Ysrael a Dreus an Yordan

1Yoshua a sevis myttin a-varr hag i eth yn-kerdh dhiworth Shittim ha dos bys y'n Yordan, ev hag oll an Ysraelysi. I a wortas ena kyns i dhe dreusi. 2Ytho dhe benn tri dydh an soedhogyon a dremenas der an kamp, 3hag i a worhemmynnis dhe'n bobel ow leverel, ‘Pan welowgh argh kevambos an Arloedh agas Duw, ha'n oferysi, an Levysi, orth hy doen, hwi ynwedh ewgh yn-rag a'gas tyller ha'y holya. 4Byttegyns omwithewgh neb pellder dhiworti, a-dro dhe dhew vil gevelin; na dhewgh nes dhedhi mayth aswonnowgh an fordh mayth ewgh warnedhi, rag ny dremensowgh an fordh ma kyns.’ 5Yoshua a leveris dhe'n bobel, ‘Omsakrewgh; rag a-vorow an Arloedh a wra marthusyon yn agas mysk.’ 6Ha Yoshua a gewsis dhe'n oferysi, ow leverel, ‘Drehevewgh argh an kevambos, ha treusewgh a-dherag an bobel.’ Ytho i a dhrehevis argh an kevambos ha mos a-dherag an bobel.

7An Arloedh a leveris dhe Yoshua, ‘An jydh ma my a dhalleth dha veurhe yn dewlagas oll Ysrael, hag i a woer my dhe vos genes, par dell esen vy gans Moyses. 8Ha ty a worhemmynn dhe'n oferysi usi ow toen argh an kevambos, ow leverel, “Pan dhewgh dhe amal dowrow an Yordan, ke ha sevewgh y'n Yordan.” ’ 9Ytho Yoshua a leveris dhe'n Ysraelysi, ‘Dewgh nes omma ha goslowewgh orth geryow an Arloedh agas Duw.’ 10Ha Yoshua a leveris, ‘Gans hemma godhvydhewgh bos an Duw bew yn agas mysk hag ev dhe fesya a-dheragowgh heb falladow an Kananysi, an Hittysi, an Hivysi, an Perizzysi, an Girgashysi, an Amorysi ha'n Yebusysi. 11Otta, yma argh kevambos Arloedh oll an nor ow treusi a-dheragowgh y'n Yordan. 12Lemmyn kemmerewgh dewdhek gour dhiworth loethow Ysrael, unn gour dhiworth pub loeth. 13Ha pan bowes godhnow treys an oferysi usi ow toen argh an Arloedh, Arloedh oll an nor, yn dowrow an Yordan, dowrow an Yordan a vydh treghys dhiworth an dowrow a dheu yn-nans a-wartha; hag i a sev yn graghell.’

14Ytho pan eth an bobel yn-rag dhiworth aga thyldow dhe dreusi an Yordan, an oferysi esa ow toen argh an kevambos eth a-rag an bobel. 15Pan dheuth an re esa ow toen an argh bys y'n Yordan, ha treys an oferysi esa ow toen an argh a veu troghys yn amal an dowrow, rag an Yordan a fenn dres oll y lannow oll dydhyow an drevas, 16an dowrow esa ow tos yn-nans a-wartha a sevis stag; i a omdhrehevis yn graghell mar bell avel Adam, an sita usi ryb Sarethan; ha'n dowr esa ow mos troha Mor an Araba, Mor an Hoelan, a veu stoppys yn tien. Ytho an bobel a dreusis a-dal Yeriko. 17An oferysi esa ow toen argh kevambos an Arloedh a sevis fast war syghtir yn kres an Yordan, hag oll Ysrael a dreusis war syghtir, bys pan worfennas oll an genedhel treusi an Yordan.