Kenedhlow Gesys y'n Tir

1Lemmyn an re ma yw an kenedhlow a wrug an Arloedh aga gasa rag previ oll an re yn Ysrael na's tevo aswonnvos a vresel vytholl yn Kanan 2(ny wrug ev henna marnas dhe dhyski dhe henedhow mebyon Ysrael batalyas, an re na'n dhys'sa kyns). 3Pymp gwahalyeth an Filistysi, hag oll an Kananysi ha'n Sidonysi, ha'n Hivysi esa trigys war venydh Lebanon, dhiworth menydh Baal-hermon, bys Lebo-hamath. 4An re ma o rag previ Ysrael, rag godhvos mar pens i gostydh dhe worhemmynnow an Arloedh a worhemmynnis dh'aga thasow dre Moyses. 5Ytho yth esa mebyon Ysrael trigys yn mysk an Kananysi, an Hyttysi, an Amorysi, an Perizzysi, an Hivysi, ha'n Yebusysi; 6hag i a gemmeri aga myrghes rag aga gwragedh, ha'ga myrghes a rens dh'aga mebyon; hag i a wordhyens aga duwow. 7Mebyon Ysrael a wrug arta an pyth o drog yn golok an Arloedh, owth ankevi an Arloedh aga Duw, hag ow kordhya an Baalim ha'n Asheroth. 8Ytho sorr an Arloedh a loskas erbynn Ysrael, hag ev a's gwerthas yn leuv Kushan-rishathaym myghtern Aram Naharaym; ha mebyon Ysrael a servya Kushan-rishathaym eth blydhen. 9Mes pan grias mebyon Ysrael dhe'n Arloedh, an Arloedh a dhrehevis delivrer rag mebyon Ysrael, neb a's delivras, Othniel mab Kenaz, broder yowynka Kaleb. 10Spyrys an Arloedh a dheuth warnodho, hag ev a vreusi Ysrael; ev eth dhe vresel, ha'n Arloedh a ros Kushan-rishathaym myghtern Aram yn y leuv; ha'y leuv a's tevo maystri war Kushan-rishathaym. 11Ytho an tir a'n jevo powes dew-ugens blydhen. Ena Othniel mab Kenaz a verwis.

Ehud

12Ena mebyon Ysrael a wrug arta an pyth o drog yn golok an Arloedh, ha'n Arloedh a grevhas Eglon myghtern Moab erbynn Ysrael drefenn i dhe wul an pyth o drog yn golok an Arloedh. 13Ev a guntellas dhodho an Ammonysi ha'n Amalekysi, ha mos ha fetha Ysrael; hag i a gemmeras sita an palmwydh. 14Ytho mebyon Ysrael a servya Eglon myghtern Moab etek blydhen.

15Mes pan grias mebyon Ysrael dhe'n Arloedh, an ARLOEDH a dhrehevis ragdha delivrer, Ehud mab Gera, Benyaminyas, gour kledhek. Mebyon Ysrael a dhannvonas trubyt dhodho der Eglon myghtern Moab. 16Ehud a wrug ragdho y honan kledha dewvinyek, unn kevelin y hirder, hag ev a'n fastyas orth y vordhos dhyghow yn-dann y dhillas. 17Ena ev a brofyas trubyt dhe Eglon myghtern Moab. Eglon o gour fest tewl. 18Pan dhiwedhas Ehud ow profya an trubyt ev a dhannvonas dhe-ves an re esa ow toen an trubyt. 19Mes ev y honan a dreylyas war-dhelergh orth an meyn kervys ogas dhe Gilgal, hag yn-medh ev, ‘Yma genev messaj kevrinek ragos, A vyghtern’. Ytho an myghtern a leveris, ‘Taw!’ hag oll y servysi eth yn-mes dhiworto. 20Ehud a dheuth dhodho hag ev owth esedha y honan yn stevell an soler, hag yn-medh ev, ‘Yma genev messaj dhiworth Duw ragos.’ Ytho ev a sevis a'y esedhva. 21Ena Ehud a ystynnas y dhorn gledh, hag a gemmeras an kledha a'y vordhos dhyghow ha'y wana yn y dorr; 22an dornla a entras ynwedh war-lergh an lown, ha'n blonek a dhegeas dres an lown, rag ny dennas an kledha a'y dorr, ha'n lastedhes a dheuth yn-mes. 23Ena Ehud eth yn-mes bys y'n portal, hag a dhegeas warnodho darasow stevell an soler hag a's alhwedhas.

24Wosa ev dhe vos gyllys dhe-ves, an servysi a dheuth, ha pan welsons bos darasow stevell an soler yn-dann alhwedh, i a dybi, ‘Heb dout yma ev kul devnydh a'n kawghti y'n stevell ayrellys.’ 25Ytho i a wortas bys pan ens yn ankombrynsi. Pan na igoras hwath darasow stevell an soler, i a gavas an alhwedh hag a's igoras, hag ottena aga arloedh koedhys war an leur, marow.

26Ehud a dhienkas hag i ow kortos, hag ev a dremenas dres an meyn kervys, hag a dhienkas dhe Seira. 27Pan dheuth di, ev a hwythas an hirgorn yn bro venydhyek Efraym, ha mebyon Ysrael eth yn-nans ganso dhiworth an vro venydhyek, hag ev a-ragdha. 28Ev a leveris dhedha, ‘Holyewgh vy; rag an Arloedh re ros dhywgh agas eskerens an Moabysi yn agas leuv.’ Ytho i eth war-nans war y lergh, hag a synsis rysyow an Yordan erbynn an Moabysi ha lettya na dremenna denvyth dresti. 29Y'n prys na i a ladhas a-dro dhe dheg mil a wer Moab, i oll nerthek ha krev; ny dhienkas gour vytholl. 30Ytho Moab a veu fethys y'n jydh na yn-dann leuv Ysrael. Ha'n tir a'n jevo powes peswar-ugens blydhen.

Shamgar

31War y lergh y teuth Shamgar mab Anath neb a ladhas hwegh kans gour a'n Filistysi gans garthow. Ev ynwedh a dhelivras Ysrael.