Sitys an Levysi

1Ena pennow teyluyow an Levysi a dheuth dhe Eleazar an oferyas ha dhe Yoshua mab Nun ha dhe bennow teyluyow loethow mebyon Ysrael; 2hag i a leveris dhedha yn Shilo yn pow Kanan, ‘An Arloedh a worhemmynnis dre leuv Moyses ri dhyn sitys rag triga ynna, war-barth gans peurvaow rag agan bestes.’ 3Ytho mebyon Ysrael a ros dhe'n Levysi yn-mes a'ga eretons aga honan war-lergh ganow an Arloedh, an sitys ma ha'ga feurvaow.

4An kynsa koelbrenn a dheuth yn-mes rag teyluyow an Kohathysi. Ytho an Levysi mebyon Aron an oferyas a dhegemmeras trydhek sita dewisys gans koelbrenn dhiworth loeth Yuda, ha dhiworth loeth an Simeonysi, ha dhiworth loeth Benyamin.

5Remenant an Kohathysi a dhegemmeras deg sita gans koelbrenn dhiworth teyluyow loethow Efraym, Dan, ha hanter-loeth Manasse.

6An Gershonysi a dhegemmeras trydhek sita gans koelbrenn dhiworth teyluyow loethow Yssakar, Asher, Naftali, ha hanter-loeth Manasse yn Bashan.

7An Merarysi a dhegemmeras dewdhek sita war-lergh aga theyluyow dhiworth loeth Rewben, dhiworth loeth Gad, ha dhiworth loeth Zebulun.

8Ytho an Ysraelysi a ros dhe'n Levysi gans koelbrenn an sitys ma ha'ga feurvaow, dell worhemmynnis an Arloedh dre leuv Moyses.

9Hag i a ros yn-mes a loethow mebyon Yuda ha Simeon, an sitys henwys omma: 10i a veu res dhe deyluyow an Kohathysi a vebyon Levi, vebyon Aron, rag an kynsa koelbrenn a goedhas dhedha. 11I a ros dhedha Kiryath-arba (Arba o tas Anak), honn yw Hebron, yn bro venydhyek Yuda, gans an peurva yn hy hyrghynn. 12Mes i a rosa parkow an sita ha'y godrevow dhe Kaleb mab Yefunne rag y berghennogeth.

13Dhe vebyon Aron an oferyas i a ros Hebron, sita meneghi rag an ladher, gans hy feurva, ha Libna gans hy feurva, 14Yattir gans hy feurva, Eshtemoa gans hy feurva, 15Holon gans hy feurva, Debir gans hy feurva, 16Ayn gans hy feurva, Yutta gans hy feurva, ha Beth-shemesh gans hy feurva: naw sita dhiworth an dhew loeth ma. 17Ha dhiworth loeth Benyamin: Gibeon gans hy feurva, Geba gans hy feurva, 18Anathoth gans hy feurva, hag Almon gans hy feurva: peder sita. 19Sommenn sitys mebyon Aron, an oferysi: trydhek sita gans aga feurvaow.

20Remenant teyluyow Kohathysi an Levysi a dhegemmeras sitys gans koelbrenn dhiworth loeth Efraym. 21I a ros dhedha Shekem gans hy feurva yn bro venydhyek Efraym, sita meneghi rag an ladher, ha Gezer gans hy feurva, 22Kibsaym gans hy feurva, ha Beth-horon gans hy feurva: peder sita. 23Dhiworth loeth Dan: Elteke gans hy feurva, Gibbethon gans hy feurva, 24Ayyalon gans hy feurva, Gath-rimmon gans hy feurva: peder sita. 25Dhiworth hanter-loeth Manasse, Taanak gans hy feurva, ha Gath-rimmon gans hy feurva: diw sita. 26Yth esa sommenn a dheg sita gans aga feurvaow rag remenant teyluyow an Kohathysi.

27I a ros dhe'n Gershonysi a deyluyow an Levysi, dhiworth hanter-loeth Manasse, Golan yn Bashan gans hy feurva, sita meneghi rag an ladher, ha Beeshtera gans hy feurva: diw sita. 28Dhiworth loeth Yssakar: Kishyon gans hy feurva, Daberath gans hy feurva, 29Yarmuth gans hy feurva, En-gannim gans hy feurva: peder sita; 30Dhiworth loeth Asher: Mishal gans hy feurva, Abdon gans hy feurva, 31Helkath gans hy feurva, ha Rehob gans hy feurva: peder sita. 32Dhiworth loeth Naftali: Kedesh yn Galile gans hy feurva, sita meneghi rag an ladher, Hammoth-dor gans hy feurva, ha Kartan gans hy feurva; teyr sita. 33Sommenn sitys teyluyow an Gershonysi a veu trydhek, gans hy feurvaow.

34Dhe remenant an Levysi, teyluyow an Merarysi i a ros dhiworth loeth Zebulun: Yokneam gans hy feurva, Karta gans hy feurva, 35Dimna gans hy feurva, Nahalal gans hy feurva: peder sita. 36Dhiworth loeth Rewben: Beser gans hy feurva, Yahas gans hy feurva, 37Kedemoth gans hy feurva, ha Mefaath gans hy feurva: peder sita. 38Dhiworth loeth Gad: Ramoth yn Gilead gans hy feurva, sita meneghi rag an ladher, Mahanaym gans hy feurva, 39Heshbon gans hy feurva, Yazer gans hy feurva: sommenn a beder sita. 40Ytho sommenn an sitys res gans koelbrenn dhe deyluyow an Merarysi, remenant an Levysi, o dewdhek sita.

41Sommenn sitys an Levysi synsys gans an Ysraelysi o eth sita ha dew-ugens gans aga feurvaow. 42Pubonan a'n sitys ma a's tevo hy feurva yn hy hyrghynn; yndella y feu rag oll an sitys ma.

43Yndella Arloedh a ros dhe Ysrael oll an tir a dosa y ri dh'aga thasow; hag i a'n eritas, ha triga ynno. 44Ha'n Arloedh a ros dhedha powes oll a-derdro, war-lergh oll a dosa dh'aga thasow; ha nyns esa gour dhiworth oll aga eskerens a allas sevel er aga fynn; rag an Arloedh a ros oll aga eskerens yn aga leuv. 45Ny fyllis nagonan a'n ambosow da re gowssa an Arloedh dhe ji Ysrael; pubonan oll a veu kollenwys.