Genesigeth Samson

1Mebyon Ysrael a wrug an pyth o drog yn golok an Arloedh, ha'n Arloedh a's ros yn leuv an Filistysi dew-ugens blydhen.

2Yth esa gour a Sora, a gordh an Danysi, Manoagh y hanow, hag anvap o y wreg, ny's tevo flogh. 3Hag el an Arloedh a omdhiskwedhas dhe'n venyn hag a leveris dhedhi, ‘Kynth os gownagh, ha ny dhuges fleghes, ty a wra omdhoen ha dineythi mab. 4Ytho gwayt na yffi gwin na diwes krev, na dhyppri travyth avlan. 5Rag ty a omdhek ha dineythi mab. Gwayt na dheffo altenn vyth war y benn rag an mab a vydh Naziryas dhe Dhuw a'y enesigeth. Ev a vydh neb a dhalleth delivra Ysrael a leuv an Filistysi.’ 6Ena an venyn a dheuth hag a leveris dh'y gour, ‘Gour Duw a dheuth dhymm, ha'y semlans o haval dhe semlans el Duw, pur euthyk; ny wovynnis vy orto a-ble teuth ha ny dherivas dhymm y hanow, 7mes ev a leveris dhymm, “Ty a omdhek ha dineythi mab. Ytho lemmyn na yv gwin vytholl na diwes krev, ha na dheber travyth avlan, rag an mab a vydh Naziryas dhe Dhuw a'y enesigeth bys dydh y vernans.” ’

8Ena Manoagh a bysis war an Arloedh, ha leverel, ‘A Arloedh, my a bys, gas may teffo dhyn arta an gour Duw a dhannvensys, ha dyski dhyn an pyth dhe wul a-dro dhe'n mab hag a vydh genys.’ 9Duw a woslowas orth Manoagh hag el Duw a dheuth arta dhe'n venyn, ha hi owth esedha y'n mes; mes nyns esa hy gour Manoagh gensi. 10Ytho hi a boenyas skav hag a leveris dh'y gour, ‘An gour a dheuth dhymm nammnygen re omdhiskwedhas dhymm.’ 11Manoagh a sevis hag a holyas y wreg, hag a dheuth dhe'n gour hag a leveris dhodho, ‘Osta jy an gour hag a gewsis dhe'n venyn ma?’ Hag y leveris, ‘Ov.’ 12Ena Manoagh a leveris, ‘Lemmyn pan ello dha eryow ha bos gwir, pyth a vydh rewl bewnans an mab, ha pandr'a vydh y ober?’ 13El an Arloedh a leveris dhe Manoagh, ‘Gwaytyes an venyn gul pup-tra oll a leveris vy dhedhi. 14Difennys vydh orti dybri travyth a dheu a'n gwinbrenn. Difennys vydh orti eva naneyl gwin na diwes krev, na dhybri travyth avlan. Res vydh dhedhi bos gostydh dhe bup-tra re worhemmynnis vy dhedhi.’

15Manoagh a leveris dhe el an Arloedh, ‘Gas ni dhe'th witha genen ha dhe bareusi gevrik ragos.’ 16El an Arloedh a leveris dhe Manoagh, ‘Mara'm gwithydh genowgh, ny dhebrav dha voes; mes mar mynnydh pareusi offrynn leskys, ena gwra y offrynna dhe'n Arloedh.’ Rag ny wodhya Manoagh y vos el an Arloedh. 17Ena Manoagh a leveris dhe el an Arloedh, ‘Pyth yw dha hanow, rag may hyllyn dha enora pan vo gyllys dhe eryow gwir?’ 18Mes el an Arloedh a leveris dhodho, ‘Prag y hwovynnydh orthiv ow hanow? Re varthys yw.’

19Yndella Manoagh a gemmeras an gevrik gans an offrynn greun, ha'y offrynna war an garrek dhe'n Arloedh, dhodho ev neb a wra marthusyon. 20Pan yskynnas an flamm war-tu ha'n nev dhiwar an alter, el an Arloedh a yskynnas yn flamm an alter, ha Manoagh ha'y wreg ow mires; hag i a goedhas, ha'ga fas dhe'n dor. 21Ny omdhiskwedhas el an Arloedh dhe Manoagh ha'y wreg arta. Ena Manoagh a wodhva y vos el an Arloedh. 22Ha Manoagh a leveris dh'y wreg, ‘Ni a verow yn surredi, rag ni re welas Duw.’ 23Mes y wreg a leveris dhodho, ‘Mar mynna an Arloedh agan ladha, ny dhegemmersa offrynn leskys hag offrynn greun a'gan diwleuv, na ny dhiskwedhsa oll an traow ma, na ny dherivsa dhyn traow a'n par ma.’

24An venyn a dhineythis mab, ha'y henwel Samson. An maw a devi, ha'n Arloedh a'n bennigas. 25Spyrys an Arloedh a dhallathas movya ynno yn Mahane-dan, yntra Sora hag Eshtaol.