Debora ha Barak

1Mebyon Ysrael a wrug an pyth o drog yn golok an Arloedh wosa Ehud dhe verwel. 2Ytho an Arloedh a's gwerthas yn leuv Yabin myghtern Kanan esa ow reynya yn Hasor; kaslewydh y lu o Sisera, esa trigys yn Harosheth-ha-goyim. 3Ena mebyon Ysrael a grias dhe'n Arloedh rag gweres; rag ev a'n jevo kans charett a horn, ha re arwasksa mebyon Ysrael yn fell ugens blydhen.

4Y'n termyn na yth esa Debora, profoeses, gwreg Lappidoth, ow preusi Ysrael. 5Hi a esedha yn-dann balm Debora yntra Rama ha Bethel yn bro venydhyek Efraym, ha mebyon Ysrael a dho dhedhi rag breus. 6Hi a dhannvonas ha gelwel Barak mab Abinoam a Kedesh Naftali, hag a leveris dhodho, ‘An Arloedh, Duw Ysrael a'th worhemmynn, “Ke ha hembronk yn-mes deg mil wour a vebyon Naftali hag a vebyon Zebulun, ha'ga dri genes dhe venydh Tabor. 7My a denn Sisera, kaslewydh lu Yabin, yn-mes rag dha vetya orth nans Kishon gans y jarettow ha'y lu; ha my a'n re y'th leuv.” ’ 8Barak a leveris dhedhi, ‘Mars edh genev, yth av; mes mar nyns edh genev, nyns av vy.’ 9Ha hi a leveris, ‘Yth av genes yn surredi; byttegyns ny led an fordh mayth edh warnedhi dhe'th glori, rag an Arloedh a werth Sisera yn leuv benyn.’ Ena Debora a sevis yn-bann hag eth gans Barak dhe Kedesh. 10Barak a elwis Zebulun ha Naftali dhe Kedesh, ha deg mil gour eth yn-bann war y lergh; ha Debora eth yn-nans ganso.

11Lemmyn Heber an Kenyas re dhibarthsa dhiworth an Kenysi erell, mebyon Hobab hwegron Moyses, hag ev re gampyas mar bell avel an dherwenn yn Saanannim ogas dhe Kedesh.

12Pan veu derivys dhe Sisera Barak mab Abinoam dhe vos gyllys dhe venydh Tabor, 13Sisera a elwis oll y jarettow, naw kans charett a horn, hag oll an bobel esa ganso dhiworth Harosheth-ha-goyim dhe nans Kishon. 14Ena Debora a leveris dhe Barak, ‘Yn-bann! Rag hemm yw an jydh may ros an Arloedh Sisera y'th leuv. Yn tevri yma an Arloedh ow mos yn-mes a-ragos.’ Ytho Barak eth yn-nans a venydh Tabor gans deg mil wour orth y holya. 15Ha'n Arloedh a worras yn deray Sisera hag oll y jarettow hag oll y lu a-rag Barak gans min an kledha; ha Sisera a dhiyskynnas a'y jarett hag a fias yn-kerdh war droes, 16ha Barak a jasyas war-lergh an charettow ha'n lu bys Harosheth-ha-goyim. Oll lu Sisera a goedhas dre vin an kledha; nyns o nagonan gesys.

17Lemmyn Sisera a fias war droes dhe dylda Yael gwreg Heber an Kenyas; rag yth esa kres yntra myghtern Yabin a Hasor ha chi Heber a Kenyas 18Yael a dheuth yn-mes rag metya orth Sisera hag a leveris dhodho, ‘Treyl a-denewen, ow arloedh, treyl a-denewen dhymmo vy; na borth own.’ Ytho ev a dreylyas dhedhi yn hy thylda, ha hi a'n gudhas gans strel. 19Ena yn-medh ev dhedhi, ‘Ro dhymmo banna a dhowr dhe eva mar pleg, rag syghes a'm beus.’ Yndella hi a igoras kroghen a leth hag a ros dhodho diwes ha'y gudha. 20Yn-medh ev dhedhi, ‘Sav orth entrans an tylda ha mar teu nebonan ha govynn, “Eus nebonan omma?” lavar “Nag eus” ’ 21Mes Yael gwreg Heber a gemmeras ebil tylda hag a gemmeras morthol yn hy dorn hag eth yn tawel dhodho, hag ev a'y wrowedh fest yn kosk gans skwithter; ha hi a weskis an ebil yn er y benn, bys pan eth y'n dor, hag ev a verwis. 22Pan dheuth Barak owth helghya Sisera, Yael eth yn-mes dhe vetya orto, hag a leveris dhodho, ‘Deus, hag my a dhiskwedh dhis an gour a hwilydh.’ Ytho ev a entras hy thylda, hag ottena Sisera a'y wrowedh marow ha'n ebil-tylda yn er y benn.

23Yndella y'n jydh na Duw a uvelhas Yabin myghtern Kanan a-rag mebyon Ysrael. 24Ena leuv mebyon Ysrael a weski tynna ha tynna war Yabin myghtern Kanan, bys pan dhiswrussons Yabin myghtern Kanan.