Abimelek a Hwila Fondya Gwlaskor

1Lemmyn Abimelek mab Yerubbaal eth dhe Shekem dhe gerens y vamm hag ev a leveris dhedha ha dhe gordh oll a deylu y vamm, 2‘Leverewgh yn diwskovarn arlydhi Shekem, “Pyneyl yw gwell ragowgh, an deg ha tri-ugens a vebyon Yerubbaal dhe reynya warnowgh po onan dhe reynya warnowgh?” Perthewgh kov ynwedh my dhe vos agas askorn ha'gas kig.’ 3Ytho kerens y vamm a gewsis oll an geryow ma a'y wovis yn diwskovarn oll arlydhi Shekem ha'ga holonn a's tevo bodh a holya Abimelek, rag i a leveris, ‘Agan broder ywa.’ 4I a ros dhodho deg shekel ha tri-ugens a arghans yn-mes a dempel Baal-berith gansa mayth arvethas Abimelek drokpolatys ha javelyon, neb a'n holyas. 5Ev eth dhe ji y das yn Ofra hag a ladhas y vreder mebyon Yerubbaal, deg gour ha tri-ugens war unn men. Mes Yotham mab Yerubbaal, an yowynka, a veu gesys, rag ev a omgudhas. 6Ena oll arlydhi Shekem hag oll Beth-millo a omguntellas, hag i eth hag a wrug Abimelek myghtern, orth an dherwenn ryb an peulven yn Shekem.

Parabolenn an Gwydh

7Pan veu henna derivys dhe Yotham, ev eth hag a sevis war warthav menydh Gerizim, hag a grias yn ughel hag a leveris dhedha, ‘Goslowewgh orthiv, hwi arlydhi Shekem, rag may hwoslowo Duw orthowgh.

8An gwydh eth yn-mes

rag untya myghtern warnedha aga honan.

Ytho i a leveris dhe'n olewbrenn,

“Reyn warnan.”

9An olewbrenn a worthybis dhedha,

“A hedhav vy ow kul ow olew rych

ganso mayth yw duwow ha tus enorys,

ha mos dhe waya a-ugh an gwydh?”

10Ena an gwydh a leveris dhe'n figbrenn

“Deus ha reyn warnan.”

11Mes an figbrenn a worthybis dhedha,

“A hedhav vy ow kul ow hwekter

ha'm froeth sawrek,

ha mos dhe waya a-ugh an gwydh?”

12Ena an gwydh a leveris dhe'n gwinbrenn,

“Ty deus ha reyn warnan.”

13Ena an gwinbrenn a leveris dhedha,

“A hedhav vy ow kul ow gwin

a lowenha duwow ha tus,

ha mos dhe waya a-ugh an gwydh?”

14Ena oll an gwydh a leveris dhe'n spedhasenn,

“Ty deus ha reyn warnan.”

15Ha'n spedhasenn a leveris dhe'n gwydh,

“Mar mynnowgh yn hwir ow untya myghtern warnowgh,

ytho dewgh hag omwithewgh yn ow skeus;

poken des tan yn-mes a'n spedhasenn

ha leskes kederwydh Lebanon.”

16‘Lemmyn ytho, mar omdhugowgh yn gwirder hag yn lenduri pan wrussowgh Abimelek myghtern, ha mar tyghtsowgh yn teg gans Yerubbaal ha'y ji, ha re wrussowgh dhodho dell o gwiw – 17rag ow thas a omladhas ragowgh ha gorra y vewnans yn peryll, ha'gas delivras a leuv Midyan; 18mes hwi re sevis erbynn chi ow thas y'n jydh hedhyw, ha hwi re ladhas y vebyon, deg gour ha tri-ugens war unn men, ha hwi re wrug Abimelek, mab y vaghteth, myghtern war arlydhi Shekem, drefenn ev dhe vos a'gas teylu – 19mar tyghtsowgh yn gwirder hag yn lenduri gans Yerubbaal ha gans y ji y'n jydh ma, ytho lowenhewgh yn Abimelek, ha lowenhes ev ynnowgh; 20mes mar ny wrussowgh yndella, des tan dhiworth Abimelek ha leski arlydhi Shekem ha Beth-millo, ha des tan dhiworth arlydhi Shekem, ha dhiworth Beth-millo, ha leski Abimelek.’ 21Ena Yotham a boenyas dhe-ves, hag a fias, ow mos dhe Beer, le may hwortas, rag own a'y vroder Abimelek.

Koedh Abimelek

22Abimelek a reynyas war Ysrael tri blydhen. 23Mes Duw a dhannvonas tebel spyrys ynter Abimelek hag arlydhi Shekem; hag arlydhi Shekem a dhyghtyas yn fals gans Abimelek. 24Hemma a hwarva rag may fe diellys an drog re bia gwrys dhe'n deg mab ha tri-ugens a Yerubbaal ha may fe aga goes gorrys war aga broder Abimelek, neb a's ladhas, ha war arlydhi Shekem, neb a grevhas y dhiwdhorn rag ladha y vreder. 25Ytho arlydhi Shekem a settyas gwer yn kontrewaytyans war warthevyow an menydhyow. I a ladras pub huni a dremena rybdha war an fordh na; ha derivys veu dhe Abimelek.

26Pan eth Gaal mab Ebed yn Shekem gans y deylu, arlydhi Shekem a drestyas ynno. 27Wosa i dhe vos yn-mes dhe'n mes, ha kuntell grappys a'ga gwinlannow ha'ga trettya, i a synsis dy'goel. Ena i a entras yn chi aga duw hag eva, ha milliga Abimelek. 28Gaal mab Ebed a leveris, ‘Piw yw Abimelek, ha piw yw an Shekemysi bys ma'n serfyn? A ny servyas mab Yerubbaal ha Zebul y soedhek gwer Hamor tas Shekem? Ytho prag y telledh ni dh'y servya? 29Unnweyth a pe an bobel ma yn-dann ow leuv! Ena my a dhilesa Abimelek; my a lavarsa dhodho, “Ynkress dha lu ha deus yn-mes.” ’ 30Pan glewas Zebul, governour an sita, geryow Gaal mab Ebed y sorr a dhewis ynno. 31Ev a dhannvonas kannasow dhe Abimelek yn Aruma9:31 yn Aruma: Po yn fel. ow leverel, ‘Otta, Gaal mab Ebed ha'y gerens deuva dhe Shekem, hag ymons ow treylya an sita er dha bynn. 32Ytho lemmyn sav nosweyth, ty ha'n bobel usi genes, ha kontrewayt y'n prasow 33Ena myttin a-varr, kettell vo an howl ow sevel, sav yn-bann ha fysk war an sita; ha pan dho ev ha'n bobel usi ganso yn-mes er dha bynn, ty a yll dyghtya gansa dell dhegoedh.’

34Ytho Abimelek hag oll an bobel esa ganso a sevis nosweyth hag a gontrewaytyas erbynn Shekem yn peswar para. 35Pan eth yn-mes Gaal mab Ebed hag a sevis orth entrans yet an sita, Abimelek ha'n bobel esa ganso a sevis dhiworth aga hudhva. 36Ha Gaal pan y's gwelas, a leveris dhe Zebul, ‘Otta yma tus ow tiyskynna a bennow an menydhyow!’ Ha Zebul a leveris dhodho, ‘An skeusow war an menydhyow a hevel dhis bos tus.’ 37Gaal a gewsis arta hag a leveris, ‘Otta, yma tus ow tos yn-nans a gres an tir, hag yma unn para ow tos war fordh derwenn an goelyogyon.’ 38Ena Zebul a leveris dhodho, ‘Ple'ma dha vraslavar lemmyn, ty hag a leveris, “Piw yw Abimelek, bys ma'n serfyn?” A nyns yw an re ma an bobel a dhispressys? Ke yn-mes lemmyn hag omladh er aga fynn.’ 39Ytho Gaal eth yn-mes a-rag arlydhi Shekem hag a omladhas gans Abimelek. 40Abimelek a'n chasyas hag ev a fias a-ragdho. Lies a goedhas goliys, bys yn entrans an yet. 41Ytho yth esa Abimelek trigys yn Aruma; ha Zebul a jasyas Gaal ha'y gerens yn-mes, bys ma na yllens triga na fella yn Shekem.

42Ternos myttin an bobel eth yn-mes dhe'n prasow. Pan veu hemma derivys dhe Abimelek, 43ev a gemmeras an bobel ha'ga ranna yntra tri fara, hag a gontrewaytyas y'n prasow. Pan viras ha gweles an dus ow tos yn-mes a'n sita, ev a sevis er aga fynn ha'ga ladha. 44Abimelek ha'n para esa ganso a boenyas yn-rag hag a sevis orth entrans yet an sita, ha'n dhew bara a boenyas war oll an re esa y'n prasow ha'ga ladha. 45Abimelek a omladhas erbynn an sita oll an jydh na; ev a gemmeras an sita hag a ladhas an bobel esa ynni; ev a dorras an sita dhe'n dor hag a's hasas gans hoelan.

46Pan glewas oll arlydhi tour Shekem anodho, i a entras dorgell tempel El-berith 47Derivys veu dhe Abimelek y feu oll arlydhi tour Shekem kuntellys war-barth. 48Ytho Abimelek eth yn-bann dhe venydh Salmon, ev hag oll an bobel esa ganso. Abimelek a gavas boel yn y dhorn, ev a droghas pusorn a gewydh ha'y worra war y skoedh. Ena y leveris dhe'n bobel esa ganso, ‘An pyth a welsowgh hwi my dh'y wul, gwrewgh e yn skon, par dell re wrug vy.’ 49Ytho pub huni a'n bobel a droghas pusorn hag owth holya Abimelek i a'n gorras war an dhorgell, hag i a worras tan y'n dhorgell warnedha, bys may ferwis oll gwer tour Shekem ynwedh, a-dro dhe vil wour ha benynes.

50Ena Abimelek eth dhe Thebes, hag a gampyas erbynn Thebes, ha'y sesya. 51Mes yth esa tour krev a-ji dhe'n sita, hag oll an wer ha'n benynes hag oll arlydhi an sita a fias dhodho hag a'n degeas war aga lergh, hag i eth dhe do an tour. 52Abimelek a dheuth dhe'n tour, hag a vatalyas orto, hag a dheuth nes dhe dharas an tour rag gorra tan ynni. 53Mes neb unn venyn a dewlis men-melin yn-nans war benn Abimelek, ha brewi y grogen. 54Distowgh ev a elwis dhe'n yonker deger y arvow hag a leveris dhodho, ‘Tenn dha gledha ha'm ladha, ma na leverrer yn ow hever, “Benyn a'n ladhas.” ’ Ytho an yonker a'n gwanas, hag y ferwis. 55Pan welas gwer Ysrael bos Abimelek marow, i eth tre yn kettep penn. 56Yndella Duw a attylis dhe Abimelek a'n drogober a wrug erbynn y das, ow ladha y dheg broder ha tri-ugens, 57ha Duw a wrug may koedhas oll droktra tus Shekem war aga fenn, ha warnedha a teuth molleth Yotham mab Yerubbaal.