Kan Debora

1Ena Debora ha Barak mab Abinoam a ganas y'n jydh na, ow leverel:

2‘Pan ledyas ledyoryon yn Ysrael,

pan ombrofyas an bobel –

bennigewgh an Arloedh!

3‘Klewewgh, A vyghternedh, goslowewgh, A bennsevigyon;

dhe'n Arloedh y kanav,

my a gan gormola dhe'n Arloedh, dhe Dhuw Ysrael.

4‘Arloedh, pan ythys yn-mes a Seir,

pan geskerdhsys dhiworth gwel Edom,

an dor a grysyas,

ha'n ebron a dhiveris,

an kommolennow ynwedh a dhiveris dowr.

5An menydhyow a grysyas a-rag an Arloedh, an Sinay ma,

a-rag an Arloedh, Duw Ysrael.

6‘Yn dydhyow Shamgar mab Anath

yn dydhyow Yael, fordhow-meur a hedhis

ha tremenysi a dremena war fordhow gwius.

7An werin a hedhis yn Ysrael,

i a hedhis

bys pan sevsys, Debora,

avel mamm yn Ysrael y sevsys.

8Pan o dewisys duwow nowydh,

ena yth esa bresel y'n yetow.

A veu dhe weles po skoes po guw

yn mysk dew-ugens yn Ysrael?

9Ow holonn a dhe gaslewydhyon Ysrael

hag a ombrofyas a'ga bodh yn mysk an bobel.

Bennigewgh an Arloedh.

10‘Derivewgh anodho, hwi hag a varghogeth war asenes gellvelyn,

hwi hag a esedh war ballennow-diber fethus

ha hwi hag a gerdh ryb an fordh.

11Dhe son kanoryon orth an dowrvaow,

ena i a dhaslever tryghow an Arloedh,

tryghow y werin yn Ysrael.

‘Ena yn-nans dhe'n yetow y keskerdhas pobel an Arloedh.

12‘Difun, difun, Debora!

Difun, difun, dyllo kan!

Sa'bann, Barak, led dha brisnoryon dhe-ves,

A vab Abinoam.

13Ena remenant an ugheloryon a geskerdhas yn-nans,

pobel an Arloedh a geskerdhas yn-nans ragdho erbynn an re alloesek.

14A Efraym i eth yn-mes y'n nans,

orth dha holya, Benyamin, gans dha bobel.

A Makir an gaslewydhyon a geskerdhas,

hag a Zebulun an re hag a dheg lorgh an kaslewydh;

15pennsevigyon Yssakar a dheuth gans Debora,

hag Yssakar lel dhe Barak;

y'n nans y poensons orth y dhew seudhel.

Yn mysk kordhow Rewben

yth esa hwithrans meur a golonnow.

16Prag yth hokyewgh yn mysk korlannow an deves?

rag klewes an piba rag an greow?

Yn mysk kordhow Rewben

yth esa hwithrans meur a golonnow.

17Gilead a bowesas dres an Yordan;

ha Dan, prag y triga ev gans an gorholyon?

Asher a esedha stag orth an arvor,

ow triga ryb y ankorvaow.

18Zebulun yw pobel hag a skornyas mernans;

Naftali ynwedh, war ugheldiryow an mes.

19‘Myghternedh a dheuth, i a omladhas;

ena myghternedh Kanan a omladhas

yn Taanak, ryb dowrow Megiddo;

ny gemmersons preydh a arghans.

20An ster a omladhas dhiworth nev,

dhiworth aga resegvaow i a omladhas erbynn Sisera.

21An keynres Kishon a's skubas dhe-ves,

an keynres a's lettyas a dhiank,5:21 an keynres a's lettyas a dhiank: Amendys. Ebrow an keynres koth. an keynres Kishon.

Keskerdh yn-rag, ow enev, gans nerth!

22‘Ytho yn ughel y hweskis karnow an vergh

gans an peswarlemmel, peswarlemmel an stedys krev.

23‘Molleth Meroz, a lever el an Arloedh,

molleth yn hwerow y annedhysi,

rag na dheuthons dhe weres an Arloedh,

dhe weres an Arloedh erbynn an re alloesek.

24‘An moyha benniges a venynes re bo Yael,

gwreg Heber an Kenyas,

a venynes annedhysi yn tyldow an moyha benniges.

25Ev a bysis dhiworti dowr ha hi a ros dhodho leth,

hi a dhug dhodho kowles yn bolla gwiw dhe arloedh.

26Hi a worras hy dorn dhe'n ebil-tylda

ha'y leuv dhyghow dhe vorthol gweythoryon;

hi a weskis Sisera,

hi a gropyas y benn,

hi a vrewis hag a bechyas er y benn.

27Ev a sedhis hag a goedhas,

ev a wrowedhas stag orth hy dewdroes;

orth hy dewdroes y sedhis, y koedhas;

le may sedhis, ena y koedhas, marow.

28‘Der an fenester y firas,

mamm Sisera a lagattas der an lattis:

“Prag yw y jarett mar hir ow tos?

Prag yth hok mar bell gweskel karn y jarett?”

29Hy furra arloedhesow a worthyp,

yn tevri hi a worthyp an govynn hy honan:

30“A nyns esons i ow kavoes hag ow kevrenna an preydh? –

mowes po diw dhe bub gour;

preydh a gwethow liwek dhe Sisera,

preydh a gwethow liwek brosys,

dew dharn a ober liwek brosys rag ow honna yn preydh?”

31‘Yndella re varwo oll dha eskerens, A Arloedh!

Mes re bo oll dha gowetha avel an howl dell sev yn-bann yn y nerth.’

Ha'n tir a'n jevo kres dew-ugens blydhen.