Samson a Feth an Filistysi

1Wosa pols, yn prys trevas an gwaneth, Samson eth dhe vires y wreg, ow toen ganso gevrik. Yn-medh ev, ‘My a'm beus hwans dhe entra yn chambour ow gwreg.’ Mes ny ros hy thas kummyas dhodho a entra. 2Hy thas a leveris, ‘My a brederis, ty dh'y hasa; ytho my a's res dhe'th koweth. A nyns yw hy yowynka hwoer tekka agessi? Tann hi yn hy le.’ 3Samson a leveris dhedha, ‘An prys ma, pan wrav dregynn dhe'n Filistysi, y fydhav heb blam.’ 4Yndella Samson eth hag a gachyas tri hans lowarn, hag ev a gavas faglennow; hag ev a dreylyas an lewern lost dhe lost ha gorra faglenn yntra pub dew lost. 5Wosa gorra tan y'n faglennow, ev a asas an lewern dhe wari yn ys a'n Filistysi, hag a loskas an manalow ha'n ys, kekeffrys ha'n gwinlannow ha kelliow an olewbrennyer. 6Ena an Filistysi a wovynnas, ‘Piw a wrug hemma?’ Hag yn-medhons, ‘Samson, deuv an Timnyas, drefenn ev dhe gemmeres y wreg ha'y ri dh'y goweth.’

Ytho an Filistysi a dheuth yn-bann hag a's loskas hi ha'y thas. 7Samson a leveris dhedha, ‘Mars yw hemma an pyth a wrewgh, my a de na hedhav kyns my dhe dyli dial warnowgh.’ 8Ev a's gweskis dhe'n dor, klun ha mordhos gans ladhva veur, hag ev eth yn-nans ha triga y'n fols yn karrek Etam.

9Ena an Filistysi a dheuth yn-bann hag a gampyas yn Yuda hag a omlesas yn Lehi. 10Gwer Yuda a leveris, ‘Prag yth owgh hwi devedhys yn-bann er agan pynn?’ I a leveris, ‘Devedhys on rag kelmi Samson, rag gul dhodho poran dell wruga dhyn ni.’ 11Ena tri mil wour a Yuda eth yn-nans dhe'n fols yn karrek Etam, hag i a leveris dhe Samson, ‘A ny wodhes bos an Filistysi rewloryon warnan? Ytho pandr'a wruss'ta dhyn?’ Ev a worthybis, ‘Par dell wrussons dhymmo, yndella re wrug vy dhedha.’ 12I a leveris dhodho, ‘Ni re dheuth yn-nans rag dha gelmi, rag ma'th ryllyn yn leuv an Filistysi.’ Samson a worthybis dhedha, ‘Tewgh dhymm nag omsettyowgh er ow fynn agas honan.’ 13I a leveris dhodho, ‘Na omsettyn, ni a'th kelm hepken ha'th ri yn aga leuv; ny'th ledhyn.’ Yndella i a'n kolmas gans diw lovan nowydh, ha'y dhri yn-bann a'n garrek.

14Pan dheuth dhe Lehi, an Filistysi a dheuth gans garmow dhe vetya ganso; ha spyrys an Arloedh a fyskas warnodho ha'n lovanow esa war y dhiwvregh eth ha bos avel garrow lin gans tan, ha'y rawyow a deudhis dhiworth y dhiwdhorn 15Ena ev a gavas challa yr a asen, hag ev a ystynnas y leuv ha'y synsi, ha gansa ev a ladhas mil wour. 16Ha Samson a leveris,

‘Gans challa asen,

kalsow war galsow;

gans challa asen

my re ladhas mil wour.’

17Wosa leverel hemma, ev a dewlis dhe-ves an challa, ha'n tyller na a veu henwys Ramath-lehi.

18Y'n prys na ev a'n jevo syghes bras, hag ev a elwis war an Arloedh, ow leverel, ‘Ty re wrontyas an trygh meur ma dre leuv dha was. A dal dhymm merwel rag syghes ha koedha yn leuv an re antrodreghys?’ 19Yndella Duw a folsas igor an pans usi yn Lehi, ha dowr a dheuth anodho, ha'y spyrys a dhasvewas. Ytho henwys o En-hakkore, usi yn Lehi bys y'n jydh hedhyw. 20Hag ev a vreusi Ysrael yn dydhyow an Filistysi ugens blydhen.