Rahab ha'n Aspioryon

1Yoshua mab Nun a ragdhannvonas dew wour dhiworth Shittim dhe aspia yn-dann gel, ow leverel, ‘Kewgh dhe vires orth an tir, hag yn arbennik Yeriko.’ Ytho i eth, ha dos dhe ji hora, Rahab hy hanow, hag i a spenas an nos ena. 2Y feu derivys dhe vyghtern Yeriko ow leverel, ‘Awotta gwer a vebyon Ysrael a dheuth omma haneth rag aspia an tir.’ 3Myghtern Yeriko a dhannvonas dhe Rahab ow leverel, ‘Dro yn-mes an wer a dheuth dhis, a dheuth dhe'th chi, rag i re dheuth dhe aspia oll an tir.’ 4Mes an venyn a gemmeras an dhew wour ha'ga hudha. Hag yn-medh hi, ‘Yn hwir, an wer a dheuth dhymm, mes ny wodhyen a-ble. 5Y'n tewlwolow, pan veu an termyn dhe dhegea an yet, an wer eth yn-mes. Ny wonn ple'th eth an wer. Helghewgh i yn skon, rag hwi a yll aga thremena.’ 6Mes hi re's drosa yn-bann dhe'n to ha'ga hudha yn mysk garrow lin re arayas war an to. 7Ytho an wer a's helghyas war an fordh dhe'n Yordan bys y'n rysyow. Kettell eth yn-mes aga helghoryon, an yet a veu deges.

8Kyns i dhe wrowedha, hi a yskynnas dhedha war an to, 9hag yn-medh hi dhe'n wer: ‘My a woer an Arloedh dhe ri dhywgh an tir; euth ahanowgh re goedhas warnan hag oll trigoryon an tir re deudhis yn own a-ragowgh. 10Ni re glewas fatell dhesyghas an Arloedh dowrow an Mor Rudh a-ragowgh pan ethewgh yn-mes a Ejyp, ha'n pyth a wrussowgh dhe dhew vyghtern an Amorysi esa dres an Yordan, dhe Sihon ha dhe Og, a sakersys dhe dhistruyans. 11Ni a glewas, ha'gan kolonn a deudhis, ha nyns esa spyrys gesys yn denvyth a'gas govis; rag an Arloedh agas Duw yw Duw yn nev a-vann ha war an nor a-woeles. 12Ha lemmyn, tewgh dhymm re'n Arloedh, dell wrugavy kuvder dhywgh, hwi ynwedh dhe dhiskwedhes kuvder dhe ji ow thas. Rewgh dhymm tokyn sur 13hwi dhe sparya ow thas ha'm mamm, ow breder ha'm hwerydh, hag oll eus dhedha, ha hwi dhe sawya agan bewnans dhiworth mernans.’ 14Yn-medh an wer dhedhi, ‘Re bo agan bewnans ni ragowgh bys y'n mernans! Mar ny dhiskudhowgh agan negys, pan re an Arloedh dhyn an tir, ny a'th tyght gans tregeredh ha lelder.’

15Ytho hi a's gorras yn-nans gans lovan der an fenester, rag bos hy chi a-bervedh yn fos an sita hag yth esa trigys y'n fos. 16Hi a leveris dhedha, ‘Kewgh dhe'n vro venydhyek, ma na'gas dheffo an helghoryon er dha bynn. Omgudhewgh ena tri dydh, bys pan dhehwel an helghoryon; hag a-wosa kewgh war agas fordh.’ 17An wer a leveris dhedhi, ‘Kwit vydhyn a'th ti ma a wrussys dhyn y di, 18marnas pan dhyffyn dhe'n tir, ty a gelm kordenn an neus kogh ma y'n fenester ma'gan gorrsys yn-nans dredhi, ha ty a guntell dha das ha'th vamm, dha vreder hag oll dhe deylu y'th chi. 19Piwpynag ello yn-mes a dharasow dha ji bys y'n stretys, y woes ev a vydh war y benn y honan, ha kwit vydhyn. Mes piwpynag a vo genes y'n chi, y woes ev a vydh war agan penn ni mars yw tewlys diwla warnodho. 20Mes mar tiskwedhydh agan negys, kwit vydhyn a'th ti a wrussys dhyn y di.’ 21Yn-medh hi, ‘Y fydh dell leversys.’ Ytho hi a's dannvonas yn-kerdh. Wosa i dhe dhiberth, hi a golmas an gordenn gogh y'n fenester.

22Wosa i dhe dhiberth, i a dheuth y'n vro venydhyek ha gortos ena tri dydh, bys pan dhehwelsa an helghoryon. An helghoryon a's hwilsa yn oll an fordh mes ny's kavsons. 23Ytho an dhew wour a dhehwelis ha dos yn-nans a'n vro venydhyek. I a dreusis an avon ha dos dhe Yoshua mab Nun, ha derivas dhodho pup-tra a hwarvia dhedha. 24Yn-medhons dhe Yoshua, ‘Yn hwir an Arloedh re ros yn agan diwla oll an tir; hag oll annedhysi an tir re deudhis yn own a-dheragon.’