Toell Gibeon

1Lemmyn pan glewas oll an vyghternedh esa a'n howlsedhes dhe'n Yordan y'n vro venydhyek hag y'n Shefela ha ryb oll arvor an Mor Bras war-tu ha Lebanon – an Hittysi, an Amorysi, an Kananysi, an Perizzysi, an Hivysi, ha'n Yebusysi, 2i a omguntellas gans unn akord rag omladh erbynn Yoshua hag Ysrael.

3Mes pan glewas annedhysi Gibeon an pyth a wrug Yoshua dhe Yeriko ha dhe Ay, 4i a wrug gweythres fel: i eth ha pareusi boes rag an vyaj, hag i a gemmeras seghyer usys rag aga asenes, ha kreghyn gwin, usys ha folsys ha gwriys gans kloutys, 5ha sandalyow usys ha kloutys war aga threys, ha dillas usys warnedha; hag oll an bara rag aga vyaj a veu desyghys ha brewsyon. 6I eth dhe Yoshua, dhe'n kamp yn Gilgal, ha leverel dhodho ha dhe wer Ysrael, ‘Ni re dheuth dhiworth pow pell; ytho gwrewgh kevambos genen lemmyn.’ 7Mes gwer Ysrael a leveris dhe'n Hivysi, ‘Martesen trigys esowgh ogas dhyn, ytho fatell yllyn gul kevambos genowgh?’ 8Yn-medhons dhe Yoshua, ‘Dha wesyon on.’ Ha Yoshua a leveris dhedha, ‘Piw owgh? Hag a-ble owgh devedhys?’ 9I a leveris dhodho, ‘Dha wesyon re dheuth dhiworth pow pur bell, drefenn hanow an Arloedh dha Dhuw; rag ni re glewas ger-da yn y gever, ha pup-tra a wrug yn Ejyp, 10ha pup-tra a wrug dhe dhew vyghtern an Amorysi esa dres an Yordan, dhe Sihon myghtern Heshbon, ha dhe Og myghtern Bashan trigys yn Ashtaroth. 11Ytho agan henavogyon hag oll annedhysi agan pow a leveris dhyn, “Kemmerewgh yn agas leuv boes rag an vyaj; kewgh dh'aga dyerbynna, ha leverel dhedha, ‘Agas gwesyon on; ytho gwrewgh kevambos genen lemmyn.’ ” 12Hemm yw agan bara; ni a'n kemmeras toemm hwath dhiworth agan chiow rag agan boes rag an vyaj, an jydh mayth ethen yn-mes dhe vos dhywgh, mes lemmyn, mirewgh, desyghys ha brewsyon yw; 13ha nowydh o an kreghyn gwin ma pan y's lenwsyn, ha mirewgh, folsys yns; ha'gan dillas ha sandalyow ma yw usys drefenn an vyaj pur bell.’ 14Ytho an wer a gemmeras rann a'ga boes, ha ny wovynnsons kusul orth ganow an Arloedh. 15Yoshua a wrug kres gansa, ha gul kevambos gansa, rag sparya aga bewnans; ha ledyoryon an kuntelles a dos dhedha.

16Mes dhe benn tri dydh wosa i dhe wul kevambos gansa, i a glewas aga bos aga hentrevogyon ha trigys ogas dhedha. 17Ytho an Ysraelysi eth yn-rag ha dos dh'aga sitys y'n tressa dydh. Aga sitys o Gibeon, Kefira, Beeroth, ha Kiryath-yearim. 18Mes ny omsettyas an Ysraelysi er aga fynn drefenn ledyoryon an kuntelles dhe di dhedha re'n Arloedh, Duw Ysrael. Ena oll an kuntelles a grodhvolas war an ledyoryon. 19Mes oll an ledyoryon a leveris dhe oll an kuntelles, ‘Ni re dos dhedha re'n Arloedh, Duw Ysrael, ha lemmyn ny yllyn aga thochya. 20Hemma ni a wra dhedha: Ni a's gas dhe vewa, ma na vydh sorr warnan, drefenn an ti a desen dhedha.’ 21Yn-medh an ledyoryon, ‘Bewens i, mes bedhens treghysi keunys ha tennoryon dowr rag oll an kuntelles’, dell lavarsa an ledyoryon dhedha.

22Yoshua a elwis dhedha, ha leverel dhedha, ‘Prag y'gan toellsowgh, ow leverel, “Trigys eson pur bell dhiworthowgh”, mes yth esowgh trigys ogas dhyn ni? 23Ytho lemmyn milliges owgh, ha ny vydhydh livrys a vos kethyon, treghysi keunys ha tennoryon dowr rag chi ow Duw.’ 24I a worthybis dhe Yoshua, ‘Y feu derivys dhe'th wesyon an Arloedh dha Dhuw dhe worhemmynna dh'y was Moyses ri dhywgh oll an pow, ha distrui oll annedhysi an pow a-ragowgh; ytho ni a berthi own a'gan bewnans a'gas govis, ha rakhenna ni a wrug an dra ma. 25Ha lemmyn yth eson y'th leuv: gwra dhyn par dell hevel da hag ewn y'th tewlagas.’ 26Ytho ev a wrug yndella dhedha: ev a's sawyas dhiworth leuv an Ysraelysi; ha ny's ladhsons. 27Mes y'n jydh na Yoshua a's settyas dhe vos treghysi keunys ha tennoryon dowr rag an kuntelles ha rag alter an Arloedh, bys y'n jydh ma, y'n tyller a dhewisas.