Sorr Duw erbynn Sion

1Assa wrug an Arloedh yn y sorr

dhe vyrgh Sion bos kudhys gans kommol!

ev re dewlis yn-nans dhiworth nev bys yn nor

an splannder a Ysrael;

ny borthas ev kov a'y skavell-droes

yn dydh y sorr.

2An Arloedh re gollonkas heb truedh

oll annedhow Yakob;

yn y sorr ev re dorras

dinasow myrgh Yuda;

ev re dhros bys y'n dor ha disenora

an wlaskor ha'y rewloryon.

3Ev re hakkyas yn gwres y sorr

pub korn a Ysrael,

ev re dennas y leuv dhyghow dhe-ves dhiworta

a-rag an eskar;

ev re loskas erbynn Yakob kepar ha tan ow flammya,

ow kowlleski a bub tu.

4Ev re blegyas y warak kepar hag eskar,

y leuv dhyghow yw drehevys kepar hag envi;

ev re ladhas pup-tra o plegadow dhe'n lagas;

yn tylda myrgh Sion

ev re dhinewis y sorr kepar ha tan.

5An Arloedh o kepar hag eskar,

ev re gollonkas Ysrael;

ev re gollonkas oll y lysyow,

ev re dhistruis y dhinasow;

ha palshe yn myrgh Yuda

drem ha kynvann.

6Ev re ravnas y skovva kepar ha lowarth,

ev re dhistruis y dabernakel;

an Arloedh re wrug dhe woel ha sabot

bos ankevys yn Sion,

ha fell y sorr ev re dhispresyas

myghtern hag oferyas.

7An Arloedh re skonyas y alter,

ha nagha y sentri;

ev re ros yn leuv an eskar

fosow hy lysyow;

i a dhrehevis tros yn chi an Arloedh

kepar dell ve yn dy'goel.

8Ervirys yw an Arloedh dhe dhomhwel

fos myrgh Sion;

hag ev re ystynnas kordenn-vusura;

ny dreylyas y leuv dhiworth distrui

ha gul dhe skons ha fos kyni;

gyllys gwann yns i war-barth.

9Hy yetys re sedhis y'n dor;

ev re dhiswrug ha terri hy barrys;

yma hy myghtern ha'y fennsevigyon yn mysk an kenedhlow;

nyns usi an lagha namoy,

nyns eus hwath dh'y frofoesi

gwelesigeth dhiworth an Arloedh.

10Yma henavogyon myrgh Sion

owth esedha war an dor yn tawesek;

i re dewlis doust war aga fenn

hag omwrogysa gans yskar;

gwyrghesow Yerusalem

a blegyas aga fenn dhe'n dor.

11Ow dewlagas a fyllis dre oela dagrow;

ow holodhyon yw troblys;

ow bystel yw diverys war an dor

drefenn terroes myrgh ow fobel,

drefenn an fleghes ha'n re ow tena dhe glamdera

yn plenys an sita.

12I a gri dh'aga mammow,

‘Ple'ma ys ha gwin?’

hag i ow klamdera kepar ha tus woliys

yn plenys an sita,

ha'ga enev skoellys

yn askra aga mammow.

13Pandr'a allav y leverel a-dro dhis,2:13 Pandr'a allav y leverel a-dro dhis: Amendys. Styr an Ebrow yw ankler. pandr'a gehavalav dhis,

a vyrgh Yerusalem?

pandr'a gomparyav genes ma'th konfortiv,

A wyrghes, myrgh Sion?

Rag mar vras avel an mor yw dha derroes;

piw a yll dha yaghhe?

14Dha brofoesi re welas ragos

falsuri ha toell;

ny dhiskudhsons dha dhrogobereth

rag treylya dha gethneth,

mes ragos i re welas

gwelesigethow fals ha frowsus.

15Oll an dremenysi

a dak aga diwla orthis;

i a hwiban ha shakya aga fenn

orth myrgh Yerusalem;

‘Yw homma an sita a veu henwys

perfydh yn tekter,

ha lowena oll an nor?’

16Oll dha eskerens

a iger aga ganow er dha bynn;

i a hwiban ha deskerni aga dyns,

ha kria: ‘Ni re's kollonkas!

Hemm yw devri an jydh mayth en ni hwansek dhodho.

Wor'tiwedh ni re'n kavas! ni re'n gwelas!’

17An Arloedh re wrug y vynnas,

ev re gowlwrug y lavar;

kepar dell ordenas seuladhydh;

ev re dorras heb truedh;

ev a wrug dhe'n eskerens lowenhe warnas,

ev re dhrehevis korn dha eskerens.

18Kria a wrug aga holonn war an Arloedh.

A fos myrgh Sion,

gas dha dhagrow dhe frosa yn-nans avel avon

dydh ha nos.

Na ro dhis dha honan powes,

na difresyans dhe vew dha lagas.

19Yn-sol, kri nosweyth,

yn dalleth an goelyow!

Skoell dha golonn kepar ha dowr

a-dherag fas an Arloedh!

Drehav dha dhiwla dhodho

a-barth enev dha fleghes,

a glamder gans nown orth penn pub stret.

20Gwel, A Arloedh, ha mir.

Piw a dhyghtsys yndella?

A wra gwragedh dybri aga askorr,

fleghes wynn heb namm?

A ledhir oferyas ha profoes

yn sentri an Arloedh?

21Yma tus yowynk ha tus koth a'ga growedh

y'n stretys;

ow morenyon ha'm gwer yowynk

re goedhas der an kledha;

tyb re's ladhas yn dydh dha sorr;

ty re ladhas heb truedh.

22Ty a elwis seul a'm broweghi a'm kyrghynn

kepar dell ve yn dy'goel;

hag yn dydh sorr an Arloedh

nyns esa denvyth a skapyas na diank;

seul a wrug vy aga dineythi ha maga

ow eskar re dhistruis.