Tir Hwath dhe vos Kemmerys

1Gyllys koth o Yoshua yn y dhydhyow; ha'n Arloedh a leveris dhodho, ‘Gyllys koth osta y'th dydhyow, hag yma gesys pur veur a dir rag bos eritys. 2Hemm yw an tir yw gesys hwath: oll oryon an Filistysi, hag oll oryon an Geshurysi 3a-dhiworth an Shihor, usi a'n howldrevel dhe Ejyp, dhe or Ekron a'n gledhbarth (reknys yw avel kananek, kyn fo dhe bymp gwahalyeth an Filistysi, a Gaza, a Ashdod, a Ashkelon, a Gath, hag a Ekron); tiredh an Avviysi 4war an barth dhyghow; oll tiredh an Kananysi dhiworth Meara yw dhe'n Sidonysi, bys Afek hag or an Amorysi; 5tiredh an Gebalysi, hag oll Lebanon, troha'n howldrevel dhiworth Baal-gad yn-dann menydh Hermon bys Lebo-hamath. 6My a fes a-rag an Ysraelysi oll trigoryon an vro venydhyek a-dhiworth Lebanon bys Misrefoth-maym, hag oll an Sidonysi. Lemen gwra henna dhe goedha rag an Ysraelysi avel aga eretons, dell worhemmynnis dhis. 7Ytho lemmyn ro an tir ma avel aga eretons dhe'n naw loeth ha'n hanter-loeth Manasse.’

Rannans an Tir Dres an Yordan

8An Rewbenysi ha'n Gadysi re gemmersa aga eretons a ros Moyses dhedha, a'n howldrevel dhe'n Yordan, dell ros Moyses gwas an Arloedh dhedha: 9dhiworth Aroer, usi war vin nans Arnon, ha'n sita usi yn kres an nans, hag oll ughelgompesenn Medeba bys yn Dibon; 10hag oll sitys Sihon myghtern an Amorysi a reynyas yn Heshbon, bys or an Ammonysi; 11ha Gilead, hag or an Geshurysi ha'n Maakathysi, hag oll menydh Hermon, hag oll Bashan bys Saleka; 12oll gwlas Og yn Bashan, a rewlyas yn Ashtaroth hag yn Edrei. Ev unnsel a veu gesys a remenant an Refaim, mes Moyses a's gweskis, ha'ga fesya. 13Mes ny fesyas an Ysraelysi an Geshurysi na'n Maakathysi; mes yma Geshur ha Maakath trigys yn kres Ysrael bys y'n jydh ma.

14Saw unnsel dhe loeth Levi ny ros ev rann; offrynnow leskys an Arloedh, Duw Ysrael yw aga eretons, dell leveris dhodho.

15Moyses a ros tiredh dhe loeth an Rewbenysi war-lergh aga theyluyow. 16Yth esa dhedha an or dhiworth Aroer, usi war vin nans Arnon, ha'n sita usi yn kres an nans, hag oll an ughelgompesenn ryb Medeba; 17Heshbon hag oll hy threvow war an ughelgompesenn: Dibon, ha Bamoth-baal, Beth-baal-meon, 18Yahas, Kedemoth, ha Mefaath, 19Kiryathaym, Sibma, ha Sereth-shahar yn bre an nans, 20Beth-peor, ledrow Pisga, ha Beth-yeshimoth, 21oll sitys an ughelgompesenn, oll gwlas Sihon myghtern an Amorysi, a rewlyas yn Heshbon, neb a wrug Moyses y weskel war-barth gans pennsevigyon Midyan, Evi, Rekem, Sur, Hur ha Reba, o omajers Sihon, esa trigys y'n tir. 22An Ysraelysi a ladhas Balaam mab Beor, an koelyek gans an kledha yn mysk an re ledhys erell. 23Or mebyon Rewben a veu an Yordan ha'y diredh. An sitys ma ha'ga godrevow a veu eretons an Rewbenysi war-lergh aga theyluyow.

24Moyses a ros eretons dhe loeth Gad, dhe'n Gadysi war-lergh aga theyluyow. 25Aga or o Yazer, hag oll sitys Gilead, ha hanter tir an Ammonysi, bys yn Aroer, usi a'n howldrevel dhe Rabba, 26ha dhiworth Heshbon dhe Ramath-mispe ha Betonim, ha dhiworth Mahanaym dhe or Debir, 27hag y'n nans Beth-haram, Beth-nimra, Sukkoth, Safon, remenant gwlas Sihon myghtern Heshbon. An or o an Yordan ha'y diredh, bys yn amal mor Kinnereth, a'n howldrevel dhe'n Yordan. 28Hemm yw eretons mebyon Gad war-lergh aga theyluyow, an sitys ha'ga godrevow.

29Moyses a ros eretons dhe'n hanter-loeth Manasse; hemm o dhe hanter teylu mebyon Manasse war-lergh aga theyluyow. 30Yth esa aga or dhiworth Mahanaym, oll Bashan, oll gwlas Og myghtern Bashan, oll trevow Yair yn Bashan, tri-ugens sita, 31hanter Gilead, hag Ashtaroth hag Edrei, sitys ryel Og yn Bashan. Hemm o rag mebyon Makir mab Manasse, rag hanter a vebyon Makir war-lergh aga theyluyow.

32An re ma yw an tiryow a ros Moyses avel eretons yn plenys Moab, dres an Yordan a'n howldrevel dhe Yeriko. 33Mes ny ros Moyses eretons dhe loeth Levi; an Arloedh Duw yw aga eretons, dell leveris dhedha.