Farwell Yoshua dhe Ledyoryon Ysrael

1Lies blydhen a-wosa, a-ban rosa an Arloedh powes dhe Ysrael a-dhiworth oll aga eskerens y'n kyrghynn, ha pan o Yoshua gyllys koth yn y dhydhyow, 2Yoshua a elwis oll Ysrael, aga henavogyon, aga rewloryon, aga breusysi ha'ga soedhogyon, ha leverel dhedha, ‘Gyllys koth ov lemmyn y'm dydhyow; 3ha hwi re welas pup-tra re wrug an Arloedh agas Duw dhe oll an kenedhlow ma a-barth dhywgh; y feu an Arloedh agas Duw a omladhas ragowgh. 4Mirewgh fatell wrugavy ranna ragowgh an kenedhlow ma yw gesys avel eretons rag agas loethow, a-dhiworth an Yordan hag oll an kenedhlow re dhistruis, bys an Mor Meur y'n howlsedhes. 5An Arloedh agas Duw y honan a's fesyas a-dheragowgh, ha'ga chasya mes a'gas gwel; ha hwi a gemmer aga thir yn perghennogeth, par dell leveris an Arloedh agas Duw dhywgh. 6Ytho bedhewgh pur grev, ha gwaytyewgh gul pup-tra yw skrifys yn lyver lagha Moyses, heb treylya a-denewen naneyl dhe'n barth dhyghow na dhe'n barth kledh. 7Na gowethyewgh gans an kenedhlow ma yw gesys yn agas mysk, na elwewgh war henwyn aga duwow, na wrewgh tiow, na wregh aga servya ha na omblegyewgh dhedha, 8mes glenewgh orth an Arloedh agas Duw, dell wrussowgh bys y'n jydh ma. 9Rag an Arloedh re fesyas a-dheragowgh kenedhlow bras ha galloesek; nyns eus gour a allas sevel orthowgh bys y'n jydh ma. 10Unn gour mes a'gas mysk a yll chasya mil, rag an Arloedh agas Duw a omladh ragowgh, dell ambosas dhywgh. 11Gorwithewgh ytho dhe gara an Arloedh agas Duw. 12Rag mar treylyowgh dhe-ves ha glena orth remenant an kenedhlow ma yw gesys yn agas mysk, ha mar junyowgh gansa yn demmedhyans, ha mar kowethyowgh gansa hag i genowgh hwi, 13godhvydhewgh yn sur na wra an Arloedh agas Duw fesya an kenedhlow ma a-dheragowgh arta. I a vydh antell ha maglenn dhywgh, skorja war agas keynow, ha dreyn yn agas lagasow, bys pan ewgh dhe goll a-dhiwar an dor da ma a wrug an Arloedh agas Duw ri dhywgh.

14‘Lemmyn yth esov ow mos y'n jydh ma yn fordh oll an tir, ha hwi a woer yn oll agas kolonn ha'gas enev, na goedhas travyth a oll an traow da a ambosis an Arloedh agas Duw dhywgh. Pup-tra re hwarva ragowgh, ha ny fyllis unn ger anodho. 15Mes par dell hwarva ragowgh pup-tra da a ambosis an Arloedh agas Duw dhywgh, yndella ynwedh an Arloedh a dhre warnowgh oll an droktraow, bys pan y'gas distruis dhiworth an tir da re ros an Arloedh agas Duw dhywgh. 16Mar kammdremenewgh erbynn kevambos an Arloedh agas Duw a worhemmynnis dhywgh, ha mars ewgh dhe servya duwow erell, hag omblegya dhedha, sorr an Arloedh a vydh ow leski er agas pynn, hag yth ewgh dhe goll dihwans dhiworth an tir da re ros dhywgh.’