen, mar bell avel Gibeon. 42Yoshua a gemmeras oll an vyghternedh ma ha'ga thir yn unn kaskyrgh, drefenn an Arloedh, Duw Ysrael, dhe omladh rag Ysrael. 43Ena Yoshua a dhehwelis hag oll Ysrael ganso dhe'n kamp yn Gilgal.