An Benyaminysi Sawys a Dhiswrians

1An Ysraelysi re dosa yn Mispa, ‘Ny re nagonan ahanan y vyrgh yn demmedhyans dhe Benyamin.’ 2Ha'n bobel a dheuth dhe Bethel, hag a esedhas ena bys y'n gorthugher a-rag Duw, hag i a sevis aga lev hag a oelas yn hwerow, 3I a leveris, ‘A Arloedh prag y hwarva y fyll hedhyw unn loeth yn Ysrael?’ 4Ternos a-varr an bobel a sevis, hag a dhrehevis alter ena, hag a offrynnas offrynnow leskys hag offrynnow kres. 5Ena mebyon Ysrael a leveris, ‘Piw yn-mes a oll loethow Ysrael na dheuth yn-bann dhe'n kuntelles dhe'n Arloedh?’ Rag ti solem re bia gwrys a-dro dhe biwpynag na dheffa yn-bann dhe'n Arloedh dhe Mispa, ow leverel, ‘An den na a vydh gorrys dhe'n mernans.’ 6Mes mebyon Ysrael a gemmeras truedh war Benyamin, aga breder, hag a leveris, ‘Unn loeth yw treghys dhiworth Ysrael hedhyw. 7Pandr'a wren rag gwragedh rag an re yw gesys, drefenn ni dhe di re an Arloedh, na ren dhedha onan vytholl a'gan myrghes avel gwragedh?’

8Ena i a leveris, ‘Eus nebonan a loethow Ysrael na dheuth yn-bann dhe'n Arloedh dhe Mispa?’ Y hwarva na dhothya nagonan a Yabesh-gilead dhe'n kamp, dhe'n kuntelles. 9Rag pan veu lennys an rol yn mysk an bobel, nyns esa denvyth a drigoryon Yabesh-gilead ena. 10Ytho an kuntelles a dhannvonas dewdhek mil gasor di hag a's erghis, ‘Kewgh, gweskewgh trigoryon Yabesh-gilead gans min an kledha, keffrys an benynes ha'n fleghes. 11Hemm yw an pyth a wrewgh; pub gour ha pub benyn a wrowedhas gans gour, hwi a saker dhe dhistruans leun.’ 12Hag i a gavas yn mysk trigoryon Yabesh-gilead peswar kans gwyrghes yowynk na gosksons gans gour hag i a's dros dhe'n kamp yn Shilo, usi yn pow Kanan.

13Ena an kuntelles oll a dhannvonas ger dhe'n Benyaminysi esa orth garrek Rimmon, hag a elwis kres dhedha. 14Benyamin a dhehwelis y'n termyn na, hag i a ros dhedha an benynes re withsons yn few a venynes Yabesh-gilead, mes nyns ens an re na lowr ragdha.

15An bobel a gemmeras truedh war Benyamin, rag an Arloedh a wrussa aswa yn loethow Ysrael. 16Ytho henavogyon an bobel a leveris, ‘Pandr'a wren rag kavoes gwragedh rag an re yw gesys, drefenn nag eus benynes gesys yn Benyamin?’ 17Hag i a leveris, ‘Y tegoedh may fo heryon rag an re yw gesys a Benyamin, rag ma na vo loeth defendys dhiworth Ysrael. 18Byttegyns ny yllyn ri onan a'gan myrghes dhedha avel gwragedh.’ Rag mebyon Ysrael re dosa, ‘Milliges re bo neb a re gwreg dhe Benyamin.’ 19Ytho i a leveris, ‘Mirewgh, goel blydhenyek an Arloedh a hwyrvydh yn Shilo, usi a'n gledhbarth dhe Bethel, a'n est dhe'n fordh-veur a Bethel dhe Shekem, hag a'n dhyghowbarth a Lebona.’ 20Hag i a erghis dhe'n Benyaminysi, ow leverel, ‘Kewgh hag omgelewgh y'n gwinlannow, 21ha goelyewgh; pan dheu an benynes yowynk yn-mes dhe gemmeres rann yn donsyow, ena dewgh yn-mes a'n gwinlannow, ha pub huni synses gwreg ragdho y honan a venynes yowynk Shilo, ha kewgh yn pow Benyamin. 22Ena mar teu aga thasow po aga breder rag krodhvolas warnan, ni a lever dhedha, “Bedhewgh hegar ha gesewgh ni dh'aga havoes; rag ny yllsyn kemmeres gwragedh yn batel rag pub gour. Ha ny beghsowgh erbynn an ti ow ri agas myrgh dhedha.” ’ 23An Benyaminysi a wrug yndella; i a gemmeras gwragedh rag pub huni anedha a'n donsyoresow a synsons. Ena i eth ha dehweles dh'aga eretons, hag a dhastrehevis an trevow ha triga ynna. 24Ytho mebyon Ysrael eth alena y'n termyn na, loeth ha loeth ha teylu ha teylu, hag i eth yn-mes alena dh'aga eretons aga honan.

25Y'n dydhyow na, nyns esa myghtern yn Ysrael; oll an bobel a wre an pyth o ewn yn aga dewlagas aga honan.