Arwask Midyan

1Mebyon Ysrael a wrug an pyth o drog yn golok an Arloedh, ha'n Arloedh a's ros yn leuv Midyan seyth blydhen. 2Leuv Midyan a arwaskas Ysrael; ha drefenn Midyan mebyon Ysrael a wrug ragdha aga honan skovvaow yn savnow y'n menydhyow, ha fowys ha dinasow. 3Rag peskweyth may plansa mebyon Ysrael has, an Midyanysi ha'n Amalekysi ha mebyon an est a dho er aga fynn. 4I a gampya er aga fynn hag a dhiswre trevas an dor, bys yn kyrghynn Gaza, ha ny asens sosten a-ji dhe Ysrael, na davas na asen vytholl. 5Rag i ha'ga chatel a dho yn-bann, hag i a dhri aga thyldow, kemmys ha lokustes; nyns ens i dhe nivera, naneyl i aga honan na'ga howrvergh; i a entras an tir dh'y wastya. 6Yndella Ysrael o gyllys pur voghosek drefenn Midyan; ha mebyon Ysrael a grias dhe'n Arloedh rag gweres.

7Pan grias mebyon Ysrael dhe'n Arloedh drefenn Midyan, 8an Arloedh a dhannvonas profoes dhe vebyon Ysrael; hag ev a leveris dhedha, ‘Yndellma y lever an Arloedh, Duw Ysrael: My a'gas dros yn-bann yn-mes a Ejyp, ha'gas dri yn-mes a'n chi a gethneth; 9ha my a'gas delivras dhiworth leuv Ejyp, ha dhiworth leuv oll an re a'gas arwaska; my a's tewlis yn-mes a-ragowgh, ha ri dhywgh hwi aga thir; 10ha my a leveris dhywgh hwi, “An Arloedh agas Duw yth ov; na wordhyowgh duwow an Amorysi mayth esowgh trigys yn aga thir.” Mes ny woslewsowgh dhe'm lev.’

Galow Gideon

11Lemmyn el an Arloedh a dheuth hag esedha yn-dann an derebinthenn yn Ofra, o dhe Yoash, an Abiezryas. Pan esa y vab Gideon ow trushya gwaneth y'n winwask, rag y gudha a'n Midyanysi, 12el an Arloedh a omdhiskwedhas dhodho hag a leveris dhodho, ‘Yma an Arloedh genes, kasor galloesek.’ 13Gideon a worthybis dhodho, ‘Mes, syrra, mars usi an Arloedh genen, ytho prag y hwarva oll hemma dhyn? Ha ple'ma oll an gweythresow marthys a dherivas agan tasow dhyn, ow leverel, “A ny wrug an Arloedh agan dri yn-bann a Ejyp?” Mes lemmyn an Arloedh re'gan tewlis dhe-ves, ha'gan ri yn leuv Midyan.’ 14Ena an Arloedh a dreylyas dhodho hag a leveris, ‘Ke y'th nerth ma ha delirv Ysrael a leuv Midyan; a ny wrugavy dha dhannvon?’ 15Ev a worthybis, ‘Ow Arloedh, fatell allav delivra Ysrael? Ow hordh yw an gwanna yn Manasse, ha my yw an lyha yn ow theylu.’ 16An Arloedh a leveris dhodho, ‘My a vydh genes, ha ty a wysk yn-nans an Midyanysi, yn kettep penn anedha.’ 17Ena y leveris dhodho, ‘Mara'm bo favour genes, diskwa dhymm tokyn yth yw ty usi ow kewsel genev. 18Na ge alemma kyns av dhiso jy, hag y trov yn-mes ow ro ha'y gorra a-ragos.’ Hag y leveris, ‘My a worta bys pan dhehwelli.’

19Ytho Gideon a entras yn y ji hag a bareusis gevrik, ha tesennow heb burm a efa a vleus; ev a worras an kig yn kanstell, ha'n kowl a worras yn pott, hag ev a's dros dhodho yn-dann an derebinthenn hag a's ros dhodho. 20El Duw a leveris dhodho, ‘Kemmer an kig ha'n tesennow heb burm ha'ga gorra war an garrek ma, ha diver an kowl yn-mes.’ Hag ev a'n gwrug yndella. 21Ena el an Arloedh a ystynnas bleyn an lorgh esa yn y dhorn hag a dochyas an kig ha'n tesennow heb burm ha tan eth yn-bann a'n garrek hag a loskas an kig ha'n tesennow heb burm; hag el an Arloedh eth yn-mes a'y wolok. 22Ena Gideon a wodhya henna dhe vos el an Arloedh, ha Gideon a leveris, ‘Gweres vy, Arloedh Duw! Rag my re welas el an Arloedh fas orth fas.’ 23Mes an Arloedh a leveris dhodho, ‘Kres re bo dhis; na borth own, ny verwydh.’ 24Ytho Gideon a dhrehevis alter dhe'n Arloedh ena, ha'y henwel, An Arloedh yw kres. Bys y'n jydh hedhyw y sev yn Ofra an Abiezrysi.

25An nos na an Arloedh a leveris dhodho, ‘Kemmer tarow dha das, an nessa tarow seyth bloedh y oes, ha tenna dhe'n dor alter Baal yw dhe'th tas, ha trogh yn-nans an Ashera usi rybdho, 26ha drehav alter dhe'n Arloedh dha Dhuw war benn an dinas ma, yn furv usadow, ena kemmer an nessa tarow, ha'y offrynna avel offrynn leskys gans prenn an Ashera a dreghydh yn-nans.’ 27Ytho Gideon a gemmeras deg gour a'y servysi, hag a wrug par dell re lavarsa dhodho an Arloedh, mes drefenn y vos re ownek a'y deylu hag a dus an dre dh'y wul dydhweyth, ev a'n gwrug nosweyth.

Gideon a Dhiswra Alter Baal

28Pan sevis gwer an dre yn-bann ternos a-varr, otta, alter Baal o tennys yn-nans, ha'n Ashera rybdhi o treghys dhe'n dor, ha'n nessa tarow a veu offrynnys war an alter re bia drehevys. 29Ytho i a leveris an eyl dh'y gila, ‘Piw a wrug hemma?’ Wosa hwithra ha govynn, yn-medhons, ‘Gideon mab Yoash a wrug hemma.’ 30Ena tus an dre a leveris dhe Yoash, ‘Dro yn-mes dha vab rag may farwo, rag ev re dennas yn-nans alter Baal ha re droghas yn-nans an Ashera esa rybdhi.’ 31Mes ev a leveris dhe oll esa ow sevel er y bynn, ‘A vynnowgh strivya rag Baal, po a vynnowgh pledya y gen? Piw pynag a striv ragdho a vydh ledhys erbynn bora an jydh. Mars ywa duw, strives ev ragdho y honan, drefenn y alter dhe vos tennys yn-nans.’ 32Ytho y'n jydh na Gideon a veu henwys Yerubbaal, henn yw dhe leverel, ‘Strives Baal er y bynn’, drefenn ev dhe denna y alter yn-nans.

33Ena oll a Midyanysi ha'n Amalekysi ha mebyon an est a dheuth war-barth, hag ow treusi an avon i a gampyas yn nans Yezreel. 34Mes spyrys an Arloedh a dheuth war Gideon; hag ev a hwythas an hirgorn ha'n Abiezrysi a veu gelwys dh'y holya. 35Ev a dhannvonas kannasow der oll Manasse, hag i a veu gelwys dh'y holya. Ev a dhannvonas kannasow dhe Asher, Zebulun, ha Naftali hag i ynwedh eth yn-bann dhe vetya orta. 36Ena Gideon a leveris dhe Dhuw, ‘Mar telivrydh Ysrael der ow leuv, dell re leversys, 37otta, my a worr knew a wlan war an leur-drushya; mara pydh gluth war an knew hepken, ha sygh vydh oll an leur, ena my a woer y telivrydh Ysrael der ow leuv, dell re leversys.’ 38Hag yndella yth o. Pan sevis yn-bann ternos a-varr, hag a waskas an knew, ev a wrynyas bollas a dhowr anodho. 39Ena Gideon a leveris dhe Dhuw, ‘Na leskes dha sorr er ow fynn, gas vy dhe gewsel unnweyth moy; gas vy dhe previ gans an knew unnweyth moy; bedhes sygh war an knew hepken, ha bedhes gluth war an leur.’ 40Ha Duw a wrug yndella an nos na, sygh o war an knew hepken, ha war oll an leur yth esa gluth.