Strif ynter an Kordhow

1Gwer Efraym a veu gelwys dhe arvow, hag i a dreusis dhe Safon hag a leveris dhe Yefthagh, ‘Prag y treussys rag omladh erbynn an Ammonysi, heb agan gelwel dhe vos genes? Ni a lesk dha ji warnas!’ 2Yefthagh a leveris dhedha, ‘Yth esa dhymmo vy ha'm pobel bresel vras gans an Ammonysi. Mes pan y'gas gelwis vy, ny'm delivrsowgh a'ga leuv. 3Pan wodhyen na'm delivrewgh, my a gavas ow bewnans yn ow leuv, hag y treusis dhe'n Ammonysi, ha'n Arloedh a's ros yn ow leuv. Ytho prag yth esowgh ow tos dhymmo hedhyw dhe omladh er ow fynn?’ 4Ena Yefthagh a guntellas oll gwer Gilead hag a vatalyas orth Efraym; ha gwer Gilead a fethas Efraym, drefenn i dhe leverel, ‘Hwi yw fowesigyon a Efraym: Gilead yn kres Efraym, yn kres Manasse.’ 5Ena Gilead a gemmeras rysyow an Yordan erbynn Efraym. Peskweyth may leveri onan a'n fowesigyon a Efraym, ‘Gas vy dhe dreusi’, gwer Gilead a leveri dhodho, ‘Osta Efraymyas?’ Pan leveris, ‘Nag ov’, 6i a leveri, ‘Ytho lavar Shibboleth’ hag ev a leveri ‘Sibboleth’, rag ny wodhya y leverel yn ewn. Ena i a'n synsi ha'y ladha orth rysyow Yordan. Dew vil ha dew-ugens a'n Efraymysi a goedhas y'n termyn na.

7Yefthagh a vreusi Ysrael hwegh blydhen. Ena Yefthagh an Gileadyas a verwis hag a veu ynkleudhys yn y dre yn Gilead.

Ibsan, Elon hag Abdon

8War y lergh Ibsan a Bethlehem a vreusi Ysrael. 9Ev a'n jevo deg mab warn ugens. Ev a ros y dheg myrgh warn ugens yn demmedhyans yn-mes a'y gordh hag a dros a-ji deg mowes yowynk warn ugens a'n tu a-ves rag y vebyon. Ev a vreusi Ysrael seyth blydhen. 10Ena Ibsan a verwis hag a veu ynkleudhys yn Bethlehem.

11War y lergh Elon an Zebulunyas a vreusi Ysrael deg blydhen. 12Ena Elon an Zebulunyas a verwis hag a veu ynkleudhys yn Ayyalon yn tir Zebulun.

13War y lergh Abdon mab Hillel an Pirathonyas a vreusi Ysrael. 14Ev a'n jevo dew-ugens mab ha deg mab-wynn warn ugens, hag a varghoga war dheg asen ha tri-ugens; ev a vreusi Ysrael eth blydhen. 15Ena Abdon mab Hillel an Pirathonyas a verwis hag a veu ynkleudhys yn Pirathon yn tir Efraym, yn bro venydhyek an Amalekysi.