Disobayans Ysrael

1Lemmyn el an Arloedh eth yn-bann dhiworth Gilgal dhe Bokim, ha leverel, ‘My a'gas dros yn-mes a Ejyp, ha'gas dri a-berth y'n tir a des vy y ri dh'agas tasow. My a leveris, “Byth ny dorrav ow hevambos genowgh, 2ha hwi nevra ny wrewgh kevambos gans trigoryon an tir ma; hwi a derr dhe'n dor aga alteryow.” Mes ny obaysowgh ow lev. Prag y hwrussowgh hemma? 3Ytho my a lever dhywgh lemmyn, ny wrav aga chasya dhe-ves a-dheragowgh; mes i a ha bos kesstrivoryon dhywgh, ha'ga duwow a vydh antell dhywgh.’ 4Pan gewsis el an Arloedh an geryow ma dhe oll mebyon Ysrael, an bobel a dhrehevis aga lev hag oela. 5Ytho i a henwis an tyller na Bokim; hag i a wrug offrynnow dhe'n Arloedh ena.

Mernans Yoshua

6Pan wrug Yoshua dannvon an bobel dhe-ves, pub esel a vebyon Ysrael eth dh'y eretons y honan dhe dhalghenna an tir. 7An bobel a servya an Arloedh dres oll dydhyow Yoshua, ha dres oll dydhyow an henavogyon a vewas pella es Yoshua, neb a welsa oll an ober meur a wrug an Arloedh a-barth Ysrael. 8Yoshua mab Nun, gwas an Arloedh, o kans bloedh ha deg pan verwis. 9Hag i a'n ynkleudhyas a-berth yn oryon y eretons yn Timnath-heres, yn bro venydhyek Efraym, a'n gledhbarth dhe venydh Gaash. 10Hag oll an henedh na a veu kuntellys dh'aga thasow ynwedh, hag ena ken henedh a devis war aga lergh, neb na aswonni an Arloedh na'n ober gwrys ganso a-barth Ysrael.

Dislelder Ysrael

11Ena mebyon Ysrael a wrug drogober yn golok an Arloedh hag a servyas an Baalim. 12I a forsakyas an Arloedh, Duw aga thasow, neb a's dros yn-mes a bow Ejyp; i a holyas duwow erell a dhuwow an poblow esa a-dro dhedha, hag i a blegyas dhe'n dor a-ragdha, ha serri an Arloedh. 13I a forsakyas an Arloedh, hag a servyas an Baalim ha'n Ashtaroth. 14Ytho sorr an Arloedh a loskas erbynn Ysrael, hag ev a's daskorras dhe ladron, neb a's pyllas; hag ev a's gwerthas yn diwla aga eskerens a-dro dhedha, ma na yllens sevel pella erbynn aga eskerens. 15Peskweyth may kerdhens yn-mes, leuv an Arloedh o er aga fynn a-barth droktra kepar dell lavarsa an Arloedh ha kepar dell dos ev ti; hag yth esens yn tebel studh.

16Ena an Arloedh a dhrehevis breusysi neb a wre aga selwel dhiworth leuv an re a'ga fylla. 17Mes hwath ny woslowens orth aga breusysi, mes yth esens ow horya war-lergh duwow erell ha plegya dhedha; i a dreylya yn skon a-dhiworth an fordh may kerdhi aga thasow, neb re beu gostydh dhe worhemmynnow an Arloedh, ha ny wrens yndella. 18Peskweyth may trehevi an Arloedh breusysi ragdha, yth esa an Arloedh gans an breusyas, hag ev a wre aga sawya dhiworth diwla aga eskerens oll dydhyow an breusyas; rag an Arloedh a gemmeri truedh drefenn aga hanasa dre reson an re a wre aga duwenhe ha'ga gwaska. 19Mes pan verwis breusyas, i a dreylya war-dhelergh ha bos moy tebel es aga thasow, owth holya duwow erell, orth aga servya ha plegya dhedha. Ny wrussons gasa aga gwriansow na'ga fordhow gorth. 20Ytho sorr an Arloedh a loskas erbynn Ysrael; hag ev a leveris, ‘Rag an bobel ma dhe derri ow hevambos a worhemmynnis vy dh'aga thasow, ha ny woslowsons orth ow lev, 21alemma rag ny jasyav dhe-ves a-dheragdha kenedhel vyth a asas Yoshua pan verwis, 22rag may preffiv Ysrael dredha, a wrens i gwitha fordh an Arloedh ow kerdhes ynni, kepar dell y's gwitha aga thasow, po na wrens.’ 23Ytho an Arloedh a asas an kenedhlow na, heb aga chasya dhe-ves distowgh, ha ny's gorras yn leuv Yoshua.