Peghes Akan

1Mes mebyon Ysrael a veu dislen yn mater an taklow sakrys; Akan mab Karmi mab Zabdi mab Zeragh, a loeth Yuda, a gemmeras re a'n taklow sakrys; ha sorr an Arloedh a loskas erbynn an Ysraelysi.

2Yoshua a dhannvonas gwer dhiworth Yeriko dhe Ay, usi ogas dhe Beth-aven, a'n howldrevel dhe Bethel, hag a leveris dhedha, ‘Kewgh yn-bann hag aspia an tir.’ Ha'n wer eth yn-bann hag aspia Ay. 3Ena i a dhehwelis dhe Yoshua ha leverel dhodho, ‘Nyns yw res oll an lu dhe vos yn-bann; gas a-dro dhe dhew po tri mil wour dhe omsettya erbynn Ay. Na wra dhe oll an lu lavurya di, rag nebes yns.’ 4Ytho a-dro dhe dri mil souder eth yn-bann di; hag i a fias a-dherag gwer Ay. 5Gwer Ay a ladhas a-dro dhe hwetek warn ugens anedha, ha'ga helghya dhiworth an yet bys y'n Shebarim ha'ga ladha war an leder. Kolonn an bobel a deudhis hag eth ha bos dowr.

6Yoshua a skwardyas y vantell ha koedha dhe'n dor war y fas a-dherag argh Arloedh bys y'n gorthugher, ev ha henavogyon Ysrael; i a dewlis doust war aga fenn. 7Yoshua a leveris, ‘Eghan, Arloedh Duw, prag y tresys an bobel ma dres an Yordan rag agan ri yn leuv an Amorysi dhe vos distruys? Unnweyth a pen ni pes da ow triga a'n tu arall dhe'n Yordan! 8A Arloedh, pandr'a lavarav, pan dreylyas Ysrael aga hilbenn dh'aga eskerens? 9An Kananysi hag oll annedhysi an tir a glew anodho, ha'gan kyrghynna, ha treghi dhe-ves agan hanow dhiworth an tir. Ena pandr'a wre'ta rag dha hanow bras?’

10An Arloedh a leveris dhe Yoshua, ‘Sa'bann; prag y koedhsys war dha fas? 11Ysrael re beghas; i re dreuspassyas erbynn ow hevambos a worhemmynnis dhedha. I re gemmeras re a'n taklow sakrys dhe dhistruyans; i re's ladras, ha'ga hudha, orth aga gorra gans aga lestri aga honan. 12Ytho ny allas mebyon Ysrael sevel a-dherag aga eskerens; i a dreylyas aga hilbenn dh'aga eskerens, drefenn i aga honan dhe vos tra sakrys dhe dhistruyans. Ny vydhav genowgh namoy, marnas hwi a dhistru an taklow sakrys a-dhiworthowgh. 13Yn-sol, sansha an bobel, ha lavar, “Omsanshewgh rag a-vorow; rag yndellma y lever an Arloedh, Duw Ysrael, ‘Yma taklow sakrys y'n kres ahanas, A Ysrael; ny yllydh sevel a-dherag dha eskerens bys may kemmerowgh dhe-ves an taklow sakrys a'gas mysk.’ 14Ytho y'n myttin hwi a dheu nes war-lergh agas loethow. Ha'n loeth a wra an Arloedh y gemmeres a dheu yn-rag war-lergh an teyluyow, ha'n teylu a wrug an Arloedh y gemmeres a dheu nes war-lergh an chiow, ha'n chi a wrug an Arloedh y gemmeres a dheu nes an eyl wosa y gila. 15An den yw kemmerys gans an tra sakrys a vydh leskys gans tan, ev hag oll a'n jeves, drefenn ev dhe dreuspassya erbynn kevambos an Arloedh ha drefenn ev dhe wul outray yn Ysrael.” ’

16Ytho Yoshua a sevis myttin a-varr, ha dri an Ysraelysi nes war-lergh aga loethow, ha loeth Yuda a veu kemmerys. 17Ev a dhros nes teyluyow Yuda, ha teylu an Zerahysi a veu kemmerys; hag ev a dhros nes teylu Zerahysi, an eyl wosa y gila, ha Zabdi a veu kemmerys. 18Hag ev a dhros nes an teylu na, an eyl wosa y gila, hag Akan mab Karmi, mab Zabdi, mab Zeragh, a loeth Yuda, a veu kemmerys. 19Ena Yoshua a leveris dhe Akan, ‘Ow mab, ro enor dhe'n Arloedh, Duw Ysrael, ha ro grasyans dhodho. Deriv dhymm pandr'a wrussys; na gudh e ahanav.’ 20Akan a worthybis dhe Yoshua ha leverel, ‘Gwir yw; my yw neb re beghas erbynn an Arloedh, Duw Ysrael. Hemm yw an pyth a wrug: 21pan welis y'n preydh mantell deg a Shinar, ha dew kans shekel a arghans, ha barr a owr deg ha dew-ugens shekel y boes, my a's hwansas ha'ga hemmeres. Kudhys yns y'n dor a-ji dhe'm tylda, gans an arghans a-woeles.’

22Ytho Yoshua a dhannvonas kannasow, hag i a boenyas dhe'n tylda; hag awotta, yth ens i kudhys a-ji dh'y dylda gans an arghans a-woeles. 23I a's kemmeras yn-mes a'n tylda ha'ga dri dhe Yoshua ha dhe oll an Ysraelysi; hag i a's gorras a-rag an Arloedh. 24Ena Yoshua hag oll Ysrael ganso a gemmeras Akan mab Zeragh, ha'n arghans, ha'n vantell, ha'n barr a owr, ha'y vebyon, ha'y vyrghes, ha'y oghen, ha'y asenes, ha'y dheves, ha'y dylda, hag oll a'n jeva; hag i a's dros dhe nans Aghor. 25Yoshua a leveris, ‘Prag y tresys anfeusi warnan? Yma an Arloedh ow tri anfeusi warnas y'n jydh ma.’ Ena oll an Ysraelysi a'n labydhas; i a's loskas gans tan, ha'ga labydha gans meyn, 26ha drehevel a-ughto kals meyn usi ena bys y'n jydh ma. Ena an Arloedh a dreylyas dhiworth y sorr fers. Ytho hanow an tyller na re beu nans Aghor bys y'n jydh ma.