Imajys Mika

1Yth esa gour a vro venydhyek Efraym, Mika y hanow. 2Ev a leveris dh'y vamm, ‘An unnek kans bath a arghans a veu kemmerys dhiworthis anedha may kewsys molleth hag yn surredi ty a'n kewsys y'm klewans – yma an arghans genev; my a'n kemmeras, mes lemmyn y'n daskorrav dhis.’17:2 mes lemmyn y'n daskorrav dhis: An geryow ma yw treusworrys dhiworth diwedh gwers 4. Ha'y vamm a leveris, ‘Re bo ow mab bennigys gans an Arloedh.’ 3Ena ev a dhaskorras an unnek kans bath a arghans dh'y vamm, ha'y vamm a leveris, ‘Sakra a wrav an arghans dhe'n Arloedh a'm leuv a-barth ow mab rag gul imaj gravys hag imaj teudh.’ 4Ytho pan dhaskorras an arghans dh'y vamm, y vamm a gemmeras dew kans bath a arghans, ha'y ri dhe weythor arghans, neb a's gwrug yn imaj teudh; hag yth esa yn chi Mika. 5An keth gour ma Mika a'n jevo y sentri y honan, hag ev a wrug efod ha terafim hag a sakras onan a'y vebyon, neb eth ha bos y oferyas. 6Y'n dydhyow na nyns esa myghtern yn Ysrael; pub gour a wre an pyth o ewn yn y dhewlagas y honan.

7Lemmyn yth esa gour yowynk a Bethlehem yn Yuda, a gordh Yuda. Levyas o, trigys ena. 8An gour ma a asas an dre Bethlehem yn Yuda rag triga yn pyle pynag may hallo kavoes tyller. Pan esa ow vyajya, ev a dheuth dhe ji Mika yn bro venydhyek Efraym. 9Mika a leveris dhodho, ‘A byle osta devedhys?’ Ev a worthybis, ‘Levyas a Bethlehem yn Yuda yth ov, hag yth av dhe driga yn py le pynag may hallav kavoes tyller.’ 10Ena Mika a leveris dhodho, ‘Trig genev, ha bydh dhymmo tas hag oferyas, hag y rov dhiso deg bath a arghans a'n vlydhen, dha dhillas ha'th pygans.’ 11An Levyas a assentyas dhe driga gans an gour; ha'n den yowynk eth ha bos avel onan a'y vebyon. 12Yndella Mika a sakras an Levyas, ha'n gour yowynk eth ha bos y oferyas, hag yth esa trigys yn chi Mika. 13Ena Mika a leveris, ‘Lemmyn my a woer an Arloedh dhe wul da dhymm, drefenn an Levyas dhe vos ha bos ow oferyas.’