Sitys Meneghi

1An Arloedh a leveris dhe Yoshua, 2‘Lavar dhe vebyon Ysrael, “Gwrewgh ragowgh an sitys meneghi, a gewsis dhywgh anedha dre leuv Moyses, 3may fio bys di ladher a wysk den dre wall ha heb entent; hag i a vydh agas meneghi dhiworth dialor an woes. 4Ev a fi dhe onan a'n sitys ma ha sevel yn daras yet an sita, ha styrya an kas yn skovornow henavogyon an sita na. I a'n kemmer a-ji dhe'n sita, ha ri dhodho tyller, may trikko gansa. 5Pan dho dialor an woes war y lergh, ny dhelivrons an ladher dh'y leuv, rag ev dhe weskel y gentrevek heb godhvos, ha heb atti kyns. 6Ev a drig y'n sita na bys pan sev a-dherag an guntelles rag breus, bys mernans an arghoferyas esa y'n prys na: ytho an ladher a dhehwel, ha dos dh'y sita ha dh'y ji, dhe'n sita le may fias dhiworti.” ’

7I a sakras Kedesh yn Galile yn bro venydhyek Naftali, ha Shekem yn bro venydhyek Efraym, ha Kiryath-arba (yw Hebron) yn bro venydhyek Yuda. 8Dres an Yordan troha'n howldrevel a Yeriko, i a ros Beser y'n gwylvos war an ughelgompesenn, dhiworth loeth Rewben, ha Ramoth yn Gilead, dhiworth loeth Gad, ha Golan yn Bashan, dhiworth loeth Manasse. 9An re ma yw an sitys apoyntys rag oll an Ysraelysi, ha rag an alyon trigys yn aga mysk, may fia bys di ladher a wysk den heb godhvos, ma na varwa dre leuv dialor an woes, kyns ev dhe sevel a-rag an guntelles.