Tola ha Yair

1Wosa Abimelek, Tola mab Pua mab Dodo, gour a Yssakar, trigys yn Shamir yn bro venydhyek Efraym, a sevis dhe dhelivra Ysrael. 2Ev a vreusi Ysrael teyr blydhen warn ugens. Ena y ferwis, hag a veu ynkleudhys yn Shamir.

3War y lergh y teuth Yair an Gileadyas, hag ev a vreusi Ysrael diw vlydhen warn ugens. 4Ev a'n jevo deg mab warn ugens hag a varghoga war dheg asen warn ugens, hag yth esa dhedha deg tre warn ugens yn pow Gilead, ha henwys yth yns Havvoth-yair bys y'n jydh ma. 5Yair a verwis hag a veu ynkleudhys yn Kamon.

Arwask gans an Ammonysi

6Mebyon Ysrael a wrug arta an pyth o drog yn golok an Arloedh, ow kordhya an Baalim ha'n Ashtaroth, duwow Aram, duwow Sidon, duwow Moab, duwow an Ammonysi, ha duwow an Filistysi. Yndella i a asas an Arloedh, ha ny'n gordhyens. 7Ytho sorr an Arloedh a dhewis erbynn Ysrael, hag ev a's gwerthas yn leuv an Filistysi hag yn leuv an Ammonysi, 8hag i a vrewis hag arwaska mebyon Ysrael y'n vlydhen na. Etek blydhen i a waska oll mebyon Ysrael esa dres an Yordan yn pow an Amorysi, usi yn Gilead. 9An Ammonysi ynwedh a dreusis an Yordan rag omladh erbynn Yuda, erbynn Benyamin, hag erbynn chi Efraym; yndella Ysrael a berthi ahwer meur.

10Ytho mebyon Ysrael a grias dhe'n Arloedh ow leverel, ‘Ni re beghas er dha bynn, drefenn ni dhe asa agan Duw, ha servya an Baalim.’ 11Ha'n Arloedh a leveris, ‘A ny'gas delivris dhiworth an Ejyptianys ha dhiworth an Amorysi ha dhiworth an Ammonysi ha dhiworth an Filistysi? 12An Sidonysi ynwedh ha'n Amalekysi, ha'n Maonysi a'gas arwaska; ha hwi a grias dhymmo ha my a'gas delivras dhiworth aga leuv. 13Byttegyns hwi re'm gasas ha re servyas duwow erell, ytho ny'gas delivrav na fella. 14Kewgh ha kriewgh dhe'n duwow re dhewissowgh; gwrens i agas delivra yn termyn agas ahwer.’ 15Ha mebyon Ysrael a leveris dhe'n Arloedh, ‘Ni re beghas; gwra dhyn ni pypynag a hevel da dhis; mes delirv ni, ni a'th pys, y'n jydh ma!’ 16Yndella i a bellhas an duwow estren yn-mes anedha hag a servyas an Arloedh; ha ny allas ev perthi poenvos Ysrael na fella.

17Ena an Ammonysi a veu gelwys dhe arvow, hag i a gampyas yn Gilead; ha mebyon Ysrael a omguntellas, hag i a gampyas yn Mispa. 18Pobel Gilead ha'ga fennsevigyon a leveris an eyl dh'y gila, ‘Piw yw an gour a dhalleth batalyas orth an Ammonysi? Ev a vydh penn war oll trigoryon Gilead.’