Dewdhek Men Settys Yn-bann

1Ytho, pan worfennas oll an genedhel treusi an Yordan, an Arloedh a leveris dhe Yoshua: 2‘Kemmerewgh dhiworth an bobel dewdhek gour, unn gour dhiworth pub loeth, 3ha gorhemmynnewgh dhedha, “Kemmerewgh dewdhek men alemma dhiworth kres an Yordan, yn-mes a'n tyller may sevis fast treys an oferysi, ha'ga doen genowgh, ha'ga settya y'n tyller may fydhowgh ow spena an nos.” ’ 4Ytho Yoshua a elwis an dewdhek gour re apoyntsa dhiworth an Ysraelysi, gour dhiworth pub loeth. 5Yn-medh Yoshua dhedha, ‘Tremenewgh a-rag argh an Arloedh agas Duw dhe gres an Yordan, ha kemmerewgh pub gour ahanowgh unn ven war y skoedh, war-lergh niver loethow an Ysraelysi, 6may fo hemma tokyn yn agas mysk. Pan wovynn agas mebyon yn termyn a dheu, “Pandr'a styr an meyn ma dhywgh?” 7ena hwi a lever dhedha, y feu dowrow an Yordan stoppys a-rag argh kevambos an Arloedh. Pan dreusis an Yordan, stoppys veu dowrow an Yordan. Ytho an meyn ma a vydh kovadh dhe'n Ysraelysi bys vykken.’

8Ytho an Ysraelysi a wrug yndella, dell worhemmynnis Yoshua, ha doen dewdhek men yn-mes a gres an Yordan, dell leveris an Arloedh dhe Yoshua, war-lergh niver loethow an Ysraelysi, hag i a's dug gansa dh'aga thyller, ha'ga gorra ena. 9Yoshua a settyas yn-bann an dewdhek men re bia yn kres an Yordan y'n tyller may sevis treys an oferysi a dhug argh an kevambos; hag ymons i ena bys y'n jydh ma.

10An oferysi esa ow toen an argh a sevi yn kres an Yordan, bys pan veu kollenwys pup-tra a wrug an Arloedh y worhemmynna dhe Yoshua dhe leverel dhe'n bobel, war-lergh pup-tra a wrug Moyses y worhemmynna dhe Yoshua. Ha'n bobel a dreusis yn unn fistena. 11Ha kettell worfennas oll an bobel treusi, argh an Arloedh ha'n oferysi a dreusis a-rag an bobel. 12An Rewbenysi, an Gadysi, ha'n hanter-loeth Manasse a dreusis arayys rag kas a-rag an Ysraelysi, dell gewsis Moyses dhedha. 13A-dro dhe dhewgens mil ervys rag an gas a dreusis a-rag an Arloedh dhe blenys Yeriko rag bresel.

14Y'n jydh na an Arloedh a veurhas Yoshua yn golok oll Ysrael; hag i a berthi own anodho dell berthens own a Moyses, oll dydhyow y vewnans.

15An Arloedh a leveris dhe Yoshua, 16‘Gorhemmynn dhe'n oferysi usi ow toen argh an dustuni, mayth yskynnons yn-mes a'n Yordan.’ 17Ytho Yoshua a worhemmynnis dhe'n oferysi, ‘Yskynnewgh yn-mes a'n Yordan.’ 18Pan yskynnas yn-mes a'n Yordan an oferysi esa ow toen argh kevambos an Arloedh, ha pan veu godhnow treys an oferysi drehevys dhe'n tir sygh, dowrow an Yordan a dhehwelis dh'aga thyller ha fenna dres y lannow avel kyns.

19An bobel eth yn-bann dhiworth an Yordan yn degves dydh an kynsa mis, ha kampya yn Gilgal y'n tiredh a'n howldrevel dhe Yeriko; 20hag ena Yoshua a settyas yn-bann an dewdhek men na a gemmersens yn-mes a'n Yordan. 21Ev a leveris dhe'n Ysraelysi, ‘Pan wovynn agas mebyon dhiworth aga thasow y'n termyn a dheu, “Pandr'a styr an meyn ma?” 22ena displegyewgh dh'agas mebyon, “Ysrael a dreusis an Yordan ma war an tir sygh.” 23Rag an Arloedh agas Duw a dhesyghas dowrow an Yordan a-ragowgh bys pan dreussewgh, kepar dell wrug an Arloedh orth an Mor Rudh pan y'n desyghas ragon bys pan dreussen, 24may hwodhve oll poblow an norvys bos krev leuv an Arloedh, ha may perthewgh own a'n Arloedh agas Duw bys vykken.’