Rannans Remenant an Tir

1Oll kuntelles mebyon Ysrael a omguntellas yn Shilo, ha settya ena tylda an kuntelles. Ha'n tir a veu fethys a-ragdha.

2Mes gesys veu yn mysk an Ysraelysi seyth loeth na dhegemmersa aga eretons. 3Yoshua a leveris dhe'n Ysraelysi, ‘Pes termyn a vydhowgh logh ow mos dhe gemmeres yn perghennogeth an tir re ros dhywgh an Arloedh, Duw agas tasow? 4Apoyntyewgh ragowgh tri gour dhiworth pub loeth, ha my a's dannvon dhe gerdhes der an tir, ha'y arhwithra, ha diskwedhes eretons pub loeth, hag ena dehweles dhymm. 5Rynnewgh an tir yn seyth rann. Yuda a bes yn y diredh a'n dhyghowbarth, ha chi Yosep a bes yn aga thiredh a'n gledhbarth. 6Arhwithrewgh an tir yn seyth rann ha drewgh an manylyon omma dhymm. My a dewl prennyer ragowgh omma a-rag an Arloedh agan Duw. 7Mes nyns eus rann yn agas mysk dhe'n Levysi, rag oferyaseth an Arloedh yw aga eretons. Gad, Rewben ha hanter-loeth Manasse re dhegemmeras aga eretons dres an Yordan troha'n howldrevel, a ros dhedha Moyses gwas an Arloedh.’

8Ytho an wer a sevis ha mos; ha Yoshua a worhemmynnis dhedha arhwithra an tir, ow leverel, ‘Kewgh ha kerdhewgh der an tir ha'y arhwithra, ha dehwelewgh dhymm; ha my a dewl prennyer ragowgh omma a-rag an Arloedh yn Shilo.’ 9Ytho an wer eth ha tremena der an tir ha'y arhwithra, ha'y skrifa war-lergh an sitys yn lyver, yn seyth rann. Ena i a dheuth dhe Yoshua y'n kamp yn Shilo. 10Yoshua a dewlis prennyer ragdha yn Shilo a-rag an Arloedh; hag ena Yoshua a rannas an tir dhe'n Ysraelysi war-lergh aga rannow.

Eretons Benyamin

11Hemm yw an koelbrenn a dheuth yn-bann rag loeth an Benyaminysi war-lergh aga theyluyow. Yth esa an or rynnys dhedha gans an koelbrenn yntra mebyon Yuda ha mebyon Yosep. 12Yth esa aga or war denewen an gledhbarth ow talleth dhiworth an Yordan; ha'n or eth yn-bann dhe leder Yeriko a'n gledhbarth, ha mos yn-bann troha'n howlsedhes bys y'n vro venydhyek; hag yth esa hy diwedh yn gwylvos Beth-aven. 13An or eth alena war-tu ha Luz, dhe leder Luz (yw Bethel), war-tu ha'n dyghow; ha'n or eth yn-nans dhe Ataroth-addar, war an vre a'n dyghow dhe Beth-horon a-is. 14Ena an or a dreylyas dhe'n dyghow orth denewen an howlsedhes dhiworth an vro venydhyek a-ugh Beth-horon, hag yth esa hy diwedh a veu yn Kiryath-baal, (yw Kiryath-yearim). Yth o an sita ma dhe Yuda. Hemma a veu tenewen an howlsedhes. 15Tenewen an dyghow a veu dhiworth amal Kiryath-yearim y'n howlsedhes; ha'n or eth yn-mes orth fenten dowrow Neftoagh. 16An or eth yn-nans dhe amal an vre a'n est dhe nans Mab-hinnom, a'n kledh dhe nans Refaim; hi eth yn-nans yn nans Hinnom, dhe leder dyghow an Yebusysi, hag ena dhe En-rogel. 17Ena hi a dreylyas dhe'n gledhbarth ha mos dhe En-shemesh, ha Geliloth, usi a-dal bolgh Adummim, hag alena mos yn-nans dhe ven Bohan mab Rewben. 18Hi a besyas troha'n leder a-dal Araba dhe'n gledhbarth ha mos yn-nans dhe'n Araba. 19An or a dremenas dhe'n gledhbarth a leder Beth-hogla, hag yth esa hy finweth yn taves kledh Mor an Hoelan yn ganow dyghow an Yordan: hemma a veu or an dyghow. 20An Yordan a veu an or war denewen an howldrevel. Hemm o eretons mebyon Benyamin, kylghenn dien aga oryon war-lergh aga theyluyow.

21Sitys loeth mebyon Benyamin war-lergh aga theyluyow o Yeriko, Beth-hogla, Emek-kesis, 22Beth-araba, Semarim, Bethel, 23Avvim, Para, Ofra, 24Kefar-ammoni, Ofni, ha Geba: dewdhek sita gans aga godrevow. 25Yth esa ynwedh Gibeon, Rama, Beeroth, 26Mispe, Kefira, Mosa, 27Rekem, Yrpeel, Tarala, 28Sela, Elef, Yebus (honn yw, Yerusalem), Gibea ha Kiryath-yearim: peswardhek sita gans aga godrevow. Hemm yw eretons loeth Benyamin war-lergh aga theyluyow.