Ranndir Remenant Hanter-loeth Manasse

1Hemm o an tiredh rynnys gans koelbrenn dhe loeth Manasse, rag y vos kynsa-genys Yosep. Dhe Makir kynsa-genys Manasse, tas Gilead, yth esa Gilead ha Bashan, drefenn y vos gour a vresel. 2Ynwedh yth esa tiredh rag mebyon erell Manasse war-lergh aga theyluyow, dhe vebyon Abiezer, dhe vebyon Helek, dhe vebyon Asriel, dhe vebyon Shekem, dhe vebyon Hefer, ha dhe vebyon Shemida; an re ma o fleghes worow Manasse mab Yosep war-lergh aga theyluyow.

3Nyns esa mebyon dhe Selofehad mab Hefer mab Gilead mab Makir mab Manasse, mes myrghes; ha'n re ma yw henwyn y vyrghes: Mahla, Noa, Hogla, Milka, ha Tirsa. 4I a dheuth dhe Eleazar an oferyas ha dhe Yoshua mab Nun ha dhe'n ledyoryon, hag a leveris, ‘An Arloedh a worhemmynnis dhe Moyses ri dhyn eretons yn mysk agan breder.’ Ytho war-lergh ganow an Arloedh ev a ros dhedha eretons yn mysk breder aga thas. 5Ha deg rann a goedhas dhe Manasse, keffrys ha pow Gilead ha Bashan, esa war denewen arall an Yordan, 6drefenn myrghes Manasse dhe gemmeres eretons yn mysk y vebyon. Yth o pow Gilead dhe remenant mebyon Manasse.

7Yth esa or Manasse dhiworth Asher dhe Mikmethath, usi a'n howldrevel dhe Shekem; ha'n or a bes dhe'n dhyghowbarth dhe drigoryon En-tappuagh. 8Yth o tir Tappuagh dhe Manasse, mes yth o Tappuagh hy honan war or Manasse, hag yth o dhe'n Efraymysi. 9An or eth yn-nans dhe nans Kana, dhe barth dhyghow an nans. Yth o an sitys ma dhe Efraym kynth esens yn mysk sitys Manasse. Hag or Manasse a besyas a'n barth kledh dhe'n nans, ha'y diwedh yw an mor. 10Yth o tir an dhyghowbarth dhe Efraym ha tir an gledhbarth dhe Manasse, ha'ga or o an mor; hag i a dochyas Asher y'n gledhbarth, hag Yssakar y'n howldrevel. 11Yn Yssakar hag Asher, yth o dhe Manasse Beth-shean ha'y threvow, Ybleam ha'y threvow, trigoryon Dor ha'y threvow, trigoryon En-dor ha'y threvow, trigoryon Taanak ha'y threvow, ha trigoryon Megiddo ha'y threvow (an tressa yw Nafeth). 12Ny allas mebyon Manasse fesya trigoryon an sitys na; mes an Kananysi a withas dalghenn y'n tir na. 13Pan dheuth mebyon Ysrael ha bos krev, i a worras an Kananysi dhe lavur konstrynys, mes ny's fessons yn tien.

Loeth Yosep a Grodhvol

14Mebyon Yosep a leveris dhe Yoshua, ‘Prag ny resys dhyn marnas unn eretons hag unn rann? Pobel vras on ni; ha kyns es lemmyn an Arloedh re'gan bennigas.’ 15Yoshua a leveris dhedha, ‘Mars owgh hwi pobel vras, ke yn-bann dhe'n goeswik, ha treghi gwydh dhe wul tyller ena ragowgh yn tir an Perizzysi ha'n Refaim, rag bro venydhyek Efraym yw re gul ragos.’ 16Mebyon Yosep a leveris, ‘Nyns yw lowr ragon an vro venydhyek; hag yma dhe oll an Kananysi trigys y'n plen charettow a horn, keffrys an re yn Beth-shean ha'y threvow ha'n re yn nans Yezreel.’ 17Ena Yoshua a leveris dhe ji Yosep, dhe Efraym ha dhe Manasse, ‘Hwi yw pobel vras, hag yma dhywgh nerth bras; ny vydh dhywgh unn rann hepken. 18Mes an vro venydhyek a vydh dhywgh; koeswik yw, ha hwi a's klerha, ha'y oryon pella a vydh dhywgh; rag hwi a fes an Kananysi yn-mes, kyn fo dhedha charettow a horn, ha kynth yns krev.’