Rannans Tir a'n Howlsedhes dhe'n Yordan

1An re ma yw an tiryow a eritas mebyon Ysrael yn pow Kanan, a veu rynnys dhedha avel eretons gans Yoshua mab Nun ha pennow teyluyow loethow Ysrael. 2Aga tiredh o rynnys dhedha gans koelbrenn, dell worhemmynnis an Arloedh dhe Moyses rag an naw loeth ha'n hanter-loeth. 3Moyses a ros eretons dres an Yordan dhe dhew loeth ha hanter-loeth; mes ny ros eretons dhe'n Levysi yn aga mysk. 4Rag mebyon Yosep o dew loeth, Manasse hag Efraym. Ny veu rann y'n tir res dhe'n Levysi, marnas sitys dhe driga ynna, gans aga feurvaow rag aga flokkys ha'ga greow. 5An Ysraelysi a rannas an tir war-lergh gorhemmynn an Arloedh dhe Moyses.

Eretons Kaleb

6Ena mebyon Yuda a dheuth dhe Yoshua yn Gilgal; ha Kaleb mab Yefunne an Kenizzyas a leveris dhodho, ‘Ty a woer an pyth a leveris an Arloedh dhe Moyses gour Duw yn Kadesh-barnea y'm kever hag y'th kever. 7Dew-ugens bloedh en vy pan y'm dannvonas Moyses gwas an Arloedh dhiworth Kadesh-barnea rag aspia an tir; ha my a dhros dhodho derivas war-lergh an pyth a veu y'm kolonn. 8Byttegyns ow breder eth yn-bann genev a wrug kolonn an dus teudhi yn own; mes my a besyas len dhe'n Arloedh ow Duw. 9Moyses a dos y'n jydh na, “Surredi an tir may trettyas dha dreys warnodho a vydh eretons ragos ha rag dha vebyon bys vykken, drefenn ty dhe besya len dhe'n Arloedh ow Duw.” 10Ytho lemmyn, awotta, an Arloedh re'm gwithas yn few, dell leveris, an pymp blydhen ha dewgens ma a-dhia'n termyn a gewsis an Arloedh an ger ma orth Moyses, pan esa Ysrael ow vyajya y'n gwylvos; hag ottavy y'n jydh ma, pymp bloedh ha peswar-ugens ow oes. 11Yth ov vy hwath mar grev y'n jydh ma dell en y'n jydh a'm dannvonas Moyses; ow nerth lemmyn yw par dell o ow nerth ena, rag bresel, ha rag mos dhe-ves ha rag dos a-bervedh. 12Ytho ro dhymm an vro venydhyek ma, a gewsis anodho an Arloedh y'n jydh na. Ty dha honan a glewas y'n jydh na bos an Anakim ena, ha bos an sitys bras ha kerys; martesen an Arloedh a vydh genev, ha my a's fes, dell leveris an Arloedh.’

13Yoshua a'n bennigas, hag ev a ros Hebron dhe Kaleb mab Yefunne rag eretons. 14Ytho Hebron a dheuth ha bos eretons Kaleb mab Yefunne an Kenizzyas bys y'n jydh ma, drefenn ev dhe besya len dhe'n Arloedh, Duw Ysrael. 15Kiryath-arba o hanow Hebron kyns; an Arba ma o den bras yn mysk an Anakim. Ha'n tir a'n jevo powes a vresel.