Yerusalem Forsakys

11 Ass yw an sita owth esedha digoweth

hag o leun a dus!

Ass yw hi gyllys kepar ha gwedhwes,

hag o meur y'n kenedhlow!

Neb o pennseviges y'n powyow

re beu gorrys yn keth dhe hwel krev.

2Oela a wra hi truan nosweyth,

ha'y dagrow war hy diwvogh;

Nyns eus dhedhi konforter vyth

a'y haroryon oll;

Pubonan a'y howetha re's toellas,

i re dheuth ha bos hy eskerens.

3Yuda res eth yn divroedh wosa galar

ha wosa gwasonieth kales;

hi a drig yn mysk an kenedhlow;

mes ny gyv powesva;

hy helghysi oll re settyas dalghenn ynni

yn kres hy foenvos.

4Yma fordhow Sion ow kyni,

rag ny dheu denvyth dhe'n goelyow;

oll hy yetys yw forsakys,

hy oferysi a hanas;

grevys yw hy gwyrghesow,

hag yma dhedhi hwerowder.

5Hy eskerens re dheuth ha bos penn,

sewen yw hy envi,

rag an Arloedh re's grevyas

drefenn myns hy threuspassow;

hy fleghes res eth

yn kethneth a-rag an eskar.

6Omdennys yw dhiworth myrgh Sion

oll hy meuredh,

hy fennsevigyon yw kepar ha kerwys

na yllons kavoes peurva;

i a fias dhe'n fo heb galloes

a-rag an helghyas.

7Yerusalem a berth kov,

yn dydhyow hy anken ha'y diannetter,

a'y fythow desirys oll

a's tevo y'n dydhyow koth.

Pan goedhas hy fobel yn dorn an eskar,

heb denvyth a's gweressa,

an eskerens a's gwelas,

ha gul ges a'y therroes.

8Yerusalem re beghas dres eghenn,

ha rakhenna res eth ha bos avlan;

pubonan neb a's gordhya a's dispres,

rag i re welas hy noethedh;

kyni ynwedh a wra hi,

ha treylya dhe-ves.

9Yth esa hy avlander yn hy lostennow,

ny ombrederi a'y thenkys;

rakhenna marthys veu hy therroes,

nyns esa dhedhi konforter vyth.

‘Gwel, A Arloedh, ow anken,

rag an eskar re dryghis!’

10An eskar re ystynnas y dhorn

war oll hy fythow drudh;

rag hi re welas an kenedhlow

dhe entra yn hy thyller sans,

an re a dhifennsys jy orta

mayth entrons y'th kuntelles.

11Hy fobel oll a gyn

hag i ow hwilas bara;

i a werth aga thresoryow rag boes

may hwrellons dh'aga horf dasvewa.

‘Gwel, A Arloedh, ha mir,

rag dispresys ov vy.’

12A ny vern travyth, oll hwi a dremen?

Mirewgh, ha gweles

mars eus ahwer kepar ha'm ahwer vy,

a veu gorrys warnav,

ma'm grevyas an Arloedh ganso

yn dydh y sorr fers.

13A-wartha ev a dhannvonas tan;

hag yth eth bys y'm eskern yn town;

ev a lesas roes rag ow threys,

ha'm treylya war-dhelergh;

re'm gasas dyegrys,

klamderys oll an jydh.

14Kelmys veu ow threuspassow warnav avel yew;

gans y leuv y fons nedhys war-barth

ha gorrys war ow honna,1:14 Po amendyans Ow drogoberow yw hewoel warnav, gans y leuv ymons nedhys war-barth, yma yew war ow honna.

ow kul dhe'm nerth fyllel;

an Arloedh re'm ros yn diwla tus

ma na allav sevel.

15An Arloedh re dewlis diwdhorn dhe-ves

oll ow thus krev y'm mysk;

ev a guntellas lu er ow fynn

rag brewi flour ow gwer yowynk;

an Arloedh re drettyas kepar hag yn gwinwask

war an wyrghes, myrgh Yuda.

16Rag an re ma yth oelav dagrow;

ow lagas a dhinwa dowr;

rag pell ahanav yw neb a'm konfortyo,

ow kul dhe'm enev dasvewa;

ow mebyon yw forsakys,

rag an eskar re dryghis.

17Sion a ystynn hy diwleuv;

nyns eus dhedhi konforter vyth;

an Arloedh re erghis erbynn Yakob

may fo y gentrevogyon y eskerens;

Yerusalem res eth ha bos

tra avlan yn aga mysk.

18Gwiryon yw an Arloedh,

drefenn ow bos diwostydh erbynn y anow;

klewewgh, my a'gas pys, hwi boblow oll,

ha mirewgh orth ow galar;

ow gwyrghesow ha'm gwer yowynk

res eth yn kethneth.

19My a grias war ow haroryon

mes i a'm toellas;

ow oferysi ha'm henavogyon

re verwis y'n sita,

hag i ow hwilas boes

rag gul dh'aga enev dasvewa.

20Mir, A Arloedh, ha grevys ov vy;

ow holodhyon yw troblys,

ow holonn yw treylys ynnov,

rag diwostydh dres eghenn re beuv.

A-ves, an kledha a ladh an fleghes,

a-ji nyns eus saw mernans.

21I re glewas fatell wrug vy kyni;

nyns eus dhymm konforter vyth.

Oll ow eskerens a glewas a'm anken;

lowen yns i drefenn ty dhe wul henna.

Doroy an jydh a dherivsys,

ha bedhens i kepar dell ov vy.

22Des oll aga drogober a-ragos;

ha gwra dhedha

kepar dell wrussys dhymmo vy

drefenn oll ow threuspassow;

rag pals yw ow hanasow

hag yma ow holonn ow klamdera.