Loethow an Howldrevel a Dhehwel Tre

1Ena Yoshua a elwis an Rewbenysi, an Gadysi, ha hanter-loeth Manasse, 2ha leverel dhedha, ‘Hwi re withas oll a worhemmynnis Moyses gwas an Arloedh dhywgh, hag obaya ow lev yn oll re worhemmynnis vy dhywgh; 3ny forsaksowgh agas breder an lies dydh ma, bys y'n jydh ma, mes gwitha charj gorhemmynn an Arloedh agas Duw. 4Ha lemmyn an Arloedh agas Duw re ros powes dh'agas breder, dell ambosas dhedha. Ytho lemmyn treylyewgh ha mos dh'agas tyldow ha dhe dir agas perghennogeth a ros Moyses gwas an Arloedh dhywgh dres an Yordan. 5Mes gwaytyewgh gwitha gans rach an gorhemmynn ha'n lagha a worhemmynnis Moyses gwas an Arloedh dhywgh: kara an Arloedh agas Duw, kerdhes yn oll y fordhow, gwitha y worhemmynnow, ha glena dhodho, ha'y servya gans oll agas kolonn hag gans oll agas enev.’ 6Ytho Yoshua a's bennigas ha'ga dannvon dhe-ves, hag i eth dh'aga thyldow.

7Lemmyn dhe unn hanter a loeth Manasse Moyses re rosa perghennogeth yn Bashan; mes dhe'n hanter arall Yoshua re rosa perghennogeth ryb aga breder y'n tir a'n howlsedhes dhe'n Yordan. Pan wrug Yoshua aga dannvon dhe-ves dh'aga thyldow ha'ga benniga, 8ev a leveris dhedha, ‘Dehwelewgh gans rychys meur dh'agas tyldow, ha gans pur lies gwarthek, gans arghans, owr, brons, ha horn, ha gans pur lies dillas; rynnewgh gans agas breder preydh agas eskerens.’ 9Ytho mebyon Rewben ha mebyon Gad ha hanter-loeth Manasse a dhehwelis ha diberth a'n Ysraelysi yn Shilo, usi yn pow Kanan, rag mos dhe bow Gilead, dhe dir aga ferghennogeth re gemmersens war-lergh ganow an Arloedh dre leuv Moyses.

10Pan dheuthons dhe Geliloth ryb an Yordan yn pow Kanan, mebyon Rewben ha mebyon Gad ha hanter-loeth Manasse a dhrehevis alter ena ryb an Yordan, alter vras dhe weles. 11An Ysraelysi a glewas an Rewbenysi ha'n Gadysi ha hanter-loeth Manasse dhe drehevel alter a-dal pow Kanan, yn Geliloth ryb an Yordan, war denewen an Ysraelysi. 12Pan glewas an Ysraelysi anodho, oll kuntelles mebyon Ysrael a omguntellas yn Shilo, rag gwerrya er aga fynn.

13Ena an Ysraelysi a dhannvonas an oferyas Finehas mab Eleazar dhe bow Gilead dhe'n Rewbenysi ha'n Gadysi ha dhe hanter-loeth Manasse, 14ha ganso deg penntern, unn penntern a bub loeth a Ysrael, ha pubonan penn chi aga thasow yn mysk kordhow Ysrael. 15I a dheuth dhe'n Rewbenysi, dhe'n Gadysi, ha dhe hanter-loeth Manasse dhe bow Gilead, hag yn-medhons dhedha, 16‘Yndellma y lever oll kuntelles an Arloedh, “Pyth yw an dislelder ma re wrussowgh erbynn Duw Ysrael ow treylya hedhyw dhiworth siwya an Arloedh, ow trehevel alter ragowgh agas honan hedhyw yn rebellyans erbynn an Arloedh? 17A ny veu lowr dhyn kammweyth Peor? Bys y'n jydh hedhyw ny omlanhasyn anodho, kyn teuth an plag war guntelles an Arloedh. 18Ha hedhyw hwi re dreylyas a siwya an Arloedh. Mar rebellyowgh erbynn an Arloedh hedhyw, serrys vydh a-vorow gans oll kuntelles Ysrael. 19Mes mars yw avlan tir agas perghennogeth, treusewgh dhe dir perghennogeth an Arloedh le may powes tabernakel an Arloedh, ha kemmerewgh rann ragowgh agas honan yn agan mysk. Saw na rebellyewgh erbynn an Arloedh na er agan pynn ni, ow trehevel ragowgh alter nag yw alter an Arloedh agan Duw. 20A ny veu Akan mab Zeragh dislel a-dro dhe'n taklow sakrys dhe dhistruans, hag yth esa sorr war oll kuntelles Ysrael? Ny veu ev an unn gour eth dhe goll rag y gammweyth.” ’

21Ytho an Rewbenysi, ha'n Gadysi, ha hanter-loeth Manasse a worthybis ha leverel dhe bennow kordhow Ysrael, 22‘An Galloesek, Duw, an Arloedh, Duw an duwow! An Arloedh, ev a woer; ha re wodhvo Ysrael y honan! Mar pe hemma yn rebellyans po yn dislelder erbynn an Arloedh, na'n sparyewgh ni y'n jydh ma. 23Mar trehaffen ragon alter rag treylya a siwya an Arloedh, po mar kwrellen warnedhi offrynn leskys po offrynn greun po mar kwrellen warnedhi sakrifisow offrynnow kres, an Arloedh y honan a hwilsa agan kessydhya. 24Nansi, mes ni re wrug hemma rag own agas mebyon dhe leverel dh'agan mebyon ni y'n termyn a dheu, “Pyth yw agas kevrenn gans an Arloedh, Duw Ysrael? 25Rag an Arloedh re wrug an Yordan or yntra ni ha hwi, hwi Rewbenysi ha Gadysi; nyns eus dhywgh rann y'n Arloedh.” Ytho agas mebyon hwi a allsa lettya agan mebyon ni rag perthi own a'n Arloedh. 26Rakhenna ni a leveris, “Drehevyn lemmyn alter, na vydh rag offrynn leskys, na rag sakrifis, 27mes dhe vos dustunier yntra ni ha hwi, hag ynter agan henedhow war agan lergh, may hwren ni servis an Arloedh a-ragdho gans agan offrynnow leskys ha'gan sakrifisow ha'gan offrynnow kres; ma na lavarro agas mebyon dh'agan mebyon yn termyn a dheu, ‘Nyns eus dhywgh rann y'n Arloedh.’ ” 28Ni a brederis, Mar pe henna leverys dhyn ni po dh'agan henedh y'n termyn a dheu, ni a allsa leverel, “Mirewgh orth semlans alter an Arloedh, a wrug agan tasow, a-der rag offrynnow leskys, na rag sakrifis, mes avel dustunier yntra ni ha hwi.” 29Pell bedhes dhiworthyn ni defia an Arloedh, ha treylya y'n jydh ma a siwya an Arloedh rag drehevel alter rag offrynn leskys, offrynn, po sakrifis, nag yw alter an Arloedh agan Duw usi a-rag y dabernakel.’

30Pan glewas Finehas an oferyas ha ledyoryon an kuntelles, ha pennow kordhow Ysrael esa ganso, an geryow a gewsis an Rewbenysi ha'n Gadysi ha mebyon Manasse, yth o da yn aga golok. 31Finehas an oferyas mab Eleazar a leveris dhe'n Rewbenysi ha dhe'n Gadysi ha dhe vebyon Manasse, ‘Hedhyw ni a woer bos an Arloedh yn agan mysk drefenn na wrussowgh travyth dislel erbynn an Arloedh; lemmyn hwi re sawyas an Ysraelysi yn-mes a leuv an Arloedh.’

32Ytho Finehas an oferyas mab Eleazar ha'n ledyoryon a dhehwelis a-dhiworth an Rewbenysi ha'n Gadysi yn pow Gilead dhe bow Kanan, dhe'n Ysraelysi, hag i a ros derivas dhedha. 33Pes da o an Ysraelysi; ha'n Ysraelysi a vennigas Duw ha ny gowssons namoy a vos yn-bann er aga fynn gans lu, rag distrui an tir le mayth esa an Rewbenysi ha'n Gadysi trigys. 34An Rewbenysi ha'n Gadysi a henwis an alter Dustunier, ‘Drefenn hy bos dustunier yntredhon bos an Arloedh Duw.’