Samson ha Delila

1Samson eth dhe Gaza, hag ena ev a welas hora hag a entras dhedhi. 2Derivys veu dhe'n Filistysi, ‘Samson yw devedhys omma.’ Yndella i a omguntellas a-dro ha'y gontrewaytya oll an nos orth yet an sita. Tewel a wrens der oll an nos, ow prederi, ‘Gortyn bys yn golow an myttin, ena ni a'n ladh.’ 3Samson a wrowedhas bys hanter-nos. Ena ev a sevis yn hanter-nos, hag settya dalghenn yn darasow yet an sita ha'n dhew bost, hag a's tennas yn-bann, war-barth gans an barr, hag a's gorras war y dhiwskoedh, ha'ga doen dhe benn an vre usi a-rag Hebron.

4Wosa hemma ev a goedhas yn kerensa gans benyn yn nans Sorek, Delila hy hanow. 5Gwahalyethow an Filistysi a dheuth dhedhi hag a leveris dhedhi, ‘Dyn e, ha dysk pandr'a wra y nerth mar vras, ha fatell yllyn ni y dhinertha rag ma'n kelmyn rag y fetha; ha peub ahanan a re dhis unnek kans bath a arghans.’ 6Ytho Delila a leveris dhe Samson, ‘Dell y'm kyrri, deriv dhymm pandr'a wra dha nerth mar vras, ha fatell yllydh bos kelmys, may fi dinerth.’ 7Samson a leveris dhedhi, ‘Mara'm kelmons gans seyth kordenn-warak yr na via syghys hwath, ena yth av ha bos gwann ha haval dhe bub den arall.’ 8Ena gwahalyethow an Filistysi a dhros dhedhi seyth kordenn-warak yr na via syghys hwath, ha hi a'n kolmas gansa. 9Yth esa gensi tus ow kontrewaytya yn chambour a-bervedh, ha hi leveris dhodho, ‘Ottensi, an Filistysi warnas, Samson!’ Mes ev a dorras an kerdyn-gwarak, par dell grakk kordenn a arrow lin pan doch hi an tan. Yndella nyns o godhvedhys kevrin y nerth.

10Ena Delila a leveris dhodho, ‘Ty re wrug ges ahanav ha gowleverel; dell y'm kyrri, deriv dhymmo vy fatell y'th kelmer.’ 11Ev a leveris dhedhi, ‘Mara'm kelmons gans lovonow nowydh na veu usys bythkweth, ena yth av ha bos gwann, haval dhe bub den arall.’ 12Ena Delila a gavas lovonow nowydh ha'y gelmi gansa ha leveris dhodho, ‘Ottensi, an Filistysi warnas, Samson!’ (Yth esa an wer ow kontrewaytya y'n chambour a-bervedh.) Mes ev a dorras an lovonow dhiworth y dhiwvregh avel neusenn.

13Ena Delila a leveris dhe Samson, ‘Kyns-lemmyn ty re wrug ges ahanav ha gowleverel; deriv dhymmo vy fatell y'th kelmer.’ Ev a leveris dhedhi, ‘Mar kwiydh an seyth kudynn a'm penn gans steuv an gwias ha'y tynnhe gans an ebil, ena yth av ha bos gwann, haval dhe bub den arall.’ 14Yndella hag ev ow koska, Delila a gavas an seyth kudynn a'y benn ha'ga gwia y'n steuv ha'ga thynnhe gans an ebil. Ena hi a leveris dhodho, ‘Ottensi an Filistysi warnas, Samson!’ Mes ev a dhifunas a'y gosk, hag a dennas dhe-ves an ebil ha'n steuv.16:14 an ebil ha'n steuv: Amendys. Ebrow an ebil, an starn ha'n steuv.

15Ena hi a leveris dhodho, ‘Fatell yll'ta leverel, “My a'th kar”, ha nyns usi dha golonn genev? Ty re wrug ges ahanav teyrgweyth, ha ny dherivsys dhymmo vy pandr'a wra dha nerth mar veur.’ 16Wor'tiwedh, wosa hi dh'y vrosa gans hy geryow dydh wosa dydh ha'y annia, y enev o skwith bys an mernans. 17Ytho ev a dherivas dhedhi oll an kevrin, hag a leveris dhedhi, ‘Nevra ny dheuth altenn war ow fenn, rag my re beu Naziryas dhe Dhuw a dorr ow mamm. Mar pe gols ow fenn treghys dhe-ves, ena ow nerth a'm gassa; gyllys vien ha bos gwann, ha bos haval dhe bub den arall.’

18Pan wodhva Delila ev dhe dherivas dhedhi oll y gevrin, hi a dhannvonas war-lergh gwahalyethow an Filistysi, ow leverel, ‘Dewgh yn-bann an termyn ma, rag ev re dherivas oll y gevrin dhymmo vy.’ Ena gwahalyethow an Filistysi a dheuth yn-bann dhedhi, hag a dhros an arghans yn aga diwleuv. 19Hi a'n asas dhe goska war hy barrlenn; ha hi a elwis gour, hag a wrug dhodho treghi an seyth kudynn a'y benn. Ev a dhallathas bos gwann, ha'y nerth a'n gasas. 20Ena hi a leveris, ‘Ottensi an Filistysi warnas, Samson!’ Pan dhifunas ev a dybis, ‘My a wra mos yn-mes par dell wren yn prysyow erell hag omshakya rydh.’ Mes ny wodhya y hwrussa an Arloedh y asa. 21Yndella an Filistysi a'n sesyas hag a droghas yn-mes y dhewlagas. I a'n dros yn-nans dhe Gaza ha'y gelmi gans kargharow a vrons; hag ev a veu settys dhe velyas greun y'n prison. 22Mes gols y benn a dhallathas dastevi wosa y vos treghys dhe-ves.

Mernans Samson

23Lemmyn gwahalyethow an Filistysi a omguntellas rag offrynna sakrifis meur dh'aga duw Dagon ha rag lowenhe; rag y lavarsons, ‘Agan duw re ros Samson agan eskar yn agan leuv.’ 24Pan y'n gwelas an bobel, i a wormolas aga duw; rag y lavarsons, ‘Agan duw re ros agan eskar yn agan leuv, ravner agan tir, neb re ladhas lies ahanan.’ 25Ha pan o aga holonn meri, i a leveris, ‘Galw Samson, ha didhanes ni.’ Yndella i a elwis Samson yn-mes a'n prison, hag ev a's didhanas. I a'n gwrug dhe sevel ynter an kolovenyow, 26ha Samson a leveris dhe'n gwas hag a'n gemmeras er an leuv, ‘Gas vy dhe handla an kolovenyow may sev an chi warnedha, rag may poessiv warnedha.’ 27An chi o leun a wer hag a venynes; yth esa oll gwahalyethow an Filistysi ena, ha war an to a-dro dhe tri mil gour ha benyn, ow mires orth didhan Samson.

28Ena Samson a elwis dhe'n Arloedh ha leverel, ‘Arloedh Duw porth kov ahanav ha'm krevhe unnweyth an prys ma, a Dhuw, rag may tylliv dial yn unn lamm war an Filistysi rag ow dewlagas.’ 29Ena Samson a synsis an dhiw goloven yn kres an chi, warnedha may sevis an chi, hag ev a boesas warnedha, y leuv dhyghow war an eyl ha'y leuv gledh war an arall. 30Ena Samson a leveris, ‘Gas vy dhe verwel gans an Filistysi.’ Ev a dennas gans oll y nerth; ha'n chi a goedhas war an wahalyethow hag oll an bobel esa ynno. Yndella an re a ladhas orth y vernans o moy es an re a ladhas der oll y vewnans. 31Ena y vreder hag oll y deylu a dheuth yn-nans ha'y gemmeres ha'y dhri yn-bann ha'y ynkleudhyas yntra Sora hag Eshtaol yn bedh y das Manoagh. Ev re vreussa Ysrael ugens blydhen.