Trygh Gideon ha Dial

1Ena gwer Efraym a leveris dhodho, ‘Prag y hwrussowgh hemma dhyn, ma na'gan gelwsowgh pan ethewgh dhe vatalyas orth an Midyanysi?’ Hag i a'n keredhis yn fen. 2Ytho yn-medh ev dhedha, ‘Pandr'a wrug vy lemmyn kehaval dhywgh hwi? A nyns yw gesigow grappys Efraym gwell ages leun drevas grappys Abiezer? 3Duw re ros ynter agas diwla pennsevigyon Midyan, Oreb ha Zeeb; pyth a yllis vy y wul avelowgh?’ Pan leveris hemma aga sorr orto a lehas.

4Ena Gideon a dheuth dhe'n Yordan hag a dreusis, ev ha'n tri hans esa ganso, skwith ha nownek. 5Ytho ev a leveris dhe wer Sukkoth, ‘My a'gas pys, rowgh torthow a vara dhe'm holyoryon, rag skwith yns hag yth esov owth helghya Zebagh ha Salmunna, myghternedh Midyan.’ 6Mes pennsevigyon Sukkoth a leveris, ‘Eus genes seulabrys Zebagh ha Salmunna y'th leuv, rag may ryllyn bara dhe'th lu?’ 7Gideon a worthybis, ‘Ytho pan rollo an Arloedh Zebagh ha Salmunna yn ow leuv, my a dhrush agas kig gans spern an gwylvos ha war spedhas.’ 8Alena ev eth yn-bann dhe Penuel, hag a bysis dhiworta an keth tra; ha pobel Penuel a worthybis dhodho par dell worthybis pobel Sukkoth. 9Ytho ev a leveris dhe wer Penuel, ‘Pan dhov budhek y torrav an tour ma dhe'n dor.’

10Yth esa Zebagh ha Salmunna yn Karkor gans aga lu, a-dro dhe bymthek mil gour, oll remenant lu mebyon an est, rag hwegh ugens mil gledhevor re goedhsa. 11Ytho Gideon eth yn-bann war fordh an drigoryon yn tyldow a'n est dhe Noba ha Yogbeha, hag a omsettyas erbynn an lu; rag an lu o heb gwithysi. 12Zebagh ha Salmunna a fias dhe'n fo; hag ev a's holyas, hag a synsis an dhew vyghtern a Midyan, Zebagh ha Salmunna, ha gorra oll an lu yn skruth.

13Pan esa Gideon mab Yoash ow tehweles dhiworth an vatel orth bolgh Heres, 14ev a gachyas yonker, onan a wer Sukkoth, ha'y ev a'n apposyas, hag ev a skrifas ragdho rol a bennsevigyon Sukkoth ha'y henavogyon, seytek ha tri-ugens gour. 15Ena ev a dheuth dhe wer Sukkoth, hag a leveris, ‘Ottomma Zebagh ha Salmunna dredha may hwrussowgh ges ahanav, ow leverel, “Eus genes seulabrys y'th leuv Zebagh ha Salmunna, rag may ryllyn bara dhe'th wer yw gyllys skwith?” ’ 16Ytho ev a gemmeras henavogyon an sita hag ev a gavas spern an gwylvos ha spedhas ha gansa ev a gessydhyas gwer Sukkoth. 17Ynwedh ev a dorras dhe'n dor tour Penuel, hag a ladhas gwer an sita.

18Ena ev a leveris dhe Zebagh ha Salmunna, ‘Py par gwer a ladhsowgh yn Tabor?’ I a worthybis, ‘Par dell os, yndella yth ens. Haval ens dhe vebyon myghtern.’ 19Hag ev a worthybis, ‘Ow breder yth ens, mebyon ow mamm; dell vew an Arloedh, mara's gwitthewgh yn few, ny'gas ladhsen.’ 20Ytho y leveris dhe Yether y gynsa-genys, ‘Sav, ladh i!’ Mes ny dennas an maw y gledha, drefenn ev dhe berthi own, rag hwath yth o maw. 21Ena Zebagh ha Salmunna a leveris, ‘Ty, deus ha ladh ni dha honan, rag par dell yw an gour, yndella yw y nerth.’ Ytho Gideon a sevis ha ladha Zebagh ha Salmunna; hag ev a gemmeras an grommanow esa war gonnaow aga howrvergh.

Gideon a Wormel Idolys

22Ena mebyon Ysrael a leveris dhe Gideon, ‘Reyn warnan, ty ha'th vab ha'th vab-wynn ynwedh, rag ty re'gan delivras dhiworth leuv Midyan.’ 23Gideon a leveris dhedha, ‘Ny reynyav warnowgh, ha ny reyn warnowgh ow mab; an Arloedh a reyn warnowgh.’ 24Ena Gideon a leveris dhedha, ‘Gas vy dhe bysi dhiworthowgh, pub gour ahanowgh dhe ri dhymm bysow skovarn re gavas avel preydh.’ (Rag an eskerens a's tevo bysowyer skovarn a owr, drefenn i dhe vos Yshmaelysi.) 25‘Ni a's re a'gan bodh’ i a worthybis. Ytho i a lesas dillasenn, ha peub a dewlis ynni bysow skovarn re gavas avel preydh. 26Poester an bysowyer skovarn a bysis ev o unn mil ha seyth kans shekel a owr (heb rekna an grommanow ha'n tegennow ha'n dillas purpur may feu myghternedh Midyan gwiskys ynna, ha'n mongarennow esa war konnaow aga howrvergh.) 27Gideon a wrug efod anodho hag a'n gorras yn y dre, yn Ofra; hag oll Ysrael a farya avel horys ena, hag ev o gyllys antell dhe Gideon ha dh'y deylu. 28Ytho Midyan a veu fethys a-rag mebyon Ysrael, ha ny dhrehevsons aga fenn na fella. Ytho an tir a'n jevo kres dew-ugens blydhen yn dydhyow Gideon.

Mernans Gideon

29Yerubbaal mab Yoash eth dhe driga yn y ji y honan. 30Gideon a'n jevo deg mab ha tri-ugens, y yssiw y honan, rag ev a'n jevo lies gwreg. 31Y iswreg neb esa yn Shekem a omdhuk mab dhodho, ha hi a'n henwis Abimelek. 32Ena Gideon mab Yoash a verwis yn kothni dha, hag a veu ynkleudhys yn bedh y das yn Ofra an Abiezrysi.

33Kettell veu Gideon marow, mebyon Ysrael a dreylyas hag a farya avel horys gans an Baalim, ow kul Baal-berith aga duw 34Ny berthi mebyon Ysrael kov a'n Arloedh aga Duw re's sawsa dhiworth leuv oll aga eskerens a bub tu, 35na ny dhiskwedhsons lelder dhe ji Yerubbaal (henn yw Gideon) rag oll an dader re wrug ev dhe Ysrael.