An Loethow Erell a Omsett war Benyamin

1Ena oll mebyon Ysrael a dheuth yn-mes, dhiworth Dan bys yn Beer-sheba, yn aga mysk pow Gilead, ha'n bobel a omguntellas yn unn bagas a-rag an Arloedh yn Mispa. 2Ledyoryon oll an bobel, oll loethow Ysrael, a dheuth war-barth yn kuntelles, peswar kans mil droesek ow toen kledhedhyow. 3An Benyaminysi a glewas, galsa mebyon Ysrael yn-bann dhe Mispa. Mebyon Ysrael a leveris, ‘Leverewgh dhyn fatell hwarva an droktra ma?’ 4An Levyas, gour an venyn a veu moldrys, a worthybis, ‘My a dheuth dhe Gibea yn Benyamin, my ha'm iswreg dhe spena an nos. 5Gwer Gibea a sevis er ow fynn, hag a gylghyas an chi yn nos, ha'ga thowl o ow ladha, hag i a ravnas ow iswreg bys pan verwis. 6Ena my a gemmeras ow iswreg hag a's troghas yntra rannow, hag a's dannvonas der oll pow eretons Ysrael, rag i re wrussa tra dhivlas yn Ysrael. 7Ytho hwi oll, vebyon Ysrael, rewgh agas avis ha'gas kusul omma.’

8Oll an bobel a sevis gans unn akord, ow leverel, ‘Nyns a denvyth ahanan dh'agan tyldow, na ny dhehwelyn denvyth ahanan dh'agan chiow. 9Mes hemm yw an pyth a wren dhe Gibea; ni a dewl prenn rag an omsettyans er hy fynn. 10Ni a gemmer deg gour yn-mes a gans der oll loethow Ysrael, ha kans yn-mes a vil, ha mil yn-mes a dheg mil, rag dri provians rag an bobel, a vydh ow mos rag attyli dhe Gibea yn Benyamin a'n dra dhivlas re wrussons yn Ysrael.’ 11Ytho oll gwer Ysrael a omguntellas erbynn an sita, gans unn akord.

12Loethow Ysrael a dhannvonas gwer der oll loeth Benyamin, ow leverel, ‘Pyth yw an droktra ma re beu gwrys yn agas mysk? 13Lemmyn daskorrewgh an dhrogwesyon yn Gibea, rag ma's lytthyn ha kartha an drog yn-mes a Ysrael.’ Mes ny vynna an Benyaminysi goslowes orth aga breder, mebyon Ysrael. 14An Benyaminysi a omguntellas war-barth yn-mes a'n trevow dhe Gibea, rag mos yn-mes dhe vatalyas orth mebyon Ysrael. 15Y'n jydh na an Benyaminysi a guntellas hwegh mil gledhevor warn ugens a'ga threvow, keffrys ha trigoryon Gibea. 16A'n bobel ma yth esa seyth kans gour dewisys o kledhek; pub onan anedha a ylli tewlel men orth blewenn heb fyllel. 17An Ysraelysi, heb Benyamin, a guntellas peswar kans mil gledhevor, oll anedha kasoryon.

18An Ysraelysi a dhallathas mos yn-bann dhe Bethel, may hwovynnsons a Dhuw, ‘Piw ahanan a yn-bann yn kynsa rag batalyas orth an Benyaminysi?’ Ha'n Arloedh a worthybis, ‘Yuda a yn-bann yn kynsa.’

19Ena mebyon Ysrael a sevis y'n myttin hag a gampyas ryb Gibea. 20An Ysraelysi eth yn-mes dhe vatalyas orth Benyamin; ha'n Ysraelysi a arayas aga honan rag kas er aga fynn yn Gibea. 21An Benyaminysi a dheuth yn-mes a Gibea, hag a weskis dhe'n dor dew vil warn ugens a'n Ysraelysi an jydh na. 22Mebyon Ysrael a omgrevhas, hag arta i a arayas aga honan rag kas y'n keth tyller mayth araysens an kynsa dydh. 23An Ysraelysi eth yn-bann hag a oelas a-rag an Arloedh bys y'n gorthugher; hag a wovynnas a'n Arloedh, ‘A dheun nes arta dhe vatalyas orth agan breder an Benyaminysi?’ Ha'n Arloedh a leveris, ‘Kewgh yn-bann er aga fynn.’

24Yndella mebyon Ysrael eth yn-rag erbynn an Benyaminysi an nessa dydh. 25Benyamin eth yn-mes er aga fynn dhiworth Gibea an nessa dydh, hag a weskis dhe'n dor etek mil a vebyon Ysrael, oll anedha gwer ervys. 26Ena oll mebyon Ysrael, an lu dien, a dhehwelis dhe Bethel, hag a oelas, owth esedha ena a-rag an Arloedh, ow penys an jydh na bys y'n gorthugher. Ena i a offrynnas offrynnow leskys hag offrynnow kres a-rag an Arloedh. 27Ha mebyon Ysrael a wovynnas orth an Arloedh (rag y fedha argh an kevambos ena y'n dydhyow na 28ha Finehas mab Eleazar mab Aron, a servya a-ragdha y'n dydhyow na) ow leverel, ‘A wren ni mos yn-mes unnweyth arta rag batalyas orth agan breder, an Benyaminysi, po a wren ni hedhi?’ An Arloedh a worthybis, ‘Kewgh yn-bann rag a-vorow my a's re yn agas leuv.’

29Ytho Ysrael a settyas gwer yn kontrewaytyans a-dro dhe Gibea. 30Ena mebyon Ysrael eth yn-bann erbynn an Benyaminysi an tressa dydh, hag a arayas aga honan erbynn Gibea, avel kyns. 31Pan eth an Benyaminysi yn-mes erbynn an bobel, tennys ens dhiworth an sita. Avel kyns, i a dhallathas shyndya an gasoryon war an fordhow meur, may led onan anedha a dhe Bethel, ha'y gila dhe Gibea, keffrys hag y'n mes igor, ow ladha deg gour warn ugens a Ysrael. 32An Benyaminysi a dybi, ‘Fethys yns a-ragon avel kyns.’ Mes mebyon Ysrael a leveris, ‘Omdennyn ha'ga thenna dhiworth an sita war-tu ha'n fordhow.’ 33Oll an Ysraelysi a sevis dhiworth aga thyller, hag i a arayas aga honan yn Baal-tamar, ha'n re esa y'n kontrewaytyans a dardhas a'ga le a'n howlsedhes dhe Geba. 34Erbynn Gibea y teuth deg mil wour dewisys a oll Ysrael, ha'n vatel o fell. Mes ny wodhya an Benyaminysi bos terroesa ow tos warnedha.

35An Arloedh a fethas Benyamin a-rag Ysrael; ha mebyon Ysrael a dhiswrug pymp mil warn ugens ha kans a wer Benyamin y'n jydh na, oll anedha ervys gans kledhedhyow.

36Ena an Benyaminysi a wodhya i dhe vos fethys. Mebyon Ysrael a hepkorras tir dhe Benyamin, drefenn i dhe drestya dhe'n kontrewaytyans re settsens erbynn Gibea.

37An wer yn kontrewaytyans a boenyas yn skav erbynn Gibea. Ena i a weskis oll an sita gans an kledha. 38Re bia tokyn gwrys ynter an Ysraelysi ha'n re y'n kontrewaytyans, pan dhannvonens yn-bann kommolenn a mog dhiworth an sita, 39y treylya an Ysraelysi yn batel. Mes Benyamin re dhallathsa shyndya mebyon Ysrael, ow ladha a-dro dhe dheg warn ugens anedha; yndella i a dybi, ‘Yn surredi i yw fethys a-ragon, dell o y'n kynsa batel.’ 40Mes pan dhallathas an gommolenn, koloven a vog, yskynna a'n sita, an Benyaminysi a viras war-dhelergh – hag otta mog an sita oll owth yskynna war-tu ha'n ebron. 41Ena an Ysraelysi a dreylyas ha'n Benyaminysi a borthas own, rag i a wodhya terroesa dhe dhos warnedha. 42Ytho i a dreylyas dhiworth an Ysraelysi war-tu ha'n gwylvos, mes an vatel a dremenas dresta hag yth esa an re a dheuth yn-mes a'n sita orth aga ladha ena. 43I a geas an Benyaminysi a-ji ha'ga chasya heb hedhi, ha'ga threttya yn-dann droes bys tyller a'n est dhe Gibea. 44Etek mil Benyaminyas a goedhas, oll anedha kasoryon alloesek. 45Pan dreylsons ha fia dhe'n gwylvos dhe garrek Rimmon, pymp mil gour a veu treghys dhe'n dor war an fordhow meur, hag i a veu chasys bys Gidom, ha dew vil wour anedha a veu ledhys. 46Ytho oll hag a goedhas y'n jydh na a Benyamin o pymp mil warn ugens kasor ow toen kledhedhyow, oll anedha gwer krev. 47Mes hwegh kans anedha a dreylyas hag a fias war-tu ha'n gwylvos dhe garrek Rimmon, hag a wortas ryb garrek Rimmon peswar mis. 48Ena an Ysraelysi a dreylyas war-lergh erbynn an Benyaminysi hag a's gweskis gans min an kledha - an sita, an bobel, an enyvales, hag oll a veu gesys. Dres henna i a loskas oll an trevow erell.