Demmedhyans Samson

1Samson eth yn-nans dhe Timna, hag yn Timna ev a welas benyn, Filistyades. 2Ena ev a dheuth yn-bann hag a dherivas dh'y das ha dh'y vamm, ‘My re welas Filistyades yn Timna; lemmyn kevewgh hi ragov avel gwreg.’ 3Mes y das ha'y vamm a leveris dhodho, ‘A nyns eus benyn yn mysk dha gerens, po yn mysk oll agan pobel, bys may tegoedh dhis kavoes gwreg dhiworth an Filistysi antrodreghys?’ Mes Samson a leveris dh'y das, ‘Kav hi ragov, drefenn hi a'm ples.’ 4Ny wodhya y das na'y vamm bos hemma dhiworth an Arloedh, rag yth esa ow hwilas acheson dhe oberi erbynn an Filistysi. Yn termyn na an Filistysi a's tevo maystri war Ysrael.

5Ena Samson eth yn-nans gans y das ha'y vamm dhe Timna. Pan dheuth dhe winlannow Timna distowgh lew yowynk a usas orto. 6Spyrys an Arloedh a fyskas warnodho hag ev a'n torras dhe demmyn heb travyth yn y dhiwdhorn, dell derrir gevrik dhe demmyn. Mes ny dherivas naneyl dh'y das na dh'y vamm an pyth re wrug ev. 7Ena ev eth yn-nans hag a geskewsis gans an venyn, ha hi a'n plesyas. 8Wosa pols ev a dhehwelis rag demmedhi an venyn, hag ev a dreylyas a-denewen rag gweles korf an lew, hag yth esa hes a wennennow ynno, ha mel. 9Ev a'n kravas yn-mes yn y dhiwdhorn, hag ev eth yn-rag, ow tybri hag ev ow mos. Pan dheuth dh'y das ha dh'y vamm, ev a ros neppyth anodho dhedha, hag i a'n dybris. Mes ny dherivas dhedha y kemmersa an mel dhiworth korf an lew.

10Y das eth yn-nans dhe'n venyn, ha Samson a wrug kevewi ena dell wre an wer yowynk. 11Pan y'n gwelas an dus i a dhros deg koweth warn ugens dhe vos ganso. 12Samson a leveris dhedha, ‘Gas vy dhe worra a-ragowgh govynn koynt. Mar kodhowgh y dhisplegya a-ji dhe'n seyth dydh a'n kevewi, ha'y dhysmygi, ena y rov dhywgh deg lien warn ugens ha deg dillasenn warn ugens 13Mes mar ny wodhowgh y dhisplegya, ena hwi a re dhymm deg lien warn ugens ha deg dillasenn.’ Ytho i a leveris dhodho, ‘Govynn dha wovynn koynt, gas ni dh'y glewes.’ 14Ev leveris dhedha,

‘Yn-mes a'n dybrer y teuth boes,

hag yn-mes a'n krev y teuth hwekter.’

Tri dydh ny wodhyens displegya an govynn koynt.

15An peswora dydh y lavarsons dhe wreg Samson, ‘Dyn dha wour rag may tisplekkyo an govynn koynt po ni a'th lesk ha chi dha das gans tan. A'gan gelwsowgh hwi rag agan gul boghosek?’ 16Yndella gwreg Samson a oelas a-ragdho, ow leverel, ‘Ty a'm kas, ny'm kerydh yn hwir. Ty re wovynnas govynn koynt a'm pobel, mes ny'n displegsys dhymm.’ Ev a leveris dhedhi, ‘Mir, ny dherivis hemma naneyl dhe'm tas na dhe'm mamm, Prag y tegoedh dhymm y dherivas dhis?’ 17Hi a oela warnodho oll seyth dydh; ha drefenn hi dh'y annia, an seythves dydh ev a'n derivas dhedhi. Ena hi a'n displegyas dh'y fobel. 18Gwer an dre a leveris dhodho dhe'n seythves dydh kyns an howl dhe sedhi,

‘Pyth yw hwekka es mel?

Pyth yw kreffa es lew?’

Hag ev a leveris dhedha,

‘Mar ny arrewgh gans ow denewes,

Ny dhisplegsewgh ow govynn koynt.’

19Ena spyrys an Arloedh a fyskas warnodho, hag ev eth yn-nans dhe Ashkelon. Ev a ladhas deg gour warn ugens a'n dre, hag a gemmeras aga freydh, hag a ros an dillasennow dhe'n re re a dhisplegsa an govynn koynt. Yn sorr poeth ev a dhehwelis dhe ji y das. 20Ha gwreg Samson a veu res dh'y goweth re bia y gar y'n demmedhyans.