Yefthagh

1Lemmyn Yefthagh an Gileadyas a veu kasor galloesek, mes ev a veu mab hora. Gilead a veu tas Yefthagh. 2Gwreg Gilead a omdhuk dhodho mebyon; ha pan vons tevys dhe oes, i a herdhyas Yefthagh dhe-ves, ow leverel dhodho, ‘Ny eritydh travyth yn chi agan tas, rag mab yth os a gen venyn.’ 3Ena Yefthagh a fias a'y vreder hag a drigas yn pow Tob. Outlayers a omguntellas a-dro dhe Yefthagh ha'y holya.

4Wosa termyn an Ammonysi a vatalyas orth Ysrael. 5Ha pan vatalyas orth Ysrael, henavogyon Gilead eth dhe dhri Yefthagh a bow Tob. 6I a leveris dhe Yefthagh, ‘Deus ha bydh agan kaslewydh, rag may patallyen orth an Ammonysi.’ 7Mes Yefthagh a leveris dhe henavogyon Gilead, ‘A nyns owgh an keth re poran ha'n re a'm denaghas ha'm herdhya yn-mes a ji ow thas? Ytho prag y tewgh dhymmo pan berthewgh ahwer?’ 8Henavogyon Gilead a leveris dhodho, ‘Byttegyns ni re dreylyas dhis arta, rag mayth ylli genen ha batalyas orth an Ammonysi, ha mos ha bos penn warnan, war oll trigoryon Gilead.’ 9Yefthagh a leveris dhe henavogyon Gilead, ‘Mara'm drowgh tre arta rag batalyas orth an Ammonysi, ha'n Arloedh a's delirv dhymm, y fydhav agas penn.’ 10Ha henavogyon Gilead a leveris dhe Yefthagh, ‘An Arloedh a vydh yn test yntredhon; mar ny wren war-lergh dha eryow.’ 11Ytho Yefthagh eth gans henavogyon Gilead, ha'n bobel a'n gwrug penn ha kaslewydh warnedha, ha Yefthagh a gewsis oll y eryow a-rag an Arloedh yn Mispa.

12Ena Yefthagh a dhannvonas kannasow dhe vyghtern an Ammonysi ow leverel, ‘Pyth eus yntredhon ni, mayth os devedhys dhymmo rag batalyas orth ow thir?’ 13Myghtern an Ammonysi a worthybis dhe gannasow Yefthagh, ‘Ysrael a gemmeras ow thir, hag ev ow tos yn-bann dhiworth Ejyp, a Arnon dhe'n Yabbok ha dhe'n Yordan; lemmyn ytho daskorr e yn kres.’ 14Unnweyth arta Yefthagh a dhannvonas kannasow dhe vyghtern an Ammonysi 15hag a leveris dhodho, ‘Yndella a lever Yefthagh: Ny dhegemmeras Ysrael tir Moab dhe-ves na tir an Ammonysi, 16mes pan dheuthons yn-bann dhiworth Ejyp, Ysrael eth der an gwylvos dhe'n Mor Rudh hag a dheuth dhe Kadesh. 17Ena Ysrael a dhannvonas kannasow dhe vyghtern Edom, ow leverel, “Gas ni dhe dremena dre dha dir”; mes ny vynna myghtern Edom goslowes. I a dhannvonas ynwedh dhe vyghtern Moab, mes ny vynna assentya. Ytho Ysrael a wortas orth Kadesh. 18Ena i a vyajyas der an gwylvos, i a dremenas ryb pow Edom ha tir Moab hag a dheuth dhe denewen an est dhe bow Moab hag a gampyas a'n tu arall dhe Arnon. Ny entersons tir Moab, rag Arnon o or Moab. 19Ena Ysrael a dhannvonas kannasow dhe Sihon myghtern an Amorysi, myghtern Heshbon; hag Ysrael a leveris dhodho, “Gas ni dhe dremena dre dha dir dh'agan tir ni.” 20Mes ny drestya Sihon may tremenna Ysrael der y diredh, ytho Sihon a guntellas oll y dus war-barth, hag a gampyas yn Yahas, hag a vatalyas orth Ysrael. 21Ena an Arloedh, Duw Ysrael, a ros Sihon hag oll y dus yn leuv Ysrael, hag i a's fethas; ytho Ysrael a eritas oll pow an Amorysi, esa trigys y'n tir na. 22I a eritas oll pow an Amorysi a Arnon bys y'n Yabbok hag a'n gwylvos dhe'n Yordan. 23Yndella an Arloedh, Duw Ysrael, a fethas an Amorysi a-rag y bobel Ysrael. A dewlydh jy may kemmerri aga le? 24A ny dhelledh dhis kavoes an pyth a re dha dhuw Kemosh dhis dh'y gavoes? Hag a ny dhelledh dhyn kavoes oll an pyth a re an Arloedh agan Duw dhyn ni? 25Lemmyn osta gwell dhe wir ages Balak mab Sippor myghtern Moab? A vatalyas a'y oes orth Ysrael, po a werryas gansa? 26Ysrael re beu trigys yn Heshbon ha'y threvow, hag yn Aroer ha'y threvow, hag yn oll an trevow usi ryb Arnon tri hans blydhen; prag na's daskevsys a-ji dhe'n termyn na? 27Ny beghsyn er dha bynn, mes ty re wrug drog er ow fynn, ow kwerrya er ow fynn. An Arloedh, neb yw breusyas, a vreus hedhyw yntra mebyon Ysrael ha'n Ammonysi.’ 28Mes ny woslowas myghtern an Ammonysi orth messaj Yefthagh a dhannvonas dhodho.

Ti Yefthagh

29Ena spyrys an Arloedh a dheuth war Yefthagh, hag ev a dremenas dre Gilead ha Manasse. Ev a dremenas dre Gilead ha Manasse, hag yth eth dhe Mispa a Gilead, hag alena ev a dremenas dhe'n Ammonysi. 30Yefthagh a wrug ti dhe'n Arloedh hag y leveris, ‘Mar redh an Ammonysi y'm leuv, 31ena piwpynag a dheu yn-mes a dharasow ow chi dhe vetya genev pan dhehwelav yn kres a'n Ammonysi, an keth henna a vydh dhe'n Arloedh, avel offrynn leskys’. 32Yndella Yefthagh a dremenas dhe'n Ammonysi rag omladh er aga fynn; ha'n Arloedh a's ros yn y leuv. 33Ev a's fethas yn fen dhiworth Aroer bys yn kyrghynn Minnith, ugens tre, ha bys Abel-keramim. Yndella an Ammonysi a veu fethys a-rag pobel Ysrael.

Myrgh Yefthagh

34Pan dheuth Yefthagh dh'y ji yn Mispa, y feu y vyrgh ow tos yn-mes dhe vetya ganso gans tabourigow ha gans donsya. Hi o y unn flogh. Ny'n jevo naneyl mab na myrgh marnas hi. 35Pan y's gwelas ev a skwardyas y dhillas, ha leverel, ‘Ellas ow myrgh, ty re'm dug fest isel, gyllys os acheson a ahwer meur dhymmo, rag my re igoras ow ganow dhe'n Arloedh, hag ny allav daskavoes ow thi.’ 36Hi a leveris dhodho, ‘Ow thas, mar igersys dha anow dhe'n Arloedh, gwra dhymm herwydh an pyth re dheuth a'th anow, rag an Arloedh re ros dhis dial erbynn dha eskerens, an Ammonysi.’ 37Ha hi a leveris dh'y thas, ‘Gas may fo an dra ma gwrys ragov. Gront dhymm dew vis rag mayth ylliv ha gwandra war an menydhyow, ha kyni rag ow gwyrghsys, my ha'm kowethesow.’ 38‘Ke’, yn-medh ev, hag y's dannvonas dhe-ves dew vis. Ytho hi eth, hi ha'y howethesow ha kyni hy gwyrghsys war an menydhyow. 39Orth penn dew vis, hi a dhehwelis dh'y thas, neb a wrug dhedhi herwydh an ti re wrussa. Ny gosksa hi gans gour. Yndella y sevis us yn Ysrael 40yth ylli myrghes Ysrael peswar dydh blydhen wosa blydhen ha kyni myrgh Yefthagh an Gileadyas.